Read Ateso Apukokino 3 Bible Online

Apukokino 3 - Ateso bible

Apukokino 3

¹ “Ido kiwadikak emalaika loka ekanisa lokotoma Sarudio ebe: Inera kwanata ŋol loejaas Imoyon ikanykaarei luka Edeke, ka aacer akanykaarei ebe: “Ajeni akoniswamisio; ebe ejai jo ekiror ebe ijari, konye irai lokatwan.

² Kokweny, kitogogoŋ da nuesalito nuekotosi atwakare, Naarai mam abu kadum akoniswamisio nuedolito kakonyen nuka Edekeka.

³ Aso kiitu kwape kijaunia, kwape kipupunio da; koric, kitoronikin da. Aso arai mam ikwenyi, abuni eoŋ kwape ekokolan, kwabo mam ijenuni esawa loabunio mamakon.

⁴ Konye ejaas jo ikiroria luikidioko koSarudio, ituŋa lumam emunaarito inapenekec; elosenenete kesi nepepe keoŋ enapito lukakwaŋak, naarai ibusakinito.

⁵ Ŋin yenipikori itanapio kwaŋin inapen lukakwaŋak, kwabo mam cut amwatari ekekiror koitabo loka aijar; eoŋ da alimori ekekiror kakonyen nuka Papaka, kakonyen da nuka imalaikanake.

⁶Ŋin yenejai akit, kopup nuelimokini Emoyo ikanisan.

⁷ “Ido kiwadikak emalaika loka ekanisa lokotoma Piladelupia ebe: Inera kwanata Lokalaunan, lokabeit, loejaas kelacet loka Daudi, loeŋaari kwabo emamei yenegoli, loegoli da kwabo emamei yeneŋaari, ebe:

⁸ “Ajeni akoniswamisio. Koany, ebwaiki kakonyenekon ekek loeŋaara, lomam epedori ituŋanan kere agolokin. Ejai jo apedor naedit, iricit da akakirot, kwabo mam ibu koŋer ekakiror.

⁹ Koany, ainakini lukatukos naka Satan, luenyaras bonik Iyudayan, kwabo mam eraas, konye iŋalaete; koany, ainakini kes aponare, akukonokin kakejenekon, ejenunete da ebe kamina jo.

¹⁰ Naarai iricit akakirot naka aŋirikinit, eoŋ da karici jo kotoma osawa loka aitemio, loebuni kakwapin kere, aitem ŋul luiboiete kakwap.

¹¹ Abuni eoŋ atipet; kikam yenijaatar, kinye ituŋanan kere ayaŋaar abokokon.

¹² Ŋin yenipikori, etarauni ŋes epir kotoma oyekalu loka Edekeka; kwabo mam cut elomari kiŋa; eoŋ da ewadikakini ŋes ekiror loka Edekeka, ekiror da loka ere loka Edekeka, ŋes Yerusalem lokitetet loijesuni abunore kotoma akuj; kama ka Edekeka, ekirorika da lokitetet.

¹³Ŋin yenejai akit, kopup nuelimokini Emoyo ikanisan.

¹⁴ “Ido kiwadikak emalaika loka ekanisa lokotoma Laodikia ebe: Inera kwanata ŋol loerai Amen, ekajenan lomunot lokabeit da, ageunet naka aisub naka Edeke ebe:

¹⁵ “Ajeni akoniswamisio, ebe mam ililim karaida mam imwana. Tiejok arai kolilim arai komwaŋa!

¹⁶Aso naarai ijalam, kwabo mam imwana karaida mam ililim, kalekari jo kaitukuka.

¹⁷ Naarai ibala ebe, Arai ekabaran, ido abarit, kwabo mam epuda ibore. Kwabo mam ijeni ebe irai lokican, lokitimitoi, loilwaritoi, emuduk, loimujalal da.

¹⁸ Aso ketetemikini jo ebe, kogwel kamakaŋ esabu loililiaunitai kakim, tetere ibari, ka inapen da lukakwaŋak tetere inapi, kinyeis ileic luka amujalalakon atakanun, ka ekiya da lokinyonyoa akonyekon tetere ikwenyi.

¹⁹ Etoroni eoŋ ŋul kere luamina, alecori da; aso kodunyak, kitoronikin da.

²⁰ Koany, abwoi kokek ekuŋukuŋi; arai epupi ituŋanan kere ekaporoto, koŋaa da ekek, alomari mamakeŋ, amori nepepe kaŋes, ŋes da keoŋ.

²¹ Ŋin yenipikori, ainakini ŋes aiboi nepepe keoŋ oicoloŋoka, kwape abu kepikoria keboikin nepepe ka Papaka oicoloŋoke.

²²Ŋin yenejai akit, kopup nuelimokini Emoyo ikanisan.”