Read Ateso Apukokino 11 Bible Online

Apukokino 11 - Ateso bible

Apukokino 11

¹ Aponi kainakin egada loeputosi bala ebela, kabala ebe, “Konyou, kitem eyekalu loka Edeke, ka etem, ka ŋul da luemaete kotomakeŋ.

² Konye alaro naejai kiŋa keyekalu, kinyek kokiŋa, mam itemi ŋin, naarai aponi koinakinai atekerin, ido icakacakaete kesi ere lokalaunan ilapio akaisaoŋon ka luarei.

³Ainakini da ikakajenak iarei edwarete apaarasia alukumit ka akwat aarei ka akaisakanykape, konapito ipukoi.”

⁴ Ŋul kes iseitunin iarei ka atalai aarei nuebwoete kakonyen nuka Ejakait loka akwap.

⁵ Arai ekoto ituŋanan aikonakin kes erono, elomuni akim kaitukekec, enyamari lukasurupokec; ido arai ekoto ituŋanan aikonakin kes erono, ibusakinit ŋes aario kwaŋin.

⁶ Ejai kes apedor agolokin akuj, kinyek akiru aitep apaarasia nuka aidwarakec, ejai kes apedor toma akipi aituluor kes aokot, ido ka aitican akwap kaiticaneta kere irwan nuipu kwape ekototor.

⁷ Ido kedaut aitejenunetekec ebuni etiaŋ loedokuni kaipany naemamei enaŋe aitiji kes, ipikori kes, eari da kes.

⁸ Ejaunos awatekec orot loka ere lokapolon loenyaritai kotoma omoyo Sodom ka Misiri, neebubukinitoi Ejakaitikec,

⁹Esesenete lukotuŋa, ka atekerin, ka aŋajepa, ka ajena awatekec apaarasia auni ka atutubet, komam ecamakinete awatekec anukio toma ailin.

¹⁰ Iyalamikinos luiboiete kotoma akwap kanukec, elelete, ijukanakinos bonik ainakineta, naarai apotu inabin ŋul luarei kisiriebata noi luiboiete kotoma akwap.

¹¹ Konye akaulo kapaarasia kakwa auni ka atutubet, koloma emoyo lokajaran loebuni kama ejai Edeke tomakec, kobwaata kakejekec, kodoik akurian naepol ŋul luapotu koanyutu kes.

¹² Kopuput eporoto loepol loabuni kotoma akuj, kobala kes ebe, “Kodokutu ne!” Kodokasi toma akuj; toma odou, kosesenete da lukasurupokec.

¹³ Kosawa kaŋol kojai amaran naepol naka akwap, kibiror atutubet nakitomonet naka ere; koarai ituŋa ilukumin ikanykaarei kotoma amaran ŋin naka akwap, kokuriakaros noi luasalito, kituritos do Edeke loka akuj.

¹⁴ Atuboros ican lukiareit; koany, eponito lukiwuniet atipet.

¹⁵ Kosodi kokut emalaika lokikanyetekaarei akerupepe, kojaas iporotoi luepolok toma akuj, kobalasi ebe, “Aluor ajakanut naka akwapin ajakanut naka Ejakaitiwok ka naka Kristoke, irumit ŋesi ikar ka ikar.”

¹⁶ Kibiroros imakio akaisaarei ka luoŋon ebuburia, luiboiete kakonyen nuka Edeke koicoloŋokec, komaata Edeke.

¹⁷ Kobalas ebe, “Kimalai jo Ejakait Edeke Lokapedor kere, Loejai, ido lokejai, Naarai ilem ijo akonipedor naepol, irumit da.

¹⁸ Konyunyurikinos atekerin, kobu da anyunyurakon, Ka apak da naka lukatwak atubokinio, Ka naka ainakin ikonibulesin inabin, ka lukalaunak, Ka ŋul da lueyoŋito ekonikiror, ludidik ka lukapolok, eropitikec, Ka naka amudiar da luemudiarete akwap.”

¹⁹ Kosodi koŋaarai eyekalu loka Edeke loejai toma akuj, kotakan asaduku naka aitutuketeke kotoma oyekaluke, kojau aimiliaunun, ka iporotoi, ka agiro, ka amaran naka akwap, ka akako da naepol.