Read Ateso Ikatubok 10 Bible Online

Ikatubok 10 - Ateso bible

Ikatubok 10

¹ Akaulo ka Abimelek abu Tola okoku loka Pua, okoku loka Dodo, etuŋanan loka Isakar, konyou aitajar Isirael; abu kiboie koSamir kakwap nakiukon naka Epuraim.

²Abu kotubok Isirael ikar akaisaarei kaluuni, kotwana, kidaikinai Samir.

³Akauloke konyou Yair, Egileadit; abu kotubok Isirael ikar akaisaarei ka luarei.

⁴ Ajaas ŋes odweke akaisauni luebwanenenete isigirian akaisauni, ajaas kes ireria akaisauni, luemaikinitai Kabot-yair kiton lolo, luejaas akwap naka Gilead.

⁵Kotwana Yair, kidaikinai Kamon.

⁶ Kiswamata idwe luka Isirael bobo nueroko kakonyen nuka EJAKAIT, kijaanakis Ibaalim, ka Asitarot, ka idekesio luka Suria, ka idekesio luka Sidon, ka idekesio luka Moab, ka idekesio luka idwe luka Amon, ka idekesio luka Ipilisitian; apotu kojalata EJAKAIT, komam ijaanakinete ŋes.

⁷ Kinep anyunyura naka EJAKAIT aluikin Isirael, kogwela kes akan naka Ipilisitian, akan da naka idwe luka Amon.

⁸Apotu kisiyaloŋoŋoto koroikis da idwe luka Isirael kokaru kaŋol: apotu koroikis idwe kere luka Isirael luajaas okekwa loka Yorodan akwap naka Imorain naejai Gilead, ikar itomon ka lukanykauni.

⁹Kodokasi idwe luka Amon Yorodan alosit aitiji Yuda ka Benyamin, ka ekal loka Epuraim; kwaŋin kiyaloŋoŋ noi Isirael.

¹⁰ Komonyata idwe luka Isirael mama ejai EJAKAIT ebe, “Kidiaka kamakon, naarai kijal Ekosideke, kijaanaki Ibaalim.”

¹¹ Kotema EJAKAIT idwe luka Isirael atiar, “Mam kereka eoŋ abu ketajar yes kaneejaas Imisirian, ka Imorain, ka idwe luka Amon, ka Ipilisitian?

¹² Apotu Isidonin da, ka Imalekain, ka Imaonin koroikis yes; ipotu komonyata kaneajai, abu eoŋ ketajar yes kakanikec.

¹³ Konye kijalata eoŋ, ijaanakis icedekesio: kanuka ŋun mam bobo ketajar yes.

¹⁴ Koloto komonyata mama ejaas idekesio luiseutu; kitajarata do kesi yes kapak naka icanikus.”

¹⁵ Kotemasi idwe luka Isirael EJAKAIT atiar, “Kidiaka; kiswamakinai ijo sio nuitojokit ijo; konye kiŋaiŋait, koyuunai sio lolo.”

¹⁶ Kolemasi idekesio lumo kamakec, kijaanakis EJAKAIT: kokadak eketau kanuka ican luka Isirael.

¹⁷Kosodete idwe luka Amon atukokin, kidukuroto Gilead. Kotukokinos idwe luka Isirael da, kidukuroto Misipa.

¹⁸ Kotemanaros ituŋa, kes ikapolok luka Gilead ebe, “Iŋai etuŋanan loegei aitiji idwe luka Amon? Eraun ŋol ekapolon loka luiboiete koGilead kere.”