Read Ateso Ikatubok 20 Bible Online

Ikatubok 20 - Ateso bible

Ikatubok 20

¹ Kosodete idwe kere luka Isirael alomar, kotukokin ekodet bala ediopetuŋanan, ageun koDan kiton Beer-seba, kakwap da naka Gilead, mama ejai EJAKAIT Misipa.

² Kitodiaros ijaka luka ituŋa kere, kes atekerin kere nuka Isirael, katukot naka ituŋa luka Edeke, ituŋa ilukumin akwat aoŋon luelosete kakeje luautunito ikileŋa.

³(Apotu idwe luka Benyamin kopuput ebe alototo idwe luka Isirael Misipa.) Kotemasi idwe luka Isirael atiar, “Kolimokinai sio, ekonakini ai aronis na iswamaun?”

⁴ Koboŋok Elebit, okilenike loka aberu naaaritai ebe, “Abu kadol Gibea loerai loka Benyamin, eoŋ ka akabusiat kapero nen.

⁵ Kosodete ituŋa luka Gibea anyoun asurokin eoŋ, kalukakis eoŋ togo kuare; aomitos aiar eoŋ, apotu komunaut akabusiat, kotwana.

⁶ Abu kayaŋa akabusiat, katubutub ŋes, kejuka akwap kere naka airumet naka Isirael: naarai eswamata nukasilianut nukabaŋaanut da kotoma Isirael.

⁷ Koanyutu, yes idwe luka Isirael, yes kere, kolimutu akusikirot, kinerut.”

⁸Konyout ituŋa kere bala ediopetuŋanan, kotemasi ebe, “Mam idiopet kaoni elosi owemake, karaida idiopet kaoni aboŋor togoke.

⁹Konye kiswamakini oni Gibea kwanata; kilosi asurokin ŋes kailamilam keroet.

¹⁰Kiseuni ituŋa itomon ka ŋinikwatat katekerin kere nuka Isirael, ka akwatat kotoma elukumit, ka elukumit kotoma olukumin itomon, aomikin ituŋa inyamat, tetere iswamaete, naedolioto Gibea loka Benyamin, kwape ejaar abaŋaanut kere naeswamata koIsirael.”

¹¹Kwaŋin kotukokinos ituŋa kere luka Isirael asurokin ere kimorikikina nepepe bala ediopetuŋanan.

¹² Kijukasi atekerin nuka Isirael ituŋa anatar ateker kere naka Benyamin ebe, “Anyoin aronis na naaponi kiswamai kamakus?

¹³ Aso do koyautu ituŋa odwe luka Belial, luejaas Gibea, tetere kiari kes, kalemas aronis koIsirael.” Konye apotu Ibenyamin koŋeroto apupun eporoto loka Iinacanakec idwe luka Isirael.

¹⁴Kotukokinos idwe luka Benyamin anyoun koreria kopotu Gibea, alomar aitiji idwe luka Isirael.

¹⁵Aponi kimarai idwe luka Benyamin kapaaran kaŋin koreria, ituŋa ilukumin akaisaarei ka lukanykape luautunito ikileŋa, kogelara lueboiete koGibea, luemwaasi akwat akanykaarei, ituŋa luaseunitai.

¹⁶ Ajaas otuŋa ŋul kere ituŋa luaseunitai akwat akanykaarei iŋodialik; ŋolidiopet apedor aporocikin etimat da alicait, komam ediaki.

¹⁷Aponi kimarai ituŋa luka Isirael kogelara Benyamin, ituŋa ilukumin akwat aoŋon luautunito ikileŋa; ŋul kere araas ikajiok.

¹⁸ Konyout idwe luka Isirael koloto Betel, kiŋitata Edeke kotemasi ebe, “Iŋai kiŋarenikini sio alosit aitiji idwe luka Benyamin?” Kotema EJAKAIT atiar, “Yuda ŋes iŋareni.”

¹⁹Konyout idwe luka Isirael tupuruc, kidukuroto asurokin Gibea.

²⁰Kolomasi ituŋa luka Isirael aitiji Benyamin; kiderakinos ituŋa luka Isirael aitiji kes koGibea.

²¹ Kolomut idwe luka Benyamin koGibea, kibirokis kwap kapaaran kaŋin luka Isiraelin ituŋa ilukumin akaisaarei ka luarei.

²²Kosodete ituŋa, kes ituŋa luka Isirael, atitiŋior, kiderakinos ejie kaibois naederakina kesi kapaaran nasodit.

²³ Koloto idwe luka Isirael komonyata kakonyen nuka EJAKAIT kiton eboŋ; kiŋitata EJAKAIT ebe, “Ekunyakini bobo eoŋ lolo aitiji idwe luka Benyamin onaceka?” Kotema EJAKAIT atiar, “Kolot kosurok ŋes.”

²⁴Kikunyakis idwe luka Isirael asurokin idwe luka Benyamin kapaaran nakiareit.

²⁵ Kolom Benyamin asurokin kes koGibea kapaaran nakiareit, kibirokis bobo kwap luka idwe luka Isirael ituŋa ilukumin itomon ka lukanykauni; ŋul kere atunito ikileŋa.

²⁶Kosodete idwe kere luka Isirael, ka ituŋa kere alosit, kodoloto Bet-el, komonyata, kiboioto kanen kakonyen nuka EJAKAIT, kikanyata eteŋei apaaran ŋin kiton eboŋ; koinakis ainakineta nuicweio, ka ainakineta nuka ainapakin mama ejai EJAKAIT.

²⁷ Kiŋitata idwe luka Isirael EJAKAIT, (naarai ajai asaduku naka aitutuket naka Edeke nen kapaarasia kaŋun.

²⁸ Pinekas, okoku loka Eleasar, okoku loka Aaron, ŋes abwoi kakonyeneke kapaarasia kaŋun) ebe, “Alomari kereka eoŋ bobo aitiji idwe luka Benyamin onaceka, arai bo apalari?” Kotema EJAKAIT atiar, “Koloto; naarai ejaikini ŋes moi akanikon.”

²⁹ Kibwaik Isirael ikaperunok alukun Gibea.

³⁰Koloto idwe luka Isirael asurokin idwe luka Benyamin apaaran nakiwuniet, kiderakinos asurokin Gibea, kwape kapakio ace.

³¹Kolomas idwe luka Benyamin asurokin ituŋa, kiŋalaarai kes kore; kogeut aiar ka aidany kotuŋa kwape kapakio ace, korotin lukapolok, ediopet loelosi Bet-el, loce da loelosi Gibea, koitela, ituŋa luka Isirael kwape akaisauni.

³²Kotemasi idwe luka Benyamin atiar, “Kidanya kes kakonyenewok, kwape lem.” Konye kotemasi idwe luka Isirael ebe, “Kakerata oni, keŋalaasi kes kore kiton orotin lukapolok.”

³³Konyout ituŋa kere luka Isirael kaiboisikec, kiderakinos koBaal-tamar: konemesikinos ikaperunok kaiboisikec, ŋes Maare-geba.

³⁴ Kopotu ituŋa ilukumin itomon luaseunitai kotoma Isirael kere asurokin Gibea, kosisior ejie noi; konye mam kwi ajenete ebe eapikinit kes aronis.

³⁵Kodany EJAKAIT Benyamin kakonyen nuka Isirael: komudiasi idwe luka Isirael kapaaran kaŋin luka Benyamin ituŋa ilukumin akaisaarei ka lukany, ka akwatat: ŋul kere autunito ikileŋa.

³⁶ Kwaŋin kojenut idwe luka Benyamin ebe adanyi kes; naarai apotu ituŋa luka Isirael kojalakis Benyamin aibois, naarai amunos kesi ikaperunok luebwaikinito kesi asurokin Gibea.

³⁷ Kisunyasi ikaperunok, kokerata Gibea; kikunyakis ikaperunok, kodanyata lukore kere kakwanis naka ekileŋ.

³⁸Apotu ituŋa luka Isirael ka ikaperunok kinerunito aanyunet na ebe, itupuruunete kesi apuru naepol kore.

³⁹Kibeleunos ituŋa luka Isirael kojie, kogeu Benyamin aiar ka aidany ituŋa luka Isirael kwape ituŋa akaisauni: naarai abalas ebe, “Abeit kidanyi kes kakonyenewok kwape kojie losodit.”

⁴⁰ Konye kegeu apuru apuruun kore kosubite bala epir loka apuru, koŋoliasi Ibenyamin kau, ido koany, apurie ere kere kiton akuj.

⁴¹ Kibeleunos ituŋa luka Isirael, koumokis ituŋa luka Benyamin: naarai ajenete ebe ebunokinit kes aronis.

⁴²Kanuka ŋun apotu kibelooros kakonyen nuka idwe luka Isirael aibe orot loka amodiŋ; konye koduduŋ kes ejie; kosodete lualomunete koreria amudiar kes kanen.

⁴³ Apotu kolukakis Ibenyamin, kodapata kes, kicakacakata kes kaiboisikec nakibworaret, kiton aibois naiteos koGibea kokide.

⁴⁴Kotwakata luka Benyamin ituŋa ilukumin itomon ka lukanykauni; ŋul kere araas ituŋa lukirigin.

⁴⁵ Kibelooros kokeriasi amodiŋ moru loka Rimon: kideput korotin ituŋa ilukumin ikany kakesi; koduduŋata kes kiton Gidom, kodanyata ituŋa ilukumin iarei kakesi.

⁴⁶Kwaŋin kere luapotu kotwaka kapaaran kaŋin luka Benyamin emwaasi ituŋa ilukumin akaisaarei ka lukany luautunito ikileŋa; ŋul kere araas ituŋa lukirigin.

⁴⁷ Konye apotu ituŋa akwat akanykape kibelooros kokeriasi amodiŋ, moru Rimon, kiboioto komoru Rimon ilapio iwoŋon.

⁴⁸Kibeleunos bobo idwe luka Isirael mama ejaas idwe luka Benyamin kodanyata kes kakwanis naka ekileŋ, ere kere, ka ibaren, kere da luapotu kesi kodumut: bobo da apotu kicweata ireria kere luapotu kesi kodumut.