Read Ateso Apukokino 7 Bible Online

Apukokino 7 - Ateso bible

Apukokino 7

¹ Akaulo kaŋun abu kaany imalaikan iwoŋon ebwoete kagoria aoŋon nuka akwap, itikokinete ikwamin luoŋon luka akwap, kinyek ekwam aikut akwap, karaida aŋolol, karaida okitoi kere,

²Kaany da emalaika ece ikeun kama elomunia akoloŋ, kejai aipucet naka Edeke lokajaran, kiworo mama ejaas imalaikan lukeinakinitai apedor amunaar akwap ka aŋolol da, keporoto loepol,

³ ebe, “Sirikimunaasi akwap, karaida aŋolol, karaida ikito, kiton nekidaunia aipucakin aipucet oreeta luka ibulesin luka Edekewok.”

⁴ Keira da etiai loka luepucakinitai emwaasi ilukumin akwatat ka akaisaoŋon ka luoŋon luepucakinitai, lukotoma ŋiniteker naka idwe luka Isirael.

⁵Luepucakinitai lukateker naka Yuda, ilukumin itomon ka luarei, lukateker naka Reuben, ilikumin itomon ka luarei, lukateker naka Gad, ilukumin itomon ka luarei,

⁶lukateker naka Aser, ilukumin itomon ka luarei, lukateker naka Naputali, ilukumin itomon ka luarei, lukateker naka Manase, ilukumin itomon ka luarei,

⁷lukateker naka Simeon, ilukumin itomon ka luarei, lukateker naka Lebi, ilukumin itomon ka luarei, lukateker naka Isakar, ilukumin itomon ka luarei,

⁸lukateker naka Sebulun, ilukumin itomon ka luarei, lukateker naka Yosep, ilukumin itomon ka luarei, lukateker da naka Benyamin, ilukumin itomon ka luarei.

⁹ Akaulo kaŋun abu kaany, ido koany, ekodet loepol noi, loemamei ituŋanan yenepedori aimar, ituŋa luka ŋinijena, ka luka atekerin, ka ituŋa, ka aŋajepa, ebwoete koiŋaren keicoloŋ, kakonyen da nuka Imerekek, itanapitai inapen lukakwaŋak, kitiŋito amusog kakaninikec,

¹⁰ kiworoete keporoto loepol ebe, “Ebeit Edekekosi loiboie koicoloŋ, ka Imerekek da aitajar!”

¹¹ Kobwoete imalaikan kere airimor eicoloŋ, ka imakio, ka lukajarak da luoŋon, kibiroros kesi ebuburia kiŋaren keicoloŋ, komaata Edeke,

¹²kobalas ebe, “Amen! Kojai arereŋ, ka aibuses, ka acoa, ka aimal, ka ayoŋio, ka apedor, ka agogoŋ mama ejai Edekekosi ikar ka ikar! Amen.”

¹³Koboŋok ediopet komakio, kalimok eoŋ ebe, “Lukaŋai bo lu, luitanapitai inapen lukakwaŋak, ai bo da keponiata kesi?”

¹⁴ Katema ŋes atiar, “Ekajakait, ijo ijeni.” Kabala ebe, “Lu kes lukepote kotoma aiticanio naepol, elota inapenekec, etwakaŋata kes kotoma aokot nuka Imerekek.

¹⁵ Kanuka ŋun ejaas kiŋaren keicoloŋ loka Edeke, Ijaanakinete paaran ka kuare kotoma oyekaluke; Ŋol da loiboie koicoloŋ, erapari kes kewemake.

¹⁶ Mam bobo eriebi kes eteŋei, karaida akure aijak, Mam bobo akoloŋ enomonori kes, karaida amwanis apeor.

¹⁷ Naarai icokiei kes Imerekek yenejai kidiŋ keicoloŋ, Iŋarenikini kes atanin nuka akipi nukajarak; Emwatari da Edeke akiyo kere kakonyenekec.”