Read Ateso 1 Samuel 10 Bible Online

1 Samuel 10 - Ateso bible

1 Samuel 10

¹ Kosodi Samuel alemun ekube loka akinyet, kobukok akouke, konu ŋes, kotema atiar, “Mere kinyonyoik EJAKAIT jo akinyet araun ekapolon loiyait airumeteke?

² Nainyounio kaneajai eoŋ lolo, idumuni ituŋa iarei eiduny kates naka Rakel, koikor loka Benyamin ka Selusa; kilimokinete jo ebe, ‘Asigiria nuibu kolot aimo adumunos: ido koany, enyek papakon apod nuka asigiria epod jo ebe, “Ekwaikini ai kanuka okokuka?” ’

³ Ŋes do ilosio ijo kanen, idoli olua loka Tabor, iriamunos kituŋa iuni kaŋina luelosete mama ejai Edeke Bet-el, ibwokit ediopet ikalei iuni, ibwokit ece imugatin iuni, ka loce da ibwokit eriagi loka emukule loka ebino:

⁴ Kiyogaete jo, kiinakinete jo imugatin iarei; luijauni jo kakanikec.

⁵ Akaulo kaŋun ibuni ijo oukot loka EJAKAIT, neejai aibois naka iserikalen luka Ipilisitian; kosodi kanen naidolio jo ore, iriamunos kerioŋet loka inabin ijesunos kaibois naicelelei ejaas kesabuli, ka esimat, ka alamaru, ka adeudeu koiŋarenikec; ido kodwarete kesi:

⁶ Kidoikini jo emoyo loka EJAKAIT kagogoŋ, idwari da nepepe kakes, iluor ijo ecetuŋanan.

⁷ Kikoni nen, nakidoikiniata jo aanyuneta ŋun, iswamai nuibusakinit aswam; naarai ejai Edeke kajo.

⁸ Kiŋarenikini eoŋ alosit Giligal; ido koany, abuni mama ijai ainakin ainakineta nuicweio, ka asuban nuka ainakineta nuka ainapakin; idareuni apaarasia akanykaarei, aitodol neabunio, aitodikin jo nuiswamai.”

⁹Kikwaikis nen, naanyounio ŋesi kaneajai Samuel, abu Edeke koinak ŋes ecetau: kodoloto aanyuneta ŋun kere kapaaran kaŋin.

¹⁰ Kosodi kedolut oukot, koany, kiriamunos erioŋet loka inabin kaŋes; kodoik ŋes emoyo loka Edeke kagogoŋ, kodwar kakes.

¹¹ Kosodi kanen, keanyut lulem ajenete ŋes ebe koany, edwari nepepe kinabin, kotemanaros ituŋa ebe, “Inyo bo yen yenadoiki okoku loka Kis? Ejai Saul da onabin?”

¹² Koboŋok ediopet loka aibois kaŋin ebe, “Iŋai bo papakec?” Koraun do awaragan ebe, “Ejai Saul da onabin?”

¹³Kosodi kedau aidwar, kobu aibois naicelelei.

¹⁴ Kotema mamai loka Saul ŋes ka ekebulesit atiar, “Ai bo ipotu yesi koloto?” Kotema atiar, “Amoot asigiria: kosodi kiiany ebe mam apotu kodumunos, kapotu mama ejai Samuel.”

¹⁵Kotema mamai loka Saul atiar, “Keŋaiŋait kolimokinai nuabu Samuel kolimok jo.”

¹⁶Kotema Saul mamaike atiar, “Abu kolimok sio ebe adumunos asigiria.” Konye akirot naka ajakanut naabu Samuel kinerite, mam abu kolimok ŋes.

¹⁷ Konyarau Samuel ituŋa mama ejai EJAKAIT Misipa;

¹⁸ Kotema idwe luka Isirael atiar, “Inera kwanata EJAKAIT, Edeke loka Isirael ebe, ‘Abu ketolom Isirael koMisiri, kayu yes kakan naka Imisirian, kakan da naka ajakanuto kere nukimwaŋito yes’:

¹⁹ Konye iŋeroto lolo Edekekus, loabu kitajar yes katiokisiokus kere kocanikus da; ipotu kotemasi ŋes ebe, ‘Mam, konye koseikinai sio ekabaka.’ Aso do kitodiaros akonyen nuka EJAKAIT katekerinikus ka ilukuminikus.”

²⁰ Kisukuny do Samuel atekerin kere nuka Isirael, koseunai ateker naka Benyamin.

²¹Kisukuny ateker naka Benyamin kokekiakec, koseunai ekek loka Imaturin: kisukuny ekek loka Maturi ediopet ediopet; koseunai Saul okoku loka Kis; konye kemoata ŋes mam apotu kodumut.

²² Kanuka ŋun kiŋita bobo EJAKAIT ebe, “Ejai kereka etuŋanan loeroko kedoluno?” Koboŋok EJAKAIT ebe, “Koany, eŋopit koboro.”

²³Kokerata koomata ŋes kaŋina; kosodi kebwo ŋesi kotuŋa, aoja ŋesi adepar ituŋa kere ageun kokeperinike.

²⁴Kotema Samuel ituŋa kere atiar, “Ianyut yesi ŋol loaseu EJAKAIT, ebe emamei loeputotor kotuŋa kere?” Kiworoto ituŋa kere ebe, “Kidari Edeke ekabaka.”

²⁵ Kosodi Samuel alimokin ituŋa epone loka ajakanut, kiwadik oitabo, kibwaik akonyen nuka EJAKAIT, Kotwar Samuel ituŋa kere, ŋinituŋanan togoke.

²⁶Kolot Saul da togoke Gibea; kolototo ituŋa lukirigin luatirorit Edeke itauonokec kaŋes.

²⁷ Konye odwe luka Belial ice kotemasi atiar, “Ikwaikini ai etuŋanan lo kitajari oni?” Komenata ŋes, mam apotu koinut ainakinet. Konye kililiŋ ŋesi.