Read Ateso Apukokino 13 Bible Online

Apukokino 13 - Ateso bible

Apukokino 13

¹ Abu kaany etiaŋ edokuni kaŋolol, ejaas amumwara atomon ka akwes akanykaarei, amumwarake da kojaas amekemeken atomon, akwesike da ikiroria luka ainyanakin.

² Koputosi da etiaŋ loabu kaany bala eris, ka akekeje da bala nuka edubu, akeituk da bala aituk naka eŋatuny. Abu apiu koinak ŋes akepedor, ka eicoloŋoke, ka apolou da naepol.

³ Kesubit adiopet kakwesike bala ebelitai aŋole naka atwanare, konye koŋaleu aŋole naka atwanare, kotupa akwap kere etiaŋ eumokinit.

⁴Komaata ituŋa apiu, naarai abu koinak etiaŋ apolou, komaata da etiaŋ, kobalas ebe, “Iŋai bo eputosi ketiaŋ kaŋol, iŋai bo da epedori aitiji ŋes?”

⁵ Aponi koinakinai etiaŋ aituk nainera akiro nuepolok ka nuka ainyanakin, aponi koinakinai da apolou aswam ilapio akaisaoŋon ka luarei.

⁶Kooŋ da akeituk ainyanakin Edeke, ainyanakin ekekiror, ka ewemake, kes luiboiete kotoma akuj.

⁷ Aponi koinakinai ŋes ejie ka lukalaunak, ka aipikor kes, koinakinai da apolou kama kaŋiniteker, ka ituŋa, ka aŋajep, ka ajena da.

⁸ Emaete ŋes ituŋa kere luiboiete kakwap, ŋin yenimam iwadikatai ekirorike oitabo loka aijar loka Imerekek yenaponi koarai, eriŋa epesikina apetetait naka akwap,

⁹Arai ejai yenejai akit, kopup:

¹⁰ Arai kijoreor ituŋanan, elosi aijoreorio, Arai kear ituŋanan kekileŋ, ibusakinit ŋes da aario kekileŋ, Ne ŋes ejai atitiŋikin ka aiyuun naka lukalaunak.

¹¹ Kasodi kaany etiaŋ ece elomuni kotoma akwap; ejaas amumwara aarei nueputosi bala imerekek, kinera kwape apiu,

¹²Kitwasam apolou kere naka etiaŋ losodit kakonyeneke. Koinak akwap ka luiboiete kotoma aima etiaŋ losodit, loaŋaleuni aŋoleke naka atwanare.

¹³ Iswamai ŋesi aanyuneta nuepolok, kiton aitodoun da akim abunore kotoma akuj, kiton akwap, kakonyen nuka ituŋa.

¹⁴ Itapaari da luiboiete kotoma akwap, kanuka aanyuneta nukeinakinitai ŋes aswam kakonyen nuka etiaŋ, elimokini luiboiete kotoma akwap aiswamakin etiaŋ ŋol aput, loaponi kobelitete kekileŋ, kojar.

¹⁵ Koinakinai ŋes aiyeŋakin eiyeŋane aput naka etiaŋ, tetere inera da aput naka etiaŋ, ka ainakin da ŋul kere lumam emaete aput naka etiaŋ aario.

¹⁶ Koinak ŋesi kere, ludidik ka lukapolok, lukabarak ka lukican, luijakakaete, ka ibulesin da, aibwaikinio emacar akanikec nakoteten, arai bo oreetakec,

¹⁷tetere emamei yenepedori agwel karaida agwelar dimikito ejai emacar, ŋes ekiror loka etiaŋ, arai bo aimwaus naka ekirorike.

¹⁸ Ne ŋes ejai acoa. Ŋin yenejai aijen, kimar aimwaus naka etiaŋ, naarai ŋes aimwaus naka ituŋanan. Aimwausike erai akwat akanykape ka akaisakanykape ka nukanykape.