Read Ateso 1 Samuel 16 Bible Online

1 Samuel 16 - Ateso bible

1 Samuel 16

¹ Kotema EJAKAIT Samuel atiar, “Itodol ai imonyi kanuka Saul, naarai aŋer eoŋ ŋes araut ekabaka loka Isirael? Kileleb akinyet amumwaratakon, kolot, kejukari jo mama ejai Yese Ebetelekemit: naarai adum ekabaka kodweke.”

² Kotema Samuel atiar, “Ekwaikini ai alosi? Arai kiira Saul, kaari eoŋ.” Kotema EJAKAIT atiar, “Koyaŋa ataok, kiner atiar, ‘Abunit ainakin EJAKAIT asuban.’

³ Konyarau Yese kobu asuban, ketodikini jo nuiswamai: inyonyoikini akinyet ŋol lokalimokini jo.”

⁴ Kiswama Samuel nuabu EJAKAIT kiner, kobu Bet-lekem, Kopotu imakio lukore emaranete airiamun kaŋes, kotemasi atiar, “Ibunit ijo kainapakin?”

⁵ Kotema atiar, “Kainapakin: abunit ainakin EJAKAIT asuban: kitalaunos, kauparos keoŋ asuban.” Kitalau Yese ka odweke, konyarau kes aponare asuban.

⁶ Kosodi kanen kepotu, abu ŋesi kosesen Eliab; kotema atiar, “Abeit loinyonyoikini EJAKAIT akinyet ejai akonyeneke.”

⁷ Konye kobala EJAKAIT Samuel ebe, “Sirikisesen ereeteke, karaida aojau naka akuanake; naarai aŋer ŋes: naarai mam EJAKAIT eseseni kwape esesenia ituŋanan; naarai itei ituŋanan atakan nakokuju, konye itei EJAKAIT etau.”

⁸Kosodi Yese anyaraun Abinadab, kitotor akonyen nuka Samuel. Kotema atiar, “Mam EJAKAIT eseunit lo da.”

⁹Kosodi Yese aitotor Sama. Kotema atiar, “Mam EJAKAIT eseunit lo da.”

¹⁰Kitotor Yese odweke ikanykaarei akonyen nuka Samuel. Kobala Samuel Yese ebe, “Mam EJAKAIT eseunit lu,”

¹¹ Kotema Samuel Yese atiar, “Ejaas ikonidwe ne kere?” Kotema atiar, “Esalit iŋoorit, ido koany, icokie amerekekin.” Kobala Samuel Yese atiar, “Kijuka koomai ŋes: naarai mam kiboikin aitodol neebunio.”

¹² Kijuka, kitolom ŋes, Koreŋ ŋesi, kitemelel, ajok asesen da. Kotema EJAKAIT atiar, “Konyou, kinyonyoik ŋes akinyet, naarai ŋes lo.”

¹³ Kosodi Samuel alemun amumwarat naka akinyet, kinyonyoik ŋes akinyet kokidiŋ oinacanake: kodoik emoyo loka EJAKAIT Daudi kagogoŋ amear kapaaran kaŋin kaiyatanakin. Konyou Samuel, kolot Rama.

¹⁴ Abu emoyo loka EJAKAIT konyou kaneejai Saul, kitican ŋes emoyo loerono loabuni kama ejai EJAKAIT.

¹⁵Kotemasi ibulesin luka Saul ŋes atiar, “Koany, kitican jo emoyo loerono loabuni kama ejai EJAKAIT.

¹⁶Aso kicorak ekapolonikosi ikonibulesin luejaas akonyenekon, amoun etuŋanan loerami adeudeu kapirianut, kosodi naijaar ijo kemoyo loerono loabuni kama ejai Edeke, ŋes do eramia ŋesi kakekan, iŋaleuni.”

¹⁷Kobala Saul ikebulesin atiar, “Kodumakinai etuŋanan loerami ejok, koinut.”

¹⁸Kosodi ediopet kokatumunak aboŋokin ebe, “Koany, aanyunit okoku loka Yese Ebetelekemit, loerami kapirianut, etuŋanan lokirigi loetitiŋ, etuŋanan loejio, loecobe koinerike, loitemelel, ido ejai EJAKAIT kaŋes.”

¹⁹Kijuka Saul ikiyakia mama ejai Yese, kotema atiar, “Kijukakinai okokukon Daudi, loejaas kamerekekin.”

²⁰Kolem Yese asigiria kisibwok imugatin, ka eriagi loka emukule loka ebino, ka ikalol, kijuka kes ka Daudi okokuke mama ejai Saul.

²¹ Kobu Daudi mama ejai Saul, kobwo kakonyeneke: kominakin ŋes noi; koraun loedakit lujiisike.

²²Kijuka Saul mama ejai Yese kobala ebe, “Keŋaiŋait, kocamak Daudi abwoenen kakonyeneka; naarai adumu ŋesi asianut kakonyeneka.”

²³Kosodi kanen kejau Saul emoyo loerono loabuni kama ejai EJAKAIT, kolemuni Daudi adeudeu, koram kakekan: kicasi do Saul, koŋaleuni, konyou emoyo loerono kamake.