Read Ateso Ikatubok 4 Bible Online

Ikatubok 4 - Ateso bible

Ikatubok 4

¹ Kiyatakis bobo idwe luka Isirael aswam nueroko kakonyen nuka EJAKAIT, kedau Ekud atwanare.

² Kogwela kes EJAKAIT akan naka Yabin ekabaka loka Kanaan, lokeyait koKasor; ekapolon loka ajoreke ŋes Sisera, lokiboie koKaroset loka Imo.

³ Komonyata idwe luka Isirael mama ejai EJAKAIT; naarai kejaas kagalin akwat akanykaoŋon nuka asua; koŋara noi idwe luka Isirael ikar akaisaarei.

⁴ Kapaarasia kaŋun Debora, anabi, aberu naka Lapidot, ŋes atubonokini Isirael.

⁵ Kiboienenei da kokwap kedukut loka Debora kidiŋ Rama ka Bet-el kakwap nakiukon naka Epuraim: kolosenenete idwe luka Isirael mamakeŋ atubonokinio.

⁶ Kijuka konyarau Barak okoku loka Abinoam anyoun koKedes-Naputali, kobala ebe, “Mere kicorakinit EJAKAIT Edeke loka Isirael atiar, ‘Kobea moru Tabor, koyaŋa da ituŋa ilukumin itomon lukodwe luka Naputali, kodwe da luka Sebulun?

⁷ Eoŋ da eriuni mama ijai kocor Kison Sisera lokapolon loka ajore naka Yabin, nepepe kakegalin ka ekekodet; eoŋ da ejaikini ŋes akanikon.’ ”

⁸Kobala Barak ŋes ebe, “Arai kiupar ijo keoŋ, alosi; konye arai mam jo kiupar keoŋ, mam alosi.”

⁹ Kobala ŋesi ebe, “Abeit kiupar kajo, konye alosit naikoto alosit mam eraun naka akoniibuses, naarai egwelari EJAKAIT Sisera akan naka aberu.” Konyou Debora, kouparos kaBarak oKedes.

¹⁰ Konyarau Barak Sebulun ka Naputali kotukokinos oKedes; kodokasi ikiliok ilukumin itomon neejai: kodoka Debora da kaŋes.

¹¹ Ketiakara Keber Ekenit kama ejaas Ikenitin, kes idwe luka Kobab, ekamuran loka Musa, kibubukinite ekewema olua loka Saananim die kaKedes.

¹²Kolimokinai Sisera kwape kedokaria Barak okoku loka Abinoam moru Tabor.

¹³Kotukonok Sisera akegalin kere, agalin nuka asua akwat akanykaoŋon, ka ituŋa kere lukejaatar, anyoun koKaroset loka Imo kiton ocor Kison.

¹⁴ Kobala Debora Barak ebe, “Konyou; naarai na ŋes apaaran naekorakinia EJAKAIT Sisera akanikon: mere EJAKAIT kiŋarenikinit jo?” Kosodi kijesun Barak komoru Tabor, kotupakis ituŋa ilukumin itomon.

¹⁵ Kitubur EJAKAIT Sisera ka akegalin kere ka ajoreke da kere kakwanis naka ekileŋ kakonyen nuka Barak; kodoku Sisera kagalike koker kakeje.

¹⁶Konye kotupak Barak agalin ka ajore kiton Karoset loka Imo; koŋianak ajore kere naka Sisera akwanis naka ekileŋ; komamei etuŋanan loabu kideun.

¹⁷ Konye koker Sisera kakeje kodol owema loka Yael aberu naka Keber Ekenit: naarai kinapakina Yabin ekabaka loka Kasor kekek loka Keber Ekenit.

¹⁸Koloma Yael airiamun kaSisera, kobala ŋes ebe, “Kopau, ejakait, kopau koloma togoka; sirikiyoŋ.” Kopaa mamake koloma toma owema, kimuko ŋes kakapet.

¹⁹ Kobala ŋes ebe, “Keŋaiŋait ae adisikipi kamat; naarai kajakit akur.” Kopuko eseme loka akile, kitamat ŋes, kosodi kimuko.

²⁰Kolimok ŋesi ya ebe, “Kobwo kokek loka ewema, kosodi arai kebu ituŋanan kere kiiŋit jo atiar, ‘Ejai ediotuŋanan ne?’ kotema ebe, ‘Emamei.’ ”

²¹ Kosodi kolem Yael aberu naka Keber eloit loka ewema, kolem da anyul kakekan kolot ecedi, kibubuk eloit oreeteke, kipelor kiton alup: naarai kejotoi ajo nuipu; kiilor kotwana.

²²Ido koany, kibwapite Barak Sisera, kolom Yael aisiriamaar ŋes, kolimok ebe, “Bia, ketodik etuŋanan loimoot ijo.” Kobu mama ejai; ido koany, koperi Sisera etwanit, kidiria da eloit koreeteke.

²³ Kwaŋin kidoŋo Edeke Yabin ekabaka loka Kanaan kakonyen nuka idwe luka Isirael kapaaran kaŋin.

²⁴Kiyatanakin akan naka idwe luka Isirael aipikor Yabin ekabaka loka Kanaan, aitodol nakemudiariata Yabin ekabaka loka Kanaan.