Read Ateso Ikatubok 12 Bible Online

Ikatubok 12 - Ateso bible

Ikatubok 12

¹ Kotukokinos ituŋa luka Epuraim nepepe, kitoroto ari naka agolitomei; kotemasi Yeputa atiar, “Kanukinyo ituboror ijo aitiji idwe luka Amon, komam kinyarari sio alosit kajo? Kicweikini isio jo kotogokon.”

²Kotema Yeputa kes atiar, “Kipou eoŋ ka ikatuŋa kapegata noi kidwe luka Amon; kaanyarau yes, mam ipotu kitajarata eoŋ kakanikec.

³ Kaany eoŋ ebe mam ipotu kitajarata eoŋ, abu kebwaik aijaraka akanika, kasodi atubor asurokin idwe luka Amon, kejaik EJAKAIT kes akanika: kanukinyo do iponitotor mama ajai lolo aitiji eoŋ?”

⁴ Kosodi Yeputa atukokin ituŋa luka Gilead kere, kitiji Epuraim: kodanyata ituŋa luka Gilead ituŋa luka Epuraim, naarai abalas ebe, “Iraas yesi luisiito koEpuraim, yes Igileadin, kokidiŋ Epuraim, kokidiŋ da kaManase,”

⁵ Kikamut Igileadin idoketa luka Yorodan luebeete Epuraim: kojaun do ebe, naatemaria ŋinidiopet kotoma kaluasiito luka Epuraim ebe, “Kocamakinai katubor,” atemarete ituŋa luka Gilead ŋes atiar, “Irai ijo Epuraimit?” Arai ketema ebe, “Mam”:

⁶Atemarete kesi ŋes atiar, “Aso kolim cani ebe, Shibolet”; kolimuni ŋesi ebe, “Sibolet”; naarai mam apedorit alimun kojokan; kosodete do aikamun ŋes, aarakin odoketa luka Yorodan; kotwakata kapak kaŋin luka Epuraim ilukumin akaisaoŋon ka ilukumin iarei.

⁷Kotubok Yeputa Isirael ikar ikanykape. Kotwana Yeputa Egileadit, kidaikinai ore ediopet koreria luka Gilead.

⁸Kotubok Ibisan loka Bet-lekem Isirael atupakin ŋes.

⁹Ajaas ŋes odwe akaisauni, abu kokora adweke akaisauni, kosodi amanyakin odweke apesur akaisauni. Abu ŋesi kotubok Isirael ikar ikanykaarei.

¹⁰Kotwana Ibisan, kidaikinai Bet-lekem.

¹¹Kotubok Elon Esebulunit Isirael atupakin ŋes; abu ŋesi kotubok Isirael ikar itomon.

¹²Kotwana Elon Esebulunit, kidaikinai Aiyalon akwap naka Sebulun.

¹³Kotubok Abudon okoku loka Kilel Epiratonit Isirael atupakin ŋes.

¹⁴ Ajaas ŋes odweke akaisaoŋon ka odwe akaisauni luka odweke, luebwanenenete isigirian akaisakanykaarei: abu ŋesi kotubok Isirael ikar ikanykauni.

¹⁵ Kotwana Abudon okoku loka Kile! Epiratonit, kidaikinai Piraton akwap naka Epuraim, akwap nakiukon naka Imalekain.