Read Ateso Ikatubok 18 Bible Online

Ikatubok 18 - Ateso bible

Ikatubok 18

¹ Kapaarasia kaŋun amamei ekabaka koIsirael: kapaarasia kaŋun da amoot ateker naka Idanin airumet nakiboienenet: naarai kiton apaaran ŋin mam airumetekec etebeikinitai kes katekerin nuka Isirael.

² Kijukas idwe luka Dan kokekikec ituŋa ikany kotiaikec kere, ituŋa lukirigin, anyoun koSora ka Esitaol, airot akwap, ka aiŋic da; kotemasi kes atiar, “Koloto, koŋicata akwap.” Kodolot akwap nakiukon naka Epuraim, togo loka Mika, koperoto nen.

³Kidunyakinos kesi togo loka Mika, apotu kojenata eporoto loka ekatumunan Elebit: kopaasi nen, kotemasi ŋes atiar, “Iŋai bo kiyauni jo ne? Inyo bo iswamai ijo kane? Inyo bo da ejai jo nee?”

⁴ Kotema kes atiar, “Kekonaki Mika eoŋ kwaŋin, karop eoŋ, araun da eoŋ ekesasedoti.”

⁵ Kotemasi ŋes atiar, “Kiŋaiŋait kiŋit Edeke tetere kijenuni arai erereŋ akosilosit nakilosi.”

⁶ Kotema esasedoti kes atiar, “Koloto kainapakina. Ejai erotokus loilosete akonyen nuka EJAKAIT,”

⁷Kosodete ituŋa ŋul ikany anyoun, kodolut Lais, koanyut ituŋa luajaas nen, kwape eboioto kinapakina, kwape ejaar epone loka Isidonin, kiyamakina kinapakina da; naarai amamei kakwap yenayait kes, yenepedori aitisil kes kadiokirot, alwaka kesi koSidonin, amameete kes akiro kere kidiotuŋanan.

⁸Koboŋosi neejaas iinacanakec Sora ka Esitaol: kotemasi iinacanakec kes atiar, “Anyoika bo?”

⁹ Kotemasi atiar, “Konyoutu, kaloto asurokin kes, naarai kianyu akwap, ido koany, ejok noi: kanukinyo ipalaritotor? Sirikikalanyakata alosit alomar airum akwap.

¹⁰ Nailosioto, idolokinete ituŋa luinapakina, elal da akwap: naarai kijaik Edeke ŋes akanikus; aibois naemamei eipud loka ŋinibore kere yenejai akwap.”

¹¹Konyout kanen lukokek loka Idanin, koSora ka Esitaol, ituŋa akwat akanykape luakapito lujiis.

¹² Kolototo, kidukuroto Kiriat-yearim, koYuda: ŋes amaikiniata aibois ŋin Makane-dan, kiton lolo: koany, ejai kau naka Kiriat-yearim.

¹³Kitoroto nen kiton akwap nakiukon naka Epuraim, kopotu togo loka Mika.

¹⁴ Kosodete ituŋa ikany lualosito airot akwap naka Lais, aboŋokin ikeceinacan ebe, “Ijenete yesi ebe ejai otogoi lu epod, ka iterapim, ka aput naegerer, ka aput nacaluuna? Aso do koomoomata nuiswamaete.”

¹⁵ Kopaasi nen, kodoloto togo loka ekatumunan Elebit, ŋes etogo loka Mika, kiŋitata ŋes ejauteneke.

¹⁶Kobwaata ituŋa akwat akanykape luakapito lujiis, luaraas luka idwe luka Dan, korute loka ere.

¹⁷ Koloto ituŋa ikany lualosito airot akwap, kolomasi nen, kolemut aput naegerer, ka epod, ka iterapim, ka aput nacaluna: kobwo esasedoti korute ka ituŋa akwat akanykape luakapito lujiis.

¹⁸Kosodi kelomasi kwi togo loka Mika, kelemut aput naegerer, ka epod, ka iterapim, ka aput nacaluna, kotema esasedoti kes atiar, “Inyo bo iswamaete yesi?”

¹⁹ Kotemasi ŋes atiar, “Kililiŋ, korapak kakonikan aitukukon, kaupakinos, koraun papakosi ka esasedotikosi: ejok kereka jo araut esasedoti togo loka ediopetuŋanan, arai bo araut esasedoti loka ateker ka ekek loka Isirael?”

²⁰Kolakar etau loka esasedoti, kolem epod, ka iterapim, ka aput naegerer, kouparos kituŋa.

²¹Kwaŋin kibelokinos koloto, kisiŋarenoto ludidik ka ibaren ka iboro.

²²Kelwanikinos kesi kotogo loka Mika, kotukokinos ituŋa luajaas otogoi luedunyas ketogo loka Mika, kodolokis idwe luka Dan.

²³Kiworoto kesi idwe luka Dan. Koŋoliasi kau, kotemasi Mika atiar, “Inyo bo kisiriebi jo, tape ibunit kerioŋet loetia nen?”

²⁴Kotema atiar, “Ilemarito yesi ikadekesio lueswamauni eoŋ, ka esasedoti, iyekasi da, inyo do bobo ejai eoŋ? Ikote kiŋisito eoŋ ai ebe, ‘Inyo bo kisiriebi jo?’ ”

²⁵ Kotemasi idwe luka Dan ŋes atiar, “Sirikepupun ekoniporoto kamakosi, kinyeis ituŋa luenyunyuraka abunokin jo, kosodi ijo atwaniar aijarakon, ka aijar naka lukokalekon.”

²⁶Kolototo idwe luka Dan: keanyu Mika ebe agogoŋ kesi adepar ŋes, abu kibelokin, koboŋo togoke.

²⁷ Koyaŋaasi ŋul lueswamauni Mika, ka esasedoti loarai loke, kodolut Lais, otuŋa luiyamakina luinapakina da, kodanyata kes kakwanis naka ekileŋ; kicweata ere kakim.

²⁸ Komamei ekayuunan, naarai alwana kaneajai Sidon, amameete da kes akiro kidiotuŋanan; ajai ere aditot naka Bet-rekob. Kodukoto bobo ere ŋol, kiboikinos nen.

²⁹ Komaikis ekiror loka ere Dan, kwape ajaar ekiror loka Dan papaakec, loaurikinio Isirael: konye kerai sek ekiror loka ere Lais.

³⁰ Kosipokis idwe luka Dan kanukec aput naegerer; ido Yonatan okoku loka Geresom, okoku loka Musa, ŋes ka odweke, kes araas isasedotin luka ateker naka Idanin aitodol apaaran naaŋatarere akwap.

³¹ Kwaŋin kosipokis kesi aput naegerer naka Mika naeswamauni ŋesi, apak kere naajaar etogo loka Edeke Silo.