Read Ateso 1 Samuel 14 Bible Online

1 Samuel 14 - Ateso bible

1 Samuel 14

¹Kosodi adiopepaaran abu Yonatan okoku loka Saul kotema ekatumunan loadakit lujiisike atiar, “Kobia kaloto mama ejaas iserikalen luka Ipilisitian, luejaas owai je.” Konye mam abu kolimok papake.

² Kiboikin Saul atutubet nakosaŋe naka Gibea kwap kekamamaga, loejai Miguron: emwaasi ituŋa luajaas kaŋes kwape akwat akanykape.

³ Abu Akiya okoku loka Akitub, onace loka Ikabod, okoku loka Pinekas, okoku loka Eli, esasedoti loka EJAKAIT koSilo konapite epod. Mam apotu ituŋa kojenut ebe alot Yonatan.

⁴ Kidiŋ karidana, nuakoto Yonatan aitor alosit mama ejaas iserikalen luka Ipilisitian, ajai emoru osiep ediopet ka emoru osiep ece da: ekiror loka ediopet ŋes Boses, ka ekiror loka ece da ŋes Sene.

⁵Ajai ediopemoru ari naka agolitomei kiŋaren kaMikimas, loce da ari naka eŋalakimak iŋaren keGeba.

⁶ Kotema Yonatan ekatumunan loadakit lujiisike atiar, “Kobia kaloto mama ejaas iserikalen luka lu lumam ekepitai: diatiswamai EJAKAIT kaoni: naarai emamei yenitikokini EJAKAIT aitajar kaluipu arai kaluikidioko.”

⁷Kobala loadakit lujiisike atiar, “Kiswama kere nuejaas otaukon: koany, ajai eoŋ nepepe kajo, kwape ejaar ekonitau ŋes ejaar lokaŋ da.”

⁸Kosodi Yonatan atemar atiar, “Koany, kilosi mama ejaas ituŋa, kasodete aitodiar kamakec.

⁹Arai kiitemasi kesi oni atiar, ‘Kidareutu aitodol nakibunio mamakus’; ŋes kisalakinia aiboisiwok, mam da kidokari mamakec.

¹⁰ Konye arai ketemasi atiar, ‘Kodokutu mamakosi’; ŋes do kidokaria: naarai ijaikini EJAKAIT kes akaniwok: eraun ŋin aanyunet kamawok.”

¹¹Kosodete kesi iarei aitodiar oserikalen luka Ipilisitian: kotemasi Ipilisitian atiar, “Koany, alomut Iburanian kapanya kanuaŋopitotor.”

¹²Koboŋokis iserikalen Yonatan ka loadakit lujiisike ebe, “Kodokutu mamakosi, kitodikini isio yes ibore.” Kotema Yonatan loadakit lujiisike atiar, “Kodok, kotupunai: naarai ejaiki EJAKAIT kes akan naka Isirael.”

¹³Kodoka Yonatan kuju eliat kakanin ka akeje, kotupite ŋes loadakit lujiisike: kibiroros kesi kakonyen nuka Yonatan; komeete loadakit lujiisike aiar kes.

¹⁴Earit ŋol losodit loaarete Yonatan ka loadakit lujiisike emwaasi ituŋa akaisaarei, katutubet naedit noi kosubite bala epelu lokamana.

¹⁵ Kojau amaran naepol oidukurun, omanikor, otuŋa da kere, iserikalen, ka ikaŋatak da apotu komaranata: komaran akwap, kwaŋin kojaun amaran naepol noi.

¹⁶Kiteoto ikedarak luka Saul koGibea loka Benyamin; ido koany, kidior atukot, kisiarakinos ŋiniibois.

¹⁷Kosodi Saul alimokin ituŋa luajaas kaŋes atiar, “Aso kimara, koanyut yenelosit kamawok.” Kosodete kimarata, ido koany, amameete kanen Yonatan ka luadakit lujiisike.

¹⁸Kotema Saul Akiya atiar, “Koyau asaduku naka Edeke ne.” Naarai ajai asaduku naka Edeke kidwe luka Isirael kapak kaŋin.

¹⁹ Kosodi kanen ineras Saul ka esasedoti, kiyatakin noi ecelet loajai oidukurun luka Ipilisitian; kotema Saul esasedoti atiar, “Kolema akonikan.”

²⁰ Kotukokinos Saul ka ituŋa kere luajaas kaŋes, kopotu ojie: ido koany, abu ekileŋ loka ŋinituŋanan koluik yeniceke, kojaun aiyaloŋoŋ naepol noi.

²¹Iburanian luajaas lem ka Ipilisitian, lualosete kakes oidukurun kakwap naalukunit; apotu ŋul kibelooros mama ajaas Isiraelin luajaas ka Saul ka Yonatan.

²² Kwape kwaŋin da ituŋa kere luka Isirael luaŋopitos kakwap nakiukon naka Epuraim, kepuput ebe akera Ipilisitian, apotu kesi da kodapata kes noi kojie.

²³ Kitajar EJAKAIT Isirael kapaaran kaŋin: kotubor ejie Bet-aben.

²⁴ Kiyaloŋoŋoto ituŋa luka Isirael kapaaran kaŋin; konye kicorak Saul ituŋa ebe, “Kikenoi etuŋanan loenyami idionyamat kere eroko atiboŋ, kenyaŋa eoŋ da lukasurupoka.” Mam do ediotuŋanan loabu kiir inyamat.

²⁵ Kopotu ituŋa kere amagoro; kojai esik kwap.

²⁶Kosodi kedolut ituŋa amagoro, koany, koitunun esik: konye mam ediotuŋanan loabu kibwaik akan aitukuke; naarai ayoŋito ituŋa aiyaposit.

²⁷Konye mam Yonatan abu kopup naecorakinia papake ituŋa aiyaposit: ŋes edomakinia ebela loetiŋit ŋesi akape nuka esik, kosodi aibwaikin akekan aitukuke; kolakaros akekonyen.

²⁸Kosodi ediopet kotuŋa aboŋokin ebe, “Abu papakon kicorak ituŋa aiyaposit ebe, ‘Kikenoi etuŋanan loenyami inyamat apaaran naka lolo.’ ” Kilworunos ituŋa.

²⁹Kotema Yonatan atiar, “Etican papaka akwap: keŋaiŋait, koany, kwape alakarotor akonyeneka, naarai abu eoŋ keir edio kosik kalo.

³⁰Mere tiejok noi arai kenyamito ituŋa lolo luŋatuna luka lukasurupokec luapotu kodumut? Naarai emamei lolo earit loepol koPilisitian.”

³¹Kodanyata luka Ipilisitian kapaaran kaŋin anyoun koMikimas kiton Aiyalon: kilworunos ituŋa noi.

³² Kokerata ituŋa oŋatan, kolemut amerekekin, ka imoŋin, ka itak, koarakis kes kwap: konyamata ituŋa kes kaokot da.

³³ Kosodete kesi alimokin Saul ebe, “Koany, adiakasi ituŋa kama ejai EJAKAIT, naarai enyamete kaokot da.” Kotema atiar, “Ibilata ebotet, kikokorikinoi amoru naepol neajai lolo.”

³⁴Kotema Saul atiar, “Kisiararos yesi otuŋa, kotemasi kes atiar, ‘Koyau ŋinituŋanan ekemoŋ, ka ŋinituŋanan akemerekek, koarakis ne, konyamata; kinyeis adiakar kama ejai EJAKAIT kanuka ainyam kaokot.’ ”

³⁵ Koyaut ituŋa kere akuare ŋin ŋinituŋanan ekemoŋ, koarakis nen as Kodukok Saul EJAKAIT etem: ŋopeŋol ŋes arai etem losodit loadukokini ŋesi EJAKAIT.

³⁶ Kotema Saul atiar, “Kadumasi Ipilisitian kuare, kaŋatata kes kiton tupuruc, komam kideuni ediotuŋanan kakesi.” Kotemasi atiar, “Kiswama kere nuitojokit ijo.” Kosodi esasedoti atemar ebe, “Aso kekunyakisi neejai Edeke.”

³⁷ Kiŋit Saul Edeke atiar, “Adumari eoŋ Ipilisitian? ijaikini kereka ijo kes akan naka Isirael?” Konye mam abu Koboŋok ŋes kapaaran kaŋin.

³⁸ Kotema Saul atiar, “Kikunyutu ne, yes kere ijaka luka ituŋa: kojenut koanyut da neajai adiakaret lolo.

³⁹ Naarai kwape ejaria EJAKAIT, loitajari Isirael, karaida kejaun toma okokuka Yonatan, abeit etwani.” Konye komameu kotuŋa etuŋanan loabu Koboŋok ŋes.

⁴⁰Kosodi ŋesi atemar Isirael kere ebe, “Kojaunos yesi owai ediopet, eoŋ da ka okokuka Yonatan kijaun ecewai.” Kotemasi ituŋa Saul atiar, “Kiswama nuitojokit ijo.”

⁴¹ Kanuka ŋun kotema Saul EJAKAIT, Edeke loka Isirael atiar, “Kitodu abeit.” Korounai Saul ka Yonatan: konye kokuata ituŋa.

⁴²Kotema Saul atiar, “Kilamilamakinai eoŋ ka Yonatan okokuka.” Korounai Yonatan.

⁴³ Kosodi Saul atemar Yonatan atiar, “Kolimokinai nuiswamat.” Kolimok Yonatan ŋes ebe, “Abeit abu eoŋ keir ediosik kobela kaloetiŋit eoŋ: ido koany, kebusakinit atwanare.”

⁴⁴ Kosodi Saul atemar atiar, “Kiswama Edeke kwaŋin ka adepar da; naarai abeit itwani, Yonatan.”

⁴⁵ Kotemasi ituŋa Saul atiar, “Etwani kereka Yonatan, loeswamau aitajario na naepol mama ejai Isirael? Madi akuj: kwape ejaria EJAKAIT, mam ediotimat loka akouke edoi alup, naarai eswamata ka Edeke kapaaran naka lolo.” Kwaŋin kolakut ituŋa Yonatan, tape mam etwani.

⁴⁶Koboŋ Saul katupit Ipilisitian, kolototo Ipilisitian aiboisiokec.

⁴⁷ Kosodi napekirumia Saul Isirael, abu kitiji lukasurupoke kosiepion kere, Moab, idwe luka Amon, ka Edom, ka ikabakan luka Soba, ka Ipilisitian da: ido luasuronokini ŋesi kere abu kipikonor.

⁴⁸ Abu kiswama nukatitiŋ, kodany Imalekain, abu da koyu Isirael kakan naka ŋul kaluaŋasenenete kes.

⁴⁹ Odwe luka Saul kes Yonatan, ka Isibi ka Maliki-sua: ka ikiroria luka adweke aarei kes luta: ekiror loka akiyai Merab, ka ekiror loka nadidi Mikal:

⁵⁰Ekiror loka aberu naka Saul arai Akinoam akoku naka Akimaas: ka ekiror loka ekapolon loka erioŋeteke kerai Abiner okoku loka Ner, mamai loka Saul.

⁵¹ Kis ŋes papake loka Saul; Ner papa loka Abiner kerai okoku loka Abiel.

⁵² Apaarasia kere nuka Saul ajaas ijiisio luadedeŋ noi kidiŋikec ka Ipilisitian: kosodi naanyununia Saul ediotuŋanan lokirigi arai ediotuŋanan lokatitiŋ, ayaŋaanari ŋol mamake.