Read Ateso Apukokino 18 Bible Online

Apukokino 18 - Ateso bible

Apukokino 18

¹ Akaulo kaŋun abu kaany emalaika ece ijesuni kotoma akuj, ejai kapolou naepol; kitacau aibusesuke akwap.

² Kiworo keporoto loegogoŋ ebe, “Ebiror, ebiror Babulon lokapolon! Arau aibois naiboioto ajokin, Ka aidaris naka imoyon lueroko, Aidaris da naka ŋinikweny yenerono yenelaitai;

³ Naarai ebiroros atekerin kere kanuka ebino loka adedeŋ naka adoteuke, Adoteata da ikabakan luka akwap kaŋes, Abarata da ikagwelanarak luka akwap Kanuka agogoŋ naka eporoke.”

⁴ Kasodi keira eporoto ece ebuni kotoma akuj ebala ebe, “Ikatuŋa, kolomutu kotomakeŋ, Kinyeis aimorikikin kadiakanaretake, Kinyeis ainakinio aiticanetake;

⁵ Naarai iculul adiakanaretake kiton akuj, Eitu da Edeke amamus adoliteke.

⁶ Kotaca ŋes kwape atacia ŋesi, Kiyatakis ŋes irwan aarei kwape ejaatar aswamisioke: Toma aikopo naenyalia ŋesi, kinyalakis ŋes irwan aarei.

⁷ Kwape etopolooror bon, koporo da, Kwape kwaŋin koinakis ŋes aisiriebio noi ka akuudian, Naarai ebala kotauke ebe, ‘Eboie eoŋ kwape akabaka, Mam arai apuserut, mam cut aanyuni akuudian.’

⁸ Kanuka ŋun ŋes eponiata aiticanetake toma apaaran adiopet, Atwanare, ka akuudian, ka ebeli, Icweikinio cut kakim; Naarai egogoŋ Ejakait Edeke loetubokini ŋes.”

⁹ Emonyakinete ŋes, ibwololoete da ikabakan luka akwap luadoteata kaŋes ka eporo da, naeanyuniata apuru naka aicweioke;

¹⁰ kobwoete kama elwana, kanuka akurian naka aisiriebioke, kobalasi ebe, “Itukwi! Itukwi! Ere lokapolon, Babulon, ere lokapolon loegogoŋ! Naarai adolu atubokiniokon toma osawa ediopet.”

¹¹ Emonyete ikagwelanarak luka akwap, ekuudianete da kanukeŋ, naarai emamei bobo yenegweli igwelarakec,

¹² igwelara luka esabu, ka epuesa, ka amoru nuka akais nuipu, ka ilulun, ka ebaputa loejok, ka lomuge, ka aliri, ka lokareŋan, ka ŋolikitoi loeuru maa, ka ŋinibore kere yenika ikel luka itomei, ka ŋinibore kere yenika ekitoi loka akais nuipu noi, ka aikomon, ka asua, ka amor nuka ijesesinei,

¹³ akinomon, ka lueuru maa, ka emina, ka luesaete, ka lukisupurununo, ka ebino, ka akinyet, ka akiria nuicidie, ka eŋano, ka ibaren, ka amerekekin, ka ibalasin, ka agalin, ka ibulesin, ka aijar da naka ituŋa.

¹⁴“Araito da nuimiela ekonitau anyout mamakon, Iboro kere da luetarioko ka luimilias anyout kamakon, Komam bobo ituŋa edumunete kes!”

¹⁵ Ikagwelanarak iboro ŋul, luetabari ŋesi, ebwoete kama elwana, kanuka akurian naka aisiriebioke, komonyete ka akuudian, kobalasi ebe,

¹⁶ “Itukwi! Itukwi! Ere lokapolon, Loaponi kitanapai ebaputa loejok, ka lomuge ka lokareŋan, Kisiritete kesabu, ka amor nuka akais nuipu, ka ilulun da!

¹⁷ Naarai amudiar abar naetia nen kosawa ediopet.” Kobwoi da ŋolikapolon loka ataker, ka yenelosi aibois kere kotoma ataker, ka ikekwaŋak, ka ŋul kere da luiswamaete toma aŋolol, kobwoete kama elwana,

¹⁸ ido naaanyuniata apuru naka aicweioke, kiworoto ebe, “Inyo bo eputosi ka ere lokapolon?”

¹⁹ Kiwelanakis apua akwesikec, kiworoto emonyete ka akuudian ebe, “Itukwi! Itukwi! Ere lokapolon, Loetabari kere lukejaas atakerin toma aŋolol kanuka akaisike nuipu! Naarai amudiar kotoma osawa ediopet.

²⁰ Kiyalamikin kanukeŋ, ijo akuj, Ka yes lukalaunak, ka yes ikiyakia, ka yes da inabin, Naarai kitubok Edeke akirokus kamakeŋ!”

²¹ Kosodi kodak emalaika loegogoŋ amoru, kwape akukuse naepol, kocakak aŋolol cikil, kobala ebe, “Kwaŋin ecakakinere Babulon ere lokapolon, Kwabo mam bobo etakanuni.

²² Karaida eporoto loka ikaramak adeudeun, ka luejaas lueruosi, ka luekusete alamarun, ka luekusete arupepen, Mam epupunos bobo kotomakon. Karaida epirioit loka aswam kere, mam etakanuni bobo kotomakon; Karaida eporoto loka akukuse mam epupuni bobo kotomakon;

²³ Karaida aica naka atala, mam ecai bobo kotomakon; Karaida eporoto loka eteran ka ateran mam epupuni bobo kotomakon; Naarai keraas ikagwelanarakakon ikapolok luka akwap, Naarai toma ocudetekon ŋes eŋalaarere atekerin kere.

²⁴ Kotakanut da kotomake aokot nuka inabin ka nuka lukalaunak, Ka nuka ŋul kere luaario kotoma akwap.”