Read Ateso Ikatubok 11 Bible Online

Ikatubok 11 - Ateso bible

Ikatubok 11

¹ Kerai Yeputa Egileadit etuŋanan lokirigi, lokatitiŋ da, arai ŋesi okoku loka naadote: Gilead ŋes aurie Yeputa.

²Kourik aberu naka Gilead ŋes idwe lusap; kosodi kepolooros odwe luka aberuke, apotu kireŋeasi Yeputa, kotemasi ŋes atiar, “Mam jo idumuni airumet kokal loka papawok; naarai irai ijo okoku loka aceberu.”

³ Kosodi Yeputa akerit kaneajaas iinacanake, kiboikin akwap naka Tob: kotukokinos ituŋa luutai neejai Yeputa, kolomasi nepepe kaŋes.

⁴Kosodi kanen ketuboros apaarasia, kitijioto idwe luka Amon Isirael.

⁵Kosodi kitijioto idwe luka Amon Isirael, apotu imakio luka Gilead koloto aomare Yeputa kakwap naka Tob.

⁶Kotemasi Yeputa atiar, “Bia, koraun ekosijakait, tetere kitijie idwe luka Amon.”

⁷ Kotema Yeputa imakio luka Gilead atiar, “Mere ipotu yesi kolaata eoŋ, kireŋeasi da kokal loka papaka? Kanukinyo do iponiata neajar eoŋ naijaatar ocan?”

⁸ Kotemasi ŋes imakio luka Gilead atiar, “Kanuka ŋun ŋes kiboŋunio mamakon, tetere ilosi kasio aitiji idwe luka Amon, iraun ijo lokapolonikosi loiyait luiboiete koGilead kere.”

⁹Kotema Yeputa imakio luka Gilead atiar, “Arai kiinyakasi yesi eoŋ ore aitiji idwe luka Amon, kosodi EJAKAIT aijaikin kes eoŋ, araun kereka eoŋ lokapolonikus?”

¹⁰ Kotemasi imakio luka Gilead Yeputa atiar, “EJAKAIT, ŋes ekajenaniwok; abeit kiswamai kwape ejaar akonikirot.”

¹¹ Kosodi Yeputa alosit kimakio luka Gilead, kodakakis ituŋa ŋes araun ekapolon, ejakait da loeyait kes: kiner Yeputa akiroke kere kakonyen nuka EJAKAIT koMisipa.

¹²Kijuka Yeputa ikiyakia mama ejai ekabaka loka idwe luka Amon ebe, “Inyo bo kimariai ijo keoŋ, tape ijo ibuni mamakaŋ aitiji akakwap?”

¹³ Koboŋok ekabaka loka idwe luka Amon ikiyakia luka Yeputa ebe, “Naarai abu Isirael koyaŋa akakwap, anyoun koArunon kiton Yabok, kiton Yorodan da, naalomunio koMisiri: aso kinyakakinai akwapin ŋun kainapakin.”

¹⁴Kijuka Yeputa ikiyakia bobo mama ejai ekabaka loka idwe luka Amon:

¹⁵ Kotema ŋes atiar, “Inera Yeputa kwanata ebe: Mam Isirael abu koyaŋa akwap naka Moab karaida akwap naka idwe luka Amon:

¹⁶ Konye naaponiata kesi koMisiri, abu Isirael kitor amodiŋ kiton Aŋolol Nakareŋan, kodol Kades;

¹⁷ Kosodi Isirael aijukakin ekabaka loka Edom ikiyakia ebe, ‘Keŋaiŋait, kocamakinai ketor akwapukon’: konye mam ekabaka loka Edom abu kopup, Kwape kwaŋin kijuka mama ejai ekabaka loka Moab: konye mam abu kocam: kiboikin Isirael Kades.

¹⁸ Kosodi aitor amodiŋ, kiriria akwap naka Edom, ka akwap naka Moab, kobu kariri nakokide naka akwap naka Moab, kidukuroto juwai naka Arunon; konye mam apotu kolomasi oikor loka Moab, naarai Arunon ŋes arai eikor loka Moab.

¹⁹ Kijuka Isirael ikiyakia mama ejai Sikon ekabaka loka Imorain, ekabaka loka Kesibon; kotema Isirael ŋes atiar, ‘Kiŋaiŋait, kocamak sio ketoroto akwapukon adolore akwapukosi.’

²⁰Konye mam abu Sikon komunokin Isirael aitor oikoruke: konye abu Sikon kotukok iketuŋa kere, kidukuru Yakas, kitiji Isirael.

²¹ Abu EJAKAIT, Edeke loka Isirael kijaik Sikon ka iketuŋa kere akan naka Isirael, kodanyata kes: kwaŋin kirum Isirael akwap kere naka Imorain lueboienenete kakwap kaŋin.

²²Kirumata eikor kere loka Imorain, anyoun koArunon kiton Yabok, anyoun kamodiŋ da kiton Yorodan.

²³Aso abu EJAKAIT, Edeke loka Isirael kodema Imorain airumetekec kakonyen nuka iketuŋa Isirael, ikoto do ijo airum kes?

²⁴ Mam kereka jo irumi nukiinakini Kemos ekonideke jo airum? Aso ŋul luadema EJAKAIT Ekosideke airumetakec kakonyenekosi, ŋul kes kirumi isio.

²⁵ Itelekarit kereka ijo Balak okoku loka Sipor, ekabaka loka Moab? Abu ŋesi kitepeg Isirael, arai bo abu ŋesi kitiji kes?

²⁶ Naeboio Isirael koKesibon ka ireriake, koAroer da ka ireriake, koreria da kere luejaas osiep loka Arunon, ikar akwat auni; kanukinyo mam yes ipotu kinyakariata kes kapak kaŋin?

²⁷ Kanuka ŋun mam eoŋ adiakit kamakon, konye iswamakinit ijo eoŋ erono aitiji eoŋ: EJAKAIT, Ekatubon, ŋes etubokini lolo idwe luka Isirael ka idwe luka Amon.”

²⁸Konye mam ekabaka loka idwe luka Amon abu kopup akiro nuejukakinit Yeputa ŋes.

²⁹ Kosodi emoyo loka EJAKAIT adoikin Yeputa, kitor Gilead ka Manase, kitor da Misipe loka Gilead, konyou koMisipe loka Gilead kotubor neajaas idwe luka Amon.

³⁰ Kiyapoik Yeputa EJAKAIT aiyaposit ebe, “Arai kijaik ijo cut idwe luka Amon akanika.

³¹ Ejaun do ebe, ŋin yenelomuni kokekia luka ekatogo aisiriam eoŋ, naaboŋunio kainapakin kaneejaas idwe luka Amon, eraun ŋin yenika EJAKAIT, ainakini ŋes araun ainakinet naicweio.”

³²Kwaŋin kotubor Yeputa mama ejaas idwe luka Amon aitiji kes; kijaik EJAKAIT kes akanike.

³³ Kodany kes anyoun koAroer kiton naidolio Minit, ireria akaisaarei, kiton Abel-keramim, kaario naepol noi, Kwaŋin kitononokai idwe luka Amon kakonyen nuka idwe luka Isirael.

³⁴ Kobu Yeputa Misipa oreke, ido koany, kolom akokuke aisiriam ŋes kisiman ka ekosio: arai ŋesi atelunake; amamei ŋes ikoku yenisapat arai yenipese, dimarai ŋin bon.

³⁵ Kosodi kanen keanyu ŋesi ŋes, abu kocil ikenapen, kotema atiar, “Otukwi, akokuka! Kitisil ijo eoŋ noi, irai ijo adiopet kotoma kaŋul lukesiyaloŋoŋoete eoŋ: naarai aooŋ akaituk mama ejai EJAKAIT, mam apedori aijulakin.”

³⁶ Kotema ŋin ŋes atiar, “Papa, iwooŋ akoniituk mama ejai EJAKAIT; kiswamakinai eoŋ kwape ejaatar ŋun nualomunete kaitukukon; naarai kisinyaŋa EJAKAIT jo kaneejaas lukasurupokon, kes idwe luka Amon.”

³⁷ Kotema ŋin papake atiar, “Kiswamakinai na: kinyeinai ber ilapio iarei, tetere alosi aijesar oroŋan, aimony abekonutuka, eoŋ ka apaupaka.”

³⁸Kotema atiar, “Ape bo.” Kotwara ŋes adaun ilapio iarei: kolot, ŋes ka apaupake, komony abekonutuke koroŋan.

³⁹ Kosodi kanen kedaunos ilapio iarei, koboŋ ŋin neejai papake, lokiswamak ŋes kwape ajaar aiyapositike naeyapoikinit; mam ŋin abu kojeni ekiliokit. Koraun epone kotoma Isirael,

⁴⁰adwe nuka Isirael alosenen ŋolikaru akiitunun akoku naka Yeputa Egileadit apaarasia aoŋon ŋolikaru.