Read Ateso Ikatubok 7 Bible Online

Ikatubok 7 - Ateso bible

Ikatubok 7

¹ Kosodi Yerubaal, ŋes Gideon, ka ituŋa kere luajaas kaŋes adilokin anyoun, kidukuroto ariri naka atan naka Karod: [6] kojaas iidukurun luka Midian arikec naka agolitomei, ariri naka eukot loka More, aditot.

² Kotema EJAKAIT Gideon atiar, “Ipu noi ituŋa luijaatar ijo, eoŋ ainakin Imidianin akanikec, kinyek Isirael aiturokinor eoŋ ebe, ‘Akakan alopet ŋes ketajar.’

³ Aso do kolot, kolimo kaki nuka ituŋa ebe, ‘Ŋol loekuriana loemarani, koboŋo konyou da komoru Gilead.’ ” Koboŋosi kotuŋa ituŋa ilukumin akaisaarei ka luarei; kosalata ilukumin itomon.

⁴ Kotema EJAKAIT Gideon atiar, “Eroko ituŋa ipu noi; koyaŋa kes akipi, egimori eoŋ kes kaŋina kanukon: ejaun do ebe, loatemari eoŋ ebe, ‘Ŋol euparos kajo,’ Ŋopeŋol iuparotor; loatemari eoŋ ebe, ‘Mam ŋol euparos kajo,’ mam ŋol iuparotor.”

⁵Kwaŋin koyaŋau ituŋa akipi: kotema EJAKAIT Gideon atiar, “Ŋolituŋanan loemasi akipi kaŋajepeke, kwape emasia ekiŋok, igitari ŋol; ka ŋol da loekukokin aimat.”

⁶Etiai loka ŋul kaluamasete bala ekiŋok, luebwaikinete akanin aitukekec emwaasi akwat auni: konye ituŋa luce kere apotu kokukokinos aimat akipi.

⁷ Kotoma EJAKAIT Gideon atiar, “Ketajari jo kituŋa akwat auni luamasete bala ekiŋok, ejaikini Imidianin akanikon: koloto do ŋinituŋanan aiboisike.”

⁸Kitiŋata do ituŋa inyamat kakaninikec, ka arupepenekec: kijuka ituŋa kere luka Isirael ŋinituŋanan owemake, konye abu kitasal ŋul akwat auni: kojaas iidukurun luka Midian kwapukeŋ aditot.

⁹ Kosodi kanen, kakuare kaŋin kotema EJAKAIT ŋes atiar, “Konyou, kijesar oidukurun; naarai ejaik kes akanikon.

¹⁰Konye arai ikuriana ijo aijesar, kijesaros ijo ka Pura ekejaanakinanikon oidukurun:

¹¹ Ipupuni do nuineras kesi; akaulo kaŋun egogoŋioros akonikanin aijesar oidukurun.” Kosodi ŋesi ka Pura ekejaanakinanike aijesar kiton otuŋa luakapakina ejie luajaas osaŋe loka iidukurun.

¹² Koperete Imidianin ka Imalekain ka idwe kere lukokide kaditot bala emaase kanuka aipues; komam ikaalaikec imarunos, kwape asiŋe naejai ariri naka aŋolol kanuka aipues.

¹³ Kebu Gideon, koany, ajai etuŋanan loalimonokini oupake airujasit, kobala ebe, “Koany, eruja airujasit, ido koany, bala abu aluŋuret naka emugati loka asairi kikokorun oidukurun luka Midian, kodol owema, kocam ŋes kibiror, kobuburia ŋes, koper ewema.”

¹⁴ Koboŋok oupake ŋes ebe, “Mere ŋin icebore dimarai ekileŋ loka Gideon okoku loka Yoas, etuŋanan loka Isirael: ejaiki EJAKAIT Midian ka ajore kere akanike.”

¹⁵Kosodi kepupu Gideon inerai airujasit ka apolouke, abu koma Edeke; koboŋo oidukurun luka Isirael, kotema atiar, “Konyoutu; naarai ejaiki EJAKAIT ajore naka Midian akaninikus.”

¹⁶ Kotiak ituŋa akwat auni korioŋeta iuni, kititiŋ kes kere arupepen ka amoti nuamameete iboro kotoma, kibwaik akalasia nuenokete toma amoti.

¹⁷Kotema kes atiar, “Kosesenai eoŋ, kiswamata kwape kwaŋin; ido koany, naadolio aiboisio nukosaŋe loka iidukurun, kosodi kwape eswamaa eoŋ, iswamaete yesi da kwape kwaŋin.

¹⁸Naakutakinia arupepe, eoŋ ka ituŋa kere luejaas keoŋ, ikutakinete yesi da arupepen kaŋoliwai kere loka iidukurun, kobalas ebe, ‘Luka EJAKAIT ka luka Gideon da.’ ”

¹⁹ Kwaŋin kodolut Gideon ka ituŋa akwatat luajaas kaŋes aibois nakosaŋe loka iidukurun kageunet naka akwenyunet nakokidiŋ, atipet napekedaut aijulakin ikedarak: kokutata arupepen, kobwaŋabwaŋata amoti nuetiŋito kakaninikec.

²⁰Kokutata irioŋeta iuni arupepen, kobwaŋabwaŋata amoti, kitiŋata akalasia nuenokete kakaninikec nukokediany, ka arupepen kakaninikec nukoteten akusia: kiworoto ebe, “Ekileŋ loka EJAKAIT ka loka Gideen da.”

²¹ Kobwaata kesi ŋinituŋanan kaiboisike alukun iidukurun: koker ajore kere; kocelata, kitekerata kes.

²² Kokutata arupepen akwat auni, abu EJAKAIT koinak ekileŋ loka ŋinituŋanan aitiji oupake, ka ajore kere: koker ajore kiton Bet-sita loebei Serera, kiton oikor loka Abel-mekola, loidunyas kaTabat.

²³Kotukonokinos ituŋa luka Isirael kotoma Naputali, kotoma Aser, kotoma Manase kere da, kodapata Midian.

²⁴ Kijuka Gideon ikiyakia akwap kere nakiukon naka Epuraim, kobala ebe, “Kopotu asurokin Midian, kogeikis kes airum akipi, kiton Bet-bara, ka Yorodan da.” Kotukokinos ituŋa kere luka Epuraim, kirumata akipi kiton Bet-bara, ka Yorodan.

²⁵ Koyaŋaasi ikapolok iarei luka Midian, Oreb ka Seeb; koarakis Oreb moru Oreb, koarakis Seeb acues nakebino naka Seeb, kodapata Midian: koyaut akwes nuka Oreb ka Seeb mama ejai Gideon okekwa loka Yorodan.