Read Ateso Rusi 3 Bible Online

Rusi 3 - Ateso bible

Rusi 3

¹ Abu Naomi tataake kotema ŋes ebe, “Akokuka, mam kamoikini neibworaria, tetere ijauni ejok?

² Emamei kereka Boas lokokekiwok lolem iboienenei ijo kabulesinike? Koany, epiesi esairi akuare na kopejal.

³ Aso kiloŋ kotuanar kakinyet, konap anapitokon, kijesar opejal; konye sirikitejenun mama ejai etuŋanan ŋol aitodol naedaunia ŋesi ainyam ka aimat.

⁴Kosodi naeperio, kojen aibois naeperi ŋesi, koloma ijo da kopuko akejeke koper; kilimokini ŋesi jo nuiswamai.”

⁵ Kotema ŋesi ebe, “Nuiner ijo kere eswamai.”

⁶Kosodi ŋesi aijesar opejal, kiswama kere kwape ajaatar nuecorakinit ŋes tataake.

⁷ Kosodi kedau Boas ainyam ka aimat, kolakar etauke, kolot apero ariri naka atukot naka akima: kobu ŋesi ecedi, kopuko akejeneke, koper.

⁸Kosodi kidiŋebai korieŋ etuŋanan, kibelokin; ido koany, aperi aberu kakejeneke.

⁹ Kotema ebe, “Iŋai bo ijo?” Koboŋok ŋesi ebe, “Eoŋ Rusi akonibulesit; aso kimukoo abulesitikon kanapitokon; naarai irai ekalakunanika.”

¹⁰ Kotema ŋes atiar, “Kisirereŋ EJAKAIT jo akokuka; itodu asianut naedeparit kosaŋe aitelekar nasodit, naarai mam itupanar itelepai, arai lukican arai ikabarak.

¹¹ Kwape kwana da, akokuka, sirikiyoŋ; keswamakini jo kere nuinera; naarai ejeni ere kere loka ikatuŋa kwape iraar aberu naijok.

¹² Erai teni abeit ebe arai eoŋ lokokekikon; konye ejai ece loeapie koinacane aitelekarit eoŋ.

¹³ Aso kosalak ne akuare na, kosodi kedol atupuruc arai kiiswamak ŋesi jo aswam naka ekalakunan, ejok; kiswamak do ŋesi jo aswam naka ekalakunan; konye do arai mam ecamuni aiswamakin jo aswam naka ekalakunan, ŋes do keswamakinia eoŋ jo aswam naka ekalakunan, kwape ejaria EJAKAIT. Koper aitodol tupuruc.”

¹⁴ Koper akejeneke aitodol tupuruc; konyou eroko yenice kejena yenice. Naarai abu kotema ebe, “Sirikejenun ebe abunit aberu na opejal.”

¹⁵Kotema atiar, “Koyau elou loimukor ijo, kitiŋ”: Kosodi ŋesi aitiŋ; kitemokinai aitemisio akanykape nuka esairi kisibwok ŋes; kolot ore.

¹⁶Kosodi kedol neejai tataake kotema atiar, “Iŋai bo ijo, akokuka?” Kolimok ŋes kere nuabu etuŋanan kiswamak ŋes.

¹⁷Kotema ŋesi ebe, “ŋes kainakini aitemisio nu akanykape nuka esairi; naarai abu kalimok ebe, ‘Mam ilosi neejai tataakon komamei ibore,’ ”

¹⁸Kosodi atemar ebe, “Kiboikin kopala akokuka, aitodol neijenunia neebearete akiro: naarai mam etuŋanan ŋol iyeŋuni aitodol naedaunia akirot na lolo.”