Read Ateso 1 Samuel 11 Bible Online

1 Samuel 11 - Ateso bible

1 Samuel 11

¹ Kosodi Nakas Emonait abunore, kidukur Yabes-gilead: apotu ituŋa kere luka Yabes kobalas Nakas ebe, “Kitutuk kasio, kejaanakisi jo.”

² Kotema Nakas Emonait kes atiar, “Kakirot kana ŋes etutukio kayes, ebe kogorunoi akusikonye nukoteten kere; kasodi eoŋ aitaraun ŋes amorosit koIsirael kere.”

³Kotemasi imakio luka Yabes ŋes atiar, “Koinakinai ber isio apaarasia akanykaarei, tetere kijukari ekiyakia oikorun kere luka Isirael: kosodi konyet, arai kemameun yenikitajari sio, kibuni mama ijai.”

⁴ Kopotu ikiyakia Gibea loka Saul, kolimokis ituŋa akiro ŋun: kodelosi ituŋa kere, komonyata.

⁵Ido koany, kobu Saul komanikor, etupit imoŋin; kotema Saul atiar, “Inyo bo isiriebi ituŋa tape emonyete?” Kolimokis ŋes akiro nuka ituŋa luka Yabes.

⁶ Kodoik emoyo loka Edeke Saul kagogoŋ nakepupunia akiro ŋun, kinep noi akenyunyura.

⁷ Koyau imoŋin iarei, kotubutub kijuka oikorun kere luka Isirael kakan naka ikiyakia, ebe, “Ŋinituŋanan yenimam etupit Saul ka Samuel iswamakinio kwaŋin ikemoŋin.” Kodoik ituŋa akurian EJAKAIT, kopotu bala idiopetuŋanan.

⁸ Kimara kes koBesek; emwaasi idwe luka Isirael ilukumin akwat auni, ka ituŋa luka Yuda ilukumin akaisauni.

⁹Kotemasi kesi ikiyakia luapote atiar, “Ilimokinete kwanata ituŋa luka Yabes-gilead ebe, ‘Moi, kapak naemwaniar akoloŋ, kiyuunio.’ ” Kopotu ikiyakia kolimokis ituŋa luka Yabes; kiyalamikinos.

¹⁰Kanuka ŋun kotemasi ituŋa luka Yabes atiar, “Kibuni moi mama ijai, kiswamakini isio kere nuitojokit ijo.”

¹¹ Kojaun kwaŋin tupuruc, kitemok Saul ituŋa orioŋeta iuni; kopotu kidiŋ kiidukurun kakwenyunet naka tupuruc, kodanyata Imonain aitodol amwanis naka apaaran: kosodi kanen kisiarakinos luapotu kideunos, komam iarei kakesi esalete nepepe.

¹² Kotemasi ituŋa Samuel atiar, “Iŋai bo ŋol loabala ebe, ‘Kiyai kereka Saul sio?’ Koyau ituŋa ŋul, kaarata kes.”

¹³ Kotema Saul atiar, “Mam lolo eario idio tuŋanan: naarai ayu lolo EJAKAIT Isirael.”

¹⁴ Kosodi Samuel atemar ituŋa atiar, “Kopotu kaloto Giligal, keteteutu ajakanut kaŋina.”

¹⁵Koloto ituŋa kere Giligal; kodakakis Saul araun ekabaka kakonyen nuka EJAKAIT koGiligal; koinakis da kaŋina asuban nuka ainakineta nuka ainapakin kakonyen nuka EJAKAIT: kiyalamikini noi Saul ka ituŋa kere luka Isirael kaŋina.