Read Ateso Apukokino 15 Bible Online

Apukokino 15 - Ateso bible

Apukokino 15

¹ Kasodi kaany aanyunet ace naepol nakaumokin kotoma akuj, imalaikan ikanykaarei luejaas aiticaneta akanykaarei nukawasia, naarai kotomakec, ŋes enaŋia adedeŋ naka Edeke.

² Abu kaany ibore yenesubit bala aŋolol naka agilas nainyalakina akim, kobwoete da luepikorete etiaŋ ka aputoke, ka aimwaus da naka ekirorike, kodie kaŋolol naka agilas, kojaas kadeudeun nuka Edeke.

³ Koyeete da ekosio loka Musa ebulesit loka Edeke, ka ekosio da loka Imerekek, kobalas ebe, “Epolok aswamisiokon, ido nukaumokin da, Wu Ejakait Edeke Lokapedor kere! Edolito ikonirotin ido lukabeit da, Ijo ekabaka loka atekerin!

⁴ Wu Ejakait, iŋai bo yenimam kiyoŋit jo, Ka aitopoloorit da ekonikiror? Naarai ijo bon lokalaunan, Naarai epote atekerin kere, emaete da kakonyenekon, Naarai atakanut aswamisiokon nukadolit.”

⁵ Akaulo kaŋun abu kaany, koŋaarai eyekalu loka ewema loka aitejenunet kotoma akuj,

⁶ kolomut do imalaikan ikanykaarei luejaas aiticaneta akanykaarei kotoma oyekalu, konapito ebaputa loelai loimilia, koenito atorobosiokec amunyin nuka esabu.

⁷ Abu ediopet kotoma lukajarak luoŋon koinak imalaikan lukanykaarei atanyia akanykaarei nuka esabu, nuileleba adedeŋ naka Edeke loejari ikar ka ikar;

⁸ kilelebun da eyekalu apuru naebuni kotoma aibuses naka Edeke, kotoma apedorike da, komamei da yenepedori alomar oyekalu kiton neanaŋiata aiticaneta akanykaarei nuka imalaikan ikanykaarei.