Read Ateso Ikatubok 2 Bible Online

Ikatubok 2 - Ateso bible

Ikatubok 2

¹ Kobu emalaika loka EJAKAIT koGiligal kiton Bokim. Kotema atiar, “Abu ketolom yes koMisiri, kayaŋau da yes akwap na naabu keyapoik lukapapaakus; katema atiar, ‘Mam cut abili akaitutuket kayes:

² Mam yes itutukete kaluiboiete kakwap kana; itiyanakinete itemwanakec’: konye mam yes irimarito ekaporoto: kanukinyo iswamaata ŋun?

³ Ŋes do atemaria eoŋ da ebe, Mam ereŋeari kes kakonyenekus; eraunos bala ikukwa kosiepionokus, eraunos da idekesiokec atacit kamakus.”

⁴Kosodi kanen, naenerar emalaika loka EJAKAIT akiro ŋun mama ejaas idwe kere luka Isirael, kodelosi ituŋa, komonya.

⁵Komaikis aibois ŋin Bokim: [1] koinakis kanen EJAKAIT asuban.

⁶Naatwaria Yosua ituŋa, apotu idwe luka Isirael koloto, ŋinituŋanan airumeteke airum akwap.

⁷Apotu ituŋa kijaanakis EJAKAIT apaarasia kere nuka Yosua, ka apaarasia kere nuka imakio luabusito adepar Yosua, luaanyunito aswam kere nakos naka EJAKAIT, naeswamakinit Isirael.

⁸Kotwana Yosua okoku loka Nun, ekejaanakinan loka EJAKAIT, korai loka ikar akwatat ka itomon.

⁹ Kidaikis ŋes oikor loka airumeteke Timuna-keres, kakwap nakiukon naka Epuraim, kari naka agolitomei naka eroŋat loka Gaas.

¹⁰ Koyaŋaarai atur ŋin kere mama ejaas lukapapaakec: kotupak kes atur ace namam ajeni EJAKAIT, karaida aswam naeswamakinit ŋesi Isirael.

¹¹Kiswamata idwe luka Isirael nueroko kakonyen nuka EJAKAIT, kijaanakis Ibaalim:

¹² Kojalata EJAKAIT, Edeke loka lukapapaakec, loetolomuni kes kakwap nako Misiri, kosodete atupar icedekesio, luka idekesio luka ituŋa lualukunito kes, kokukonokinos kes: kitunyunyurikisi EJAKAIT.

¹³Kojalata EJAKAIT, kijaanakis Baal ka Asitarot.

¹⁴ Kinep anyunyura naka EJAKAIT aluikin Isirael, kijaik kes akan naka ikaŋatak luaŋasete kes, kogwela kes akan naka lukasurupokec lualukunito, komam bobo epedorete abwoikin lukasurupokec.

¹⁵ Kama alosete kere, aluikinit akan naka EJAKAIT aikonakin kes erono, kwape abalar EJAKAIT, kwape da eyapoikinitor EJAKAIT kes: kiyaloŋoŋoto noi.

¹⁶ Koseu EJAKAIT ikatubok, luetajarete kes kakan naka ŋul kaluaŋasito kes.

¹⁷ Konye mam apotu kopuput ikatubokokec, naarai apotu koloto eporo mama ejaas icedekesio, kokukonokinos kes: kopaasi katipet korot loalosenenoto lukapapaakec, luarimarito aicorakineta nuka EJAKAIT: konye mam kes apotu kiswamata kwaŋin.

¹⁸ Kosodi keseiki EJAKAIT kes ikatubok, kojai do EJAKAIT kekatubon, kitajar kes kakan naka lukasurupokec apaarasia kere nuka ekatubon: naarai abu EJAKAIT kiitu eidinyikec kanuka ŋul kaluaroikinito kes lueticanete kes.

¹⁹Konye naetwania ekatubon, koboŋonorete, kiswamaenenete nueroko noi adepar lukapapaakec kotoma atupit icedekesio aijaanakin kes, ka akukonokin kes; mam apotu kopalut aswam ŋun karaida eponekec loka aninik.

²⁰ Kinep anyunyura naka EJAKAIT aluikin Isirael; kotema atiar, “Naarai ebuca ateker na akaitutuket naabu kecorak lukapapaakec, mam erimarito ekaporoto;

²¹Amear kwana mam eoŋ ereŋeari kakonyenekec adio kotoma atekerin nuenyeini Yosua naatwania:

²² tetere egimoria kes Isirael, arai ericete alosenen korot loka EJAKAIT, kwape aricitotor lukapapaakec, arai bo mam.”

²³Kwaŋin kinyek EJAKAIT atekerin ŋun, komam ireŋeari kes katipet; karaida aijaikin kes akan naka Yosua.