Read Ateso Apukokino 20 Bible Online

Apukokino 20 - Ateso bible

Apukokino 20

¹ Kasodi kaany emalaika ijesuni kotoma akuj, itiŋit elacetait loka aipany naemamei enaŋe, ka erikot da loepol kakanike.

² Kikam apiu, emun ŋol lokolosek, loerai Ekejodijodon ido Satan, koen ŋes adaun ikar elukumit,

³ kocakak ŋes aipany, kogolok, kipucak aipucet kujukeŋ, kinyek bobo aiŋalaŋal atekerin, aitodol naedaunotor ikar elukumit. Akaulo kaŋun ibusakinit ŋes aosikinio apak naedit.

⁴ Kasodi kaany iicoloŋo, kojaas lueboiete kotomakec, koinakinai kes aitub akiro. Kaany da aijar naka ŋul kaluajepanario akwesikec kanuka aitejenunet naka Yesu, ido kanuka akirot naka Edeke, ka ŋul da lumam apotu komaata etiaŋ, karaida aputoke, lumam edumunito emacar koreetakec karaida kakaninikec. Kojara, kirumata da nepepe ka Kristo ikar elukumit.

⁵ Luasalete luka lukatwak mam apotu kojara aitodol naedaunotor ikar elukumit. Ŋin ŋes ajarun nasodit.

⁶ Isirereŋitoi, ido erai yenikalaunan, yenejai akorakinet kotoma ajarun nasodit! Emamei atwanare nakiareit apolou kamakec, konye eraunos isasedotin luka Edeke ka luka Kristo, ido irumete nepepe kaŋes ikar elukumit.

⁷Kosodi naedaunotor ikar ŋul elukumit, eosikinio Satan kaidarisike,

⁸ elomuni da aiŋalaŋal atekerin nuejaas agoria aoŋon nuka akwap, Gog ka Magog, atukonokin kes kojie; etiaikec bala asine naka aŋolol.

⁹ Kodokut kalalau naka akwap, kirimorito iidukurun luka lukalaunak, ka ere da lominat; konye kijesun akim kotoma akuj, konyama kes.

¹⁰ Kocakakinai ekejodijodon loeŋalaŋalai kes aŋolol naka akim ka acukuman, nekejaas etiaŋ ka enabi lokeŋalan, isiriebio kes noi paaran ka kuare ikar ka ikar.

¹¹ Kasodi kaany eicoloŋ loepol loekwaŋ, ka ŋol da lokiboie kotoma; kokera akuj ka akwap kakonyeneke, mam bobo kes edumuna aibois.

¹² Kaany da lukatwak, lukapolok ka ludidik da, ebwoete koiŋaren keicoloŋ, kopukoroi iitabon. Kopukoroi eceitabo da, loerai loka aijar. Kotubokinai lukatwak kotoma ŋun kanuewadikatai oitabon kwape kejaatar aswamisiokec.

¹³ Kijaik aŋolol lukatwak lukejaas tomakeŋ, Atwanare da ka Okatwak kijaikis lukatwak lukejaas tomakec, kotubokinai da ŋinidiopet kwape kejaatar aswamisioke.

¹⁴ Kosodi kocakakinai Atwanare ka Okatwak aŋolol naka akim. Ŋin ŋes atwanare nakiareit, aŋolol naka akim.

¹⁵ Arai kedumun idiotuŋanan yenimam iwadikatai toma oitabo loka aijar, kocakakinai aŋolol naka akim.