Read Ateso 1 Yokana 5 Bible Online

1 Yokana 5 - Ateso bible

1 Yokana 5

¹ Ŋin kere yeniyuunit ebe Yesu ŋes Kristo, eurio kama ejai Edeke, ŋin kere da yenemin ikaurian emin ŋin yeneuriei ŋesi.

²Kana ŋes kijenunia ebe kimina idwe luka Edeke, nakiminar Edeke, kiswamai da aicorakinetake.

³ Naarai na ŋes amin naka Edeke, ebe kiricit aicorakinetake. Ido mam aicorakinetake elaŋir.

⁴ Naarai ŋin kere yeneurio kama ejai Edeke ipikori akwapin; na ŋes aipikor naipikori akwapin, aiyuuniwok.

⁵ Iŋai bo ipikori akwapin, dimarai yeniyuunit ebe Yesu ŋes Okoku loka Edeke?

⁶ Ŋes ŋol loabu kobu kanuka akipi ka aokot, Yesu Kristo; mere kotoma akipi bonik, konye kotoma akipi ka aokot da.

⁷Erai Emoyo ekajenan, naarai erai Emoyo abeit.

⁸Ejaas ikajenak iuni, Emoyo, ka akipi, ka aokot da; acamanara iuni kidiopet.

⁹ Arai kicamuni aitejenunet naka ituŋa, epol aitejenunet naka Edeke adepar, naarai na ŋes aitejenunet naka Edeke naitejenunit nuka Okokuke.

¹⁰ Yeniyuunit Okoku loka Edeke ejai aitejenunet tomakeŋ, Yenimam iyuunit Edeke, etuluo ŋes ekeŋalan, naarai mam abu kiyuu aitejenunet naitejenunit Edeke nuka Okokuke.

¹¹ Na ŋes aitejenunet ebe, abu Edeke koinak oni aijar naka ikar kere, ejai da aijar ŋin toma Okokuke.

¹² Yenejai Okoku, ejai da aijar; yenemamei Okoku loka Edeke emamei aijar.

¹³ Kewadikak yes nu tetere ijenete ebe ejai yes aijar naka ikar kere, ŋul luiyuunito ekiror loka Okoku loka Edeke.

¹⁴ Na da ŋes atitiŋ nakija kaoni kamakeŋ, ebe, arai kiilip ibore kwape ejaar akoteke, kipupuni ŋesi oni.

¹⁵Arai kijeni ebe kipupuni ŋesi oni, ŋin kere yenikilipi, kijeni ebe kidumu iboro lukilipit kamakeŋ.

¹⁶ Arai keanyu ituŋanan onaceke kediakaa adiakaret namere naka atwanare, ilipi, einakini Edeke ŋes aijar kanuka ŋul lumam ediakarito kiton atwanare. Ejai adiakar naka atwanare; mam enera ebe kilipakinai ŋin.

¹⁷Amamus adolit kere ŋes adiakar, ejai da adiakar namere naka atwanare.

¹⁸ Kijeni ebe ŋin kere yeneurio kama ejai Edeke mam ediakari, konye loeurio kama ejai Edeke ericit ŋes, mam lokaronon etirori ŋes.

¹⁹ Kijeni ebe kirai luka Edeke, iboiete da akwapin kere kotoma lokaronon.

²⁰ Konye kijeni ebe abu Okoku loka Edeke, abu koinak oni ajenun tetere kijeni ŋol loerai abeit, kija oni toma ŋol loerai abeit, toma Okokuke Yesu Kristo. Ŋol ŋes Edeke lokabeit, aijar da naka ikar kere.

²¹ Idwe ludidik, kidarasi bonik kama kaputosia.