Read Ateso 1 Samuel 12 Bible Online

1 Samuel 12 - Ateso bible

1 Samuel 12

¹ Kotema Samuel Isirael kere atiar, “Koany, eira ekusiporoto kanuibalasi eoŋ kere, kaseik da ekabaka ayait yes.

² Kwana da, koany, elosi ekabaka kakonyenekus: eoŋ da amojoŋ abwaŋut akorwo, ido koany, odweka ejaas kayes: abu kalosenenei kakonyenekus ameun keiditeuka kiton lolo.

³ Eoŋ lo: kolimoroi kakonyen nuka EJAKAIT, kakonyen da nuka lokinyonyoikitonoke akinyet: iŋai ca ademarit ekemoŋ? Arai iŋai ademarit akesigiria? Arai iŋai arodit luke? Iŋai abu kareite? Arai iŋai abu kedaudau lukitumudakete akakonye? Eoŋ da katacakini yes.”

⁴Kobalas ebe, “Mam irodit lukosi, kwabo mam kireit, kwabo mam ilemarit imodiobore kakan naka idiotuŋanan kere.”

⁵ Kotema kes atiar, “EJAKAIT ŋes ekajenan kamakus, ka lokinyonyoikitonoke akinyet da ŋes ekajenan lolo, kwape mam yes idumunitotor ibore kakanika.” Kobalas ebe, “Ŋes ekajenan.”

⁶ Kotema Samuel ituŋa atiar, “Ŋes EJAKAIT loebwaikini Musa ka Aaron ido loetonyouni lukapapaakus kakwap nako Misiri.

⁷ Aso kwana kobwaata, tetere kipuri kayes kakonyen nuka EJAKAIT, kanuka aswamisio kere nuedolito nuka EJAKAIT, nukiswamakini yes ka lukapapaakus.

⁸ Nakedolio Yakob Misiri, komonyakis lukapapaakus EJAKAIT, kosodi kijuka EJAKAIT Musa ka Aaron, luetonyounete lukapapaakus koMisiri, kisiboikis aibois na.

⁹ Konye kimurwokis kes EJAKAIT Ekecedeke, kogwela kes akan naka Sisera lokapolon loka ajore naka Kasor, ido kakan naka Ipilisitian, kakan da naka ekabaka loka Moab, kojioto kakes.

¹⁰ Komonyakis EJAKAIT, kobalas ebe, ‘Kipou kadiakata, naarai kipou kenyeisi EJAKAIT, kejaanakis Ibaalin ka Asitarot: konye kwana koyuunai kakan naka lukasurupokosi, kasodete aijaanakin jo.’

¹¹ Kijukak EJAKAIT Yerubaal, ka Bedan, ka Yeputa, ka Samuel, koyu yes kakan naka lukasurupokus kariino kere, kiboikinos inapakina.

¹² Naianyuniata kiisurok Nakas ekabaka loka idwe luka Amon, ipotu kotemasi eoŋ atiar, ‘Mam, konye ekabaka ŋes kirumi sio’: kwabo EJAKAIT Ekusideke kerai Ekusikabaka.

¹³ Aso do kosesenata ekabaka loipotu koseut, loipotu kilipata: ido koany, kiinak EJAKAIT yes ekabaka.

¹⁴ Arai iyoŋito EJAKAIT kijaanakinete, kopupenenete ekeporoto, kwabo mam ipaliikinete aicorakinet naka EJAKAIT, yes ka ekabaka da lokirumit kotupenenete EJAKAIT Ekusideke, aso:

¹⁵ Konye arai mam ipupenenete eporoto loka EJAKAIT, kipaliikis aicorakinet naka EJAKAIT, ŋes itusurupio akan naka EJAKAIT yes, kwape etusurupio kolo lukapapaakus.

¹⁶Aso do, kobwaata, koanyut akirot na nakos, naiswamai EJAKAIT kakonyenekus.

¹⁷ Mere lolo asaket naka akima? Elipi EJAKAIT koyaŋau eires ka akiru; kojenut yesi koanyut kwape epoloor akusironis, naipotu kiswamata kakonyen nuka EJAKAIT, ailip ekabaka.”

¹⁸ Kosodi Samuel ailip EJAKAIT: koyaŋau EJAKAIT eires ka akiru kapaaran kaŋin; koyoŋata noi ituŋa kere EJAKAIT ka Samuel da.

¹⁹ Kotemasi ituŋa kere Samuel atiar, “Kilipak ikonibulesin kama ejai EJAKAIT Ekonideke, kenyeis atwakare; naarai kiyataki adiakanaretakosi kere karonis kana, ailipun ekabaka.”

²⁰Kolimok Samuel ituŋa ebe, “Sirikiyoŋa: abeit ipotu kiswamata aronis na kere: konye sirikipaasi ainyein atupenen EJAKAIT, konye kijaanakis EJAKAIT kikusitauon kere:

²¹ Sirikipaasi: naarai ti ŋes atupar aamameak, numam ajokis karaida ayuun, naarai eraas nuutaai.

²² Naarai mam ejalakin EJAKAIT iketuŋa kanuka ekekiror lokos: naarai kitojok EJAKAIT aituluor yes ateker kanukeŋ.

²³ Ido kanukaŋ, madi akuj eoŋ aidiak kama ka EJAKAIT ainyein ailipanakin yes: konye ketuutoori yes erot lokajokan loitenara.

²⁴ Konye koyoŋito EJAKAIT bon, kijaanakinete kotoma abeit kikusitauon kere: kiitununete akiro kwape eraatar nukos nukiswamanakini yes.

²⁵ Konye arai Iriŋa iyatanakinete aswam nueroko imudiaros yes kere ka ekusikabaka da.”