Read Ateso Apukokino 17 Bible Online

Apukokino 17 - Ateso bible

Apukokino 17

¹ Kosodi kobu ediopet komalaikan ikanykaarei luajaas atanyia akanykaarei, kenerata keoŋ ebe, “Bia, ketodikini jo atubokinio naka naadote nakapolon naiboie kakipi nuipu,

² naadoteata ikabakan luka akwap, ka ŋul da luiboiete kotoma akwap amerikinos ebino loka adoteuke.”

³ Abu kadaka eoŋ modiŋ kotoma Omoyo; kaany da aberu iboie kotiaŋ loereŋ, loileleba ikiroria luka ainyanakin, kojaas akwes akanykaarei ka amumwara da atomon.

⁴ Konapit aberu anapito namuge ka nakareŋan kisiritete esabu ka amor nuka akais nuipu, ka ilulun, kojai aikopo naka esabu akanike, naileleba italesia, ka asilianut naka adoteuke;

⁵ iwadikatete da oreeteke ekiror loka aiyeiyea ebe: “Babulon lokapolon, toto naka nudotea, ka italesia da luka akwap.”

⁶ Abu kaany aberu ŋin emera aokot nuka lukalaunak ka aokot nuka ikajenak luka Yesu. Nakaanyunia ŋes abu kaumok aumokin naepol.

⁷Kabala emalaika eoŋ ebe, “Kanukinyo iwumokinitor? Kalimokini jo aiyeiyea naka aberu, ka naka etiaŋ loedakit ŋes, loejaas akwes akanykaarei, ka amumwara da atomon.

⁸ Kejai etiaŋ loibu koany, ido emamei, ido ebuni adokun kotoma aipany naemamei enaŋe, elosi da amudiario; eumokinete da ŋul luiboiete kotoma akwap, lumam iwadikatai ikiroriakec oitabo loka aijar ameun kapetetait naka akwap, naeanyuniata etiaŋ, naarai kejai, ido emamei, ido ejaun.

⁹ Ne ŋes ejai aijen naejai acoa: akwes akanykaarei kes iroŋan ikanykaarei, luiboikino aberu;

¹⁰eraas da ikabakan ikanykaarei, ebiroros ikany, ejai ediopet, eriŋa ece ebuno, ido naebunio ibusakinit ŋes asalakinit apak naedit.

¹¹ Etiaŋ da lokejai, ido emamei, erai ŋol lokikanyetekauni, konye erai lokokanykaarei, elosi da amudiario.

¹² Amumwara da atomon nuibu koany eraas ikabakan itomon lueriŋa edumuna ajakanut, konye edumunete apolou kwape ikabakan adaun esawa ediopet, nepepe ketiaŋ,

¹³Ejai kes ainerun adiopet, einakinete etiaŋ apedorikec ka apoloukec da.

¹⁴ Ejiosi ŋul ka Imerekek, ipikori Imerekek kes, naarai erai ŋesi Ejakait loka ijaka, ka Ekabaka da loka ikabakan, ŋul da luejaas kaŋes eraas luenyaritai, lueseunitai, ka lumunon da.”

¹⁵ Kabala ŋesi eoŋ ebe, “Akipi nuibu koany, kama iboio naadote, kes ituŋa ka ikodeta, ka atekerin ka aŋajepa.

¹⁶ Amumwara da atomon nuibu koany, ka etiaŋ, elaete kesi naadote; einakinete ŋes asilikinit, ka amujalal, enyamarete akuanake, icweikinete ŋes kakim,

¹⁷ naarai abu Edeke kibwaik otauonokec aswam naenerunit, ajaut kainerun adiopet, ka ainakin da etiaŋ ajakanutukec, aitodol naitodolere akiro nuka Edeke.

¹⁸ Aberu da naibu koany ŋes ere lokapolon loirumit ikabakan luka akwap.”