Read Ateso 2 Petero 3 Bible Online

2 Petero 3 - Ateso bible

2 Petero 3

¹ Luminan, lo ŋes ebalua lokiareit lokewadikakini yes; kotoma kes kere kesinyikokini noi akusiwomisio nuiliogototas aisiitun;

² tetere iitununete akiro nueneritos inabin lukalaunak, aicorakinet da naka Ejakait ido Eketajaran kama kikiyakiakus.

³ Kojenutu na nasodit ebe epote ikesekelok kapaarasia nukawasia isekelete, etuparete aiŋobelekec bonik,

⁴ inerasi ebe, “Ejai bo ai aisumunet naka abunoreke? Naarai ageun netikolo ajotoorotor lukapapaawok, esalito iboro kwape ajaatar kageunet naka asubio.”

⁵ Naarai epeleikinito aimurwokin na ebe kejai akuj ameun apeŋo, ka akwap naalomuni kotoma akipi, ido kokidiŋ akipi, kanuka akirot naka Edeke,

⁶ ŋes ainakini akwap nakolosek amudiario kakalele naka akipi.

⁷Konye iŋadakinitai akuj ka akwap nukatinenikwana akim, kanuka akirot kaŋin, idaritere kiton apaaran naka atubokinio ka amudiario naka ituŋa lumam eyoŋito Edeke.

⁸ Konye luminan, sirikimurwok akirot na adiopet, ebe, esubit adiopepaaran kama ka Ejakait, bala ikar elukumit, ka ikar elukumit da bala adiopepaaran.

⁹ Mam iyapia Ejakait aisumuneteke, kwape eomitotor ice aiyapia, konye etitiŋikinit mamakus, komam ekoto idio kayesi aolior, konye kodoloto kere aitoronikin.

¹⁰ Konye ebuni apaaran naka Ejakait kwape ekokolan, kosodi edaun akuj kagat naepol, ecalaros nugeet kamwanis kanaidopit, kosodi icweio da akwap ka aswamisio nuejaas tomake.

¹¹Aso naarai ecalaros iboro ŋul kere kwaŋin, ibusakinit yes ajaun biai kotoma oponesio lukalaunak ka ayoŋit Edeke,

¹² komunos, kimielas da noi abunore naka apaaran naka Edeke, naecalarere akuj naitonokunio, ka nugeet da ecalaros kamwanis kanaidopit.

¹³ Konye kwape ejaar aisumunetake, kimuno akuj nakitetet ka akwap da nakitetet, neiboio adolit.

¹⁴ Aso luminan, naarai imunosi ŋun, kodunyakis adumakinio toma ainapakin, komamei elos karaida aitoronet, kakonyeneke.

¹⁵ Koomito atitiŋikin naka Ejakaitiwok araut aitajario. Abu onacewok lominat Paul kiwadikak yes kwaŋin kwape ejaar acoa naainakinitai ŋes,

¹⁶ido inera ŋun kotoma obaluanake kere. Ejaas kotomakec acekiro nuetioko ajenun, nuemojirete lumam esisiato ka lumam icasito, kwape iswamakiniata nuiwadikatai ace, kiton amudiariokec.

¹⁷ Aso luminan, yes luidaut sek ajenun ŋin, kidaras kinyeis aibiror anyoun kotoma aicasitekus, kosodete ayaŋaario kapaar naka lukaronok.

¹⁸ Konye kopolokis toma asianut, ka ajenun da Ejakaitiwok ido Eketajaran Yesu Kristo. Koinakinai ŋol aibuses lolo kiton apaaran naka ikar kere. Amen.