Read Ateso Apukokino 9 Bible Online

Apukokino 9 - Ateso bible

Apukokino 9

¹ Kokut emalaika lokikanyet akerupepe, abu kaany da aacerit naebirun kakuj toma akwap, aponi koinakinai ŋes elacetait loka aipany naemamei enaŋeke.

² Kolaca aipany naemamei enaŋeke, kolom apuru kaipany, kwape apuru naka eupa loepol. Kitumuton apuru naalomuni kaipany akoloŋ ka apak da.

³ Kolom emaase kapuru toma akwap, aponi koinakinai ŋes apolou, kwape ejaatar ikiritona luka akwap apolou.

⁴ Aponi kolimokinai ŋes ebe mam emunaari anya nuka akwap, karaida ikiot kere yenepalal, karaida ekitoi kere, dimarai ituŋa bonik luemamei aipucet naka Edeke koreetakec;

⁵aponi koinakinai ŋes aisirieb kes noi, ilapio ikany, kwabo mere aiar kes; korai aisiriebeke kwape aisirieb naka ekiriton naekonyia ituŋanan.

⁶ Kapaarasia kaŋun da emoete ituŋa atwakare, konye mam edumunete, imielas atwakare, ekeri da atwanare kamakec.

⁷ Kotakan aput naka emaase bala ibalasin luisikapikinitai ejie, kakwesikec da kojaas nuesubito bala abokoi nuka esabu, koputosi akecekonyen bala akonyen nuka ituŋa.

⁸ Kejaas kes itima kwape itima luka aŋor, ikelakec da kwape ikel luka iŋatunyo,

⁹ kejaas kes iboro lukatorob, bala luka aswa, airurum da naka abebenokakec kerai kwape airurum naka agalin nuipu nuka ibalasin luekuboros ojie.

¹⁰Kejaas kes ikorio lueputosi ikiritona, ka itido, toma okoriokec ŋes ejai apedorikec aisirieb ituŋa ilapio ikany.

¹¹Kejai kes ekabakakec ŋes emalaika loka aipany naemamei enaŋe, ekekiror kAburanian Abadon, ka Ayonanin da ekekiror Apoluon.

¹² Atuboros ican lusodit; koany eriŋa eponito iarei akaulo kaŋun.

¹³ Kosodi kokut emalaika lokikanyetekape akerupepe, abu keira da eporoto loalomuni kamumwar aoŋon nuka etem loka esabu loejai akonyen nuka Edeke,

¹⁴ loalimokini emalaika lokikanyetekape, lokejai arupepe ebe, “Kolac imalaikan iwoŋon lueenitai kocor lokapolon Eupurate.”

¹⁵ Kolacakinai imalaikan iwoŋon luetemokinitoi esawa, ka apaaran, ka elap, ka ekaru da, tetere earete atutubet nakiwuniet naka ituŋa,

¹⁶Etiai loka ajoresio nuka ikebwanenok emwaasi ilukumin itomon irwan ilukumin itomon irwan aarei; abu kapup etiaikec.

¹⁷Ido abu kaany kotoma aitapoet kana ibalasin, ka ŋul da luebwanenito kwana ta: konapito iboro lukatorob bala luka akim, ka luka ebululu, ka luka acukuman; koputosi akwes nuka ibalasin bala akwes nuka iŋatunyo, kolom akim ka apuru ka acukuman kaitukekec.

¹⁸Apotu aiticaneta nu auni nualomunete kaitukekec koarata atutubet nakiwuniet naka ituŋa, kes akim, ka apuru, ka acukuman.

¹⁹Naarai ejai apedor naka ibalasin toma aitukekec, ido toma okoriokec; naarai eputosi ikoriokec bala imunwo, ejaas akwes, nuisiriebiata.

²⁰ Ituŋa ice kere da, lumam aponi koarai kotoma aiticaneta ŋun, mam apotu kitoronikinos kotoma aswamisio nuka akaninikec, ainyein aima ajokin, ka aputosia nuka esabu, ka epuesa, ka aikomon, ka amor, ka akito, numam epedorete aanyun, karaida aiirar, karaida alosit;

²¹ ido mam apotu kitoronikinos kotoma aiarakec, karaida kotoma ocudetekec, karai da kotoma adoteukec, karaida kotoma akokokec.