Read Ateso Ikatubok 15 Bible Online

Ikatubok 15 - Ateso bible

Ikatubok 15

¹ Kosodi kanen ketubor apak, kapak naka aidweny akima, abu Samuson kipejok akeberu kikalol; kotema atiar, “Alomari agola mama ejai akaberu.” Konye mam papake abu kisiik ŋes alomar.

² Kotema papa loka ŋin atiar, “Abeit abu kaomite ebe ila ijo ŋes cut; kanuka ŋun abu kakorak ŋes aupakon: mam kinacike nadidi ejok adepar ŋes? Keŋaiŋait, koyaŋa ŋin aiboisike.”

³Kotema Samuson kes atiar, “Emameun eoŋ akirot irwan na kaneejaas Ipilisitian, naameŋerekinia kes.”

⁴ Kolot Samuson kikam ikuei akwat auni, kolem akalasia, kiteteik ikorio, koenik akalas kidiŋ kaŋulukorio iarei.

⁵Kosodi kedau ŋesi aisinepikin akalasia, abu koosik kes alosit akima nuka Ipilisitian, kicwe ikes, ka akima nuabwoete, ka iseitunin da.

⁶ Kosodete Ipilisitian atemar ebe, “Iŋai eswama nu?” Kotemasi atiar, “Samuson, ekamuran loka Etimunit, naarai abu koyaŋa akeberu, kosodi akorakin aupake.” Kopotu Ipilisitian, kicweata ŋes ka papake kakim.

⁷Kotema Samuson atiar, “Arai iswamaete yesi nuikote nen, abeit enyaŋar eoŋ kamakus, kasodi konyet apalar.”

⁸ Kodany kes noi, jokan, aiar naepol: kolot kiboikin acilet naka emoru loka Etam.

⁹Kosodete Ipilisitian alosit, kidukuroto Yuda, kisiarakinos toma Leki.

¹⁰Kotemasi ituŋa luka Yuda atiar, “Kanukinyo iponiata yesi asurokin sio?” Kotemasi atiar, “Kiponit ajen Samuson, aiswamakin ŋes kwape abu ŋesi kiswamakinia sio.”

¹¹ Kosodete ituŋa ilukumin iuni luka Yuda alosit acilet naka emoru Etam, kotemasi Samuson atiar, “Mam jo ijeni ebe Ipilisitian kes kiyaito oni? Inyo bo do yen yenikiswamak ijo sio?” Kotema kes atiar, “Kwape keswamakiniata eoŋ, eswamak eoŋ da kes kwaŋin.”

¹²Kotemasi ŋes atiar, “Kiponit ajen jo, tetere kijaikini jo kakan naka Ipilisitian.” Kotema Samuson atiar, “Kiyapoikinoi eoŋ ebe, mam yes ikulepek kiarete eoŋ.”

¹³Kolimokis ŋes atiar, “Mam; konye kieni ber isio jo kagogoŋ, kijaikini jo akanikec: konye abeit mam sio kiari jo.” Koenata ŋes kaunoi aarei nukitetiak, koyaut ŋes komoru.

¹⁴Kedol ŋesi Leki, kibwoŋakis Ipilisitian iriamunos kaŋes: kodoik ŋes emoyo loka EJAKAIT kagogoŋ, kosubata aunoi nuajaas akaninike bala abira nuicweio kakim, kodooto aenetake kakaninike.

¹⁵ Kodum abokony nakitetet naka asigiria, korio akekan, kitiŋ, kodanyia ituŋa elukumit.

¹⁶Kotema Samuson atiar, “Kabokony naka asigiria, atukon katukon, Adany ituŋa elukumit kabokony naka asigiria.”

¹⁷Kosodi kanen kedau ŋesi einer, kocaka abokony kakanike: komaikinai aibois ŋin Ramat-leki.[9]

¹⁸ Kojak akure noi, kiworo EJAKAIT ebe, “Iinak akan naka ekonibulesit aitajar na naepol; atwani kereka eoŋ akure, kebirokin akan naka lumam ekepep?”

¹⁹ Konye kocil Edeke aipany naejai Leki, kolomut akip kanen; kedau aimat, Koboŋok bobo ekemoyo, kikwar: ŋes do amaikinere ekirorike En-kakore, [10] naejai Leki, kiton lolo.

²⁰ Abu ŋesi kotubok Isirael kapaarasia nuka Ipilisitian ikar akaisaarei.