Read Ateso Ikatubok 14 Bible Online

Ikatubok 14 - Ateso bible

Ikatubok 14

¹ Kolot Samuson Timuna, koany apese koTimuna naka adwe nuka Ipilisitian.

² Koboŋ, kolimok papake ka totoke atiar, “Aany apese koTimuna naka adwe nuka Ipilisitian: aso do komanyakinai ŋes.”

³ Kosodete papake ka totoke atemar ŋes atiar, “Emamei do apese kadwe nuka iinacanakon, arai kotuŋaka kere, tape jo ilosi aimany aberu naka Ipilisitian lumam ekepep?” Kotema Samuson papake atiar, “Komanyakinai ŋes; naarai kesiyalamikinit eoŋ noi.”

⁴ Konye mam papake ka totoke ajenete ebe kerai akirot naka EJAKAIT: naarai amoot ŋesi akirot naasurokinet Ipilisitian. Kapak kaŋin ayaito Ipilisitian Isirael.

⁵Kosodi Samuson alosit. Ka papake ka totoke Timuna, kodol amanat nuka emusabibu nuka Timuna: ido koany, abu eŋatuny losorokany kogat asurokin ŋes.

⁶ Kodoik ŋes emoyo loka EJAKAIT kagogoŋ, kopooia ŋes kwape tikepooiara ikalol, komamei ibore kakanike: konye mam abu kolimok papake karaida totoke nuabu kiswama.

⁷Kolot, kinerata kapese; abu ŋesi kisiyalamik noi Samuson.

⁸Ketubor apak, abu koboŋo ayaŋaar ŋes, kopaa aanyun akuan nakatwan naka eŋatuny: ido koany, ajai enene loka ao akuan naka eŋatuny, ka esik.

⁹Kitiŋ ŋes kakaninike, kiyatak alosit, konyami kolosi, kodolok papake ka totoke, koinak kes, konyamata: konye mam abu kolimok kes ebe alemuni ŋesi esik kakuan naka eŋatuny.

¹⁰Kolot papake neejai apese: kipo Samuson epucit kanen; naarai atapit ikatumunak aswam kwaŋin.

¹¹Kosodi kanen, keanyut ŋes, apotu koyaut ipaup akaisauni ajaut kaŋes.

¹² Kotema Samuson kes atiar, “Akoto eoŋ alimokin yes asogol: arai kipedosi yesi aitejenun ŋes kotoma apaarasia akanykaarei nuka epucit, ka aitebeikin ŋes, kainakini do yes igoen akaisauni luka ebaputa, ka inapen akaisauni luibusiak:

¹³Konye arai mam ipedorete aitejenun ŋes, kiinakinete do yesi eoŋ igoen akaisauni luka ebaputa, ka inapen akaisauni luibusiak.” Kotemasi ŋes atiar, “Kolim cani asogol, kapuputu.”

¹⁴Kotema kes atiar, “Alom akiriŋ kaneejai yenikanyaman, Alom da awiiny kaneejai yenikagogoŋon.” Mam apotu kopedosi aitejenun asogol kotoma apaarasia auni.

¹⁵ Kosodi kapaaran nakikanyetekaarei, kotemasi aberu naka Samuson atiar, “Kijodijod okilenikon, tetere kitebeikini sio asogol, kenyeis aicwe jo ka ekal loka papakon kakim: kinyaraunito sio aitaraun lukican? Mere kwaŋin?”

¹⁶ Komony aberu naka Samuson kakonyeneke, kotema atiar, “Kilait ijo eoŋ, mam kimina eoŋ: ilimok idwe luka ikatuŋa asogol, komam kilimokinit eoŋ.” Kotema ŋes atiar, “Koany, mam alimokinit papaka karaida totoka, ido konyet jo ŋes kalimokini?”

¹⁷Komony kakonyeneke apaarasia akanykaarei nuajaar epucit: kosodi kanen kapaaran nakikanyetekaarei, abu kolimok ŋes, naarai abu kimaima ŋes noi: kolimok ŋin idwe luka iketuŋa asogol.

¹⁸Kapaaran nakikanyetekaarei eroko akoloŋ kelomara, apotu ituŋa lukore kolimokis ŋes ebe, “Inyo bo ewiny adepar esik? Inyo bo egogoŋ adepar eŋatuny?” Kotema kes atiar, “Kedim yes aitokor ataokoka, Timam kitejenut akasogol.”

¹⁹ Kodoik ŋes emoyo loka EJAKAIT kagogoŋ, kolot Asukelon, kodany ituŋa akaisauni kakesi, koyaŋa luŋatuna kamakec, koinak luetejenunete asogol inapen luibusiak. Kinep anyunyurake, kolot togo loka papake.

²⁰ Konye aponi aberu naka Samuson kokorakinai aupake, loanaikinit araut opaperoke.