Read Ateso Rusi 4 Bible Online

Rusi 4 - Ateso bible

Rusi 4

¹ Kosodi Boas alosit orute, kiboikin ŋina; ido koany, kotubor ekalakunan ŋol loabu Boas kolimite; kotema ŋesi ŋol ebe, “ijo ba loce! Kopau ber kiboikin ne.” Kopaa kiboikin.

² Abu koya ikiliok itomon komakio lukore kotema kes ebe, “Kiboikinos ne.” Kiboikinos kesi da.

³Kotema ŋesi ekalakunan ebe, “Naomi naabu koboŋu anyoun akwap naka Moab egwelari alup nuaraas kolo nuka onacewok Elimelek:

⁴ Ido aomit eoŋ aitejenikin jo, kabala ebe, Kogwel kakonyen nuka ŋul kaluiboiete kane, akonyen da nuka imakio luka ituŋaka, Arai ikoto ailak, kolaku; konye arai mam ikoto alakun, aso bo kolimokinai, kajen: naarai emamei yenelakuni nabarai jo; eoŋ da ŋes katupit jo.” Kotema atiar, “Alakuni bo,”

⁵ Kosodi Boas atemar atiar, “Naigwelia amana kakan naka Naomi kibusakinit agwel Rusi da Amoabut, aberu naka lokatwan, aitoboŋikin airumeteke ekiror loka lokatwan.”

⁶ Kotema ekalakunan ŋol ebe, “Mam apedor alakun kanukaŋ, kenyek amunaun airumeteka: koyaŋa ijo ailakaka ŋin; naarai mam eoŋ apedori alakun.”

⁷ Lo da ŋes kerai epone loka alakun ka aisiec da kolo kasonya koIsirael, aitogogoŋ akiro kere; alacununei etuŋanan amukatake kosodi ainakin Iocetuŋanan; koraenena kwaŋin aitodunet koIsirael.

⁸Kosodi ekalakunan ŋol atemar Boas ebe, “Kogwel do ijo.” Kolac amukatake.

⁹Kotema Boas imakio ka ituŋa kere da ebe, “Iraas ikajenak lolo, agwel eoŋ lukolo araas luka Elimelek kere, ka luaraas luka Kilion ka luka Malon da, kakan naka Naomi.

¹⁰ Rusi da Amoabut apuserut naka Malon agwel eoŋ araun aberuka, aitoboŋikin airumeteke ekiror loka lokatwan, kinyek ekiror loka lokatwan aolior koinacanake, korute da loka aiboisitike: iraas yesi lolo ikajenak.”

¹¹ Kosodete ituŋa kere luajaas orute, ka imakio da atemar ebe, “Kirai isio ikajenak, Kituput EJAKAIT aberu naabu togokon kwape Rakel ka Lea nuapotu kesi aarei kodukoto ekek loka Isirael: kiswama ijo da nuibusak kotoma Epurat, kojenun kotoma Bet-lekem.

¹² Ekonikal da koraun bala ekal loka Peres loaurikini Tamar Yuda, kanuka aur nakiinakini EJAKAIT kotoma aberu na nakatumunan.”

¹³ Kosodi Boas ayaŋaar Rusi, koraun akeberu; koloma mamake, ido koinak EJAKAIT ŋes apotuun, kouru esapat.

¹⁴ Kobalas aŋor Naomi ebe, “Kituritete EJAKAIT, lomam kinyeinit jo lolo emamei ekalakunan, kojenun da ekirorike koIsirael.

¹⁵ Eraun ŋesi da kamakon eketeteunan aijar, ido eketanan kamojoŋukon; naarai ateranikon, nakimina ijo, naitelekarit idwe ikanykaarei lusap kajokis kamakon, ŋes auru ŋes.”

¹⁶Kosodi Naomi ayaŋaar ikoku, kotunak atorobuke, koraun akasaanike.

¹⁷ Apotu aŋor aidunyetake konerokis ekiror kineras ebe, “Aurikin Naomi ikoku yenisapat.” Komaikis ekekiror Obed: ŋol ŋes papa loka Yese, papa loka Daudi.

¹⁸ Na da ŋes aur naka Peres: Peres kouru Kesuron.

¹⁹Kesuron kouru Ram, Ram kouru Aminadab:

²⁰ Aminadab kouru Nason, Nason kouru Salumon;

²¹Salumon kouru Boas, Boas da kouru Obed;

²²Obed kouru Yese, Yese da kouru Daudi.