Read Ateso 1 Samuel 15 Bible Online

1 Samuel 15 - Ateso bible

1 Samuel 15

¹ Kotema Samuel Saul atiar, “Abu EJAKAIT kejuk eoŋ ainyonyoikin jo akinyet araun ekabaka loiyait iketuŋa, Isirael: aso do, kopupok eporoto loka akiro nuka EJAKAIT.

² Ebala kwanata EJAKAIT loka ajoresio ebe, ‘Eteu eoŋ Amalek kanuka nuabu ŋesi kiswamak Isirael, kwape abu kobwoikinia ŋes korot naabunio koMisiri.

³ Aso do kolot kodany Amalek, komudia kere luejaatar kesi, komam ideunete kes, koarata kere, ikiliok ka aŋor da, imukerun ka luenakete, imoŋin ka amerekekin, akaalai ka asigiria da.’ ”

⁴ Kosodi Saul atukokin ituŋa, kimar kes koTelaim, ituŋa ilukumin akwat aarei luelosete akeje, ka ituŋa luka Yuda ilukumin itomon.

⁵Kobu Saul ore loka Amalek, kosodete koperut kaditot.

⁶ Kotema Saul Ikenin atiar, “Koloto, konyoutu, konyoutu komalekain, kenyek amudiar yes kakes: naarai ipotu kosiakata mama ejaas idwe luka Isirael, naaponiata koMisiri,” Kwaŋin konyout Ikenin komalekain.

⁷ Kodany Saul Imalekain, anyoun koKabila bala ilosi Sur, loejai kiŋaren nako Misiri.

⁸ Kikama Agag ekabaka loka Imalekain ejari, komudia cut ituŋa kere kakwanis naka ekileŋ.

⁹ Konye Saul ka ituŋa kideut Agag, ka luetelekarito ajokis kamerekekin, komoŋin, ka luetumito, ka imerekekin ludidik, ka luajokak kere, komam emudiarete kes cut: konye ibore kere yenarono ka yenamam ajokis, ŋes apotu kesi komudiasi.

¹⁰Kosodi akirot naka EJAKAIT abunore mama ejai Samuel ebe,

¹¹ “Eitu eoŋ kanu naarai abu kadakak Saul araun ekabaka: naarai aboŋo kau enyeki atupit eoŋ, ido mam iswamat akaicorakineta.” Konyunyurikin Samuel; komony mama ejai EJAKAIT akuare kia.

¹² Kodilok Samuel anyoun airiamun ka Saul tupuruc; kolimokinai Samuel ebe, abu Saul kobu Karamel, ido koany, abu kosipok aiitunet, ido alot, atubor, abea Giligal.

¹³ Kobu Samuel mama ejai Saul: kotema Saul ŋes atiar, “Kisirereŋ EJAKAIT jo: eswama eoŋ aicorakinet naka EJAKAIT.”

¹⁴Kotema Samuel atiar, “Inyo bo do apolou naka aruo na naka amerekekin naapupi kakiika, ka eikun loapupi loka imoŋin?”

¹⁵ Kotema Saul atiar, “Ayaunio kes kama kImalekain: naarai apotu ituŋa kideut luetelekarito ajokis kamerekekin komoŋin da, ainakinia EJAKAIT Edekekon asuban; ido luce kere kimudia isio cut.”

¹⁶Kosodi Samuel atemar Saul atiar, “Ijo ber, kalimok jo nuabu EJAKAIT kalimok eoŋ akuare na.” Kotema ŋes atiar, “Aso kiner.”

¹⁷Kotema Samuel atiar, “Karaida kirai ijo lokidite kakonyenekon mam aponi kodakakin apolokinit atekerin nuka Isirael? Kinyonyoik da EJAKAIT jo akinyet araun ekabaka loiyait Isirael;

¹⁸Kosodi EJAKAIT aijukar jo alosit, kobala ebe, ‘Aso kolot komudia cut ikadiakanarak kes Imalekain, kitiji kes aitodol naimudiaria kere.’

¹⁹Kanukinyo do mam jo ibu korimaria eporoto loka EJAKAIT, konye ibu kokerik luŋatan kiswama nueroko kakonyen nuka EJAKAIT?”

²⁰Kotema Saul Samuel atiar, “Eebo, abu eoŋ karima eporoto loka EJAKAIT, alot da alosit naabu EJAKAIT kejukak eoŋ, kayau da Agag ekabaka loka Amalek; amudia cut Imalekain.

²¹Konye apotu ituŋa kolemut iŋatan, amerekekin ka imoŋin, luepolok koboro luagitaritai, ainakinia asuban mama ejai EJAKAIT Ekonideke koGiligal.”

²² Kotema Samuel atiar, “Isiyalamikinit kereka EJAKAIT ainakineta nuicweio ka asuban kwape isiyalamikinitor arimarit eporoto loka EJAKAIT? Koany, arimar itelekarit asubanit, Ka aipup da edeparit asiepai nuka imerekekin.

²³ Naarai epali esubit bala adiakaret naka aidwar, Ka aninik bala aputosia nuegerer ka iterapim. Naarai iŋer ijo akirot naka EJAKAIT, Kiner ŋesi da jo araut ekabaka.”

²⁴ Kotema Saul Samuel atiar, “Abu kadiaka; naarai ebuca aicorakinet naka EJAKAIT, ka akirokon: naarai abu kayoŋ ituŋa, kasodi arimar ekeceporoto.

²⁵Kanuka ŋun, keŋaiŋait, kitim akadiakaret, kibelokin bobo nepepe keoŋ, tetere amai EJAKAIT.”

²⁶ Kotema Samuel Saul atiar, “Mam eoŋ kiboŋori kajo, naarai iŋer ijo akirot naka, EJAKAIT: EJAKAIT da kiŋer jo araut ekabaka loiyait Isirael.”

²⁷ Kosodi napibelokin Samuel alosit, abu kitiŋ ekekaso, kocila.

²⁸Kotema Samuel ŋes atiar, “Acila EJAKAIT ajakanut naka Isirael kamakon lolo, ainaki da ŋes eidunyetekon, loejok adepar jo.

²⁹ Bobo da Agogoŋ naka Isirael mam iŋalai karaida aitoronikin: naarai mam ŋes erai etuŋanan tape itoronikin.”

³⁰ Kosodi ŋesi atemar atiar, “Abu kadiaka: konye keŋaiŋait, kitubusai kakonyen nuka imakio luka ikatuŋa, kakonyen nuka Isirael, kibelokin bobo nepepe keoŋ, tetere amai EJAKAIT Ekonideke.”

³¹Kibelokin do Samuel aupar kaSaul: koma Saul EJAKAIT.

³²Kosodi Samuel atemar ebe, “Koinunai Agag ekabaka loka Imalekain.” Kobu Agag mama ejai ŋesi esoga. Kobala Agag ebe, “Abeit atubor apipil naka atwanare.”

³³ Kotema Samuel atiar, “Kwape abu ekonikileŋ kitasalia aŋor emameete idwe, kwaŋin esalia totokon da emamei ikoku kaŋor.” Kojepejep Samuel Agag kakonyen nuka EJAKAIT koGiliga!.

³⁴ Kosodi Samuel alosit Rama; kolot Saul togoke Gibea loka Saul.

³⁵Mam bobo Samuel abu kobu aanyun Saul aitodol apaaran naatwania; konye komony Samuel kanuka Saul: kiitu EJAKAIT kanu naarai abu kodakak Saul araun ekabaka ayait Isirael.