Read Ateso 1 Samuel 18 Bible Online

1 Samuel 18 - Ateso bible

1 Samuel 18

¹ Kosodi kanen keŋetaki einer kaSaul, kimorikikinos etau loka Yonatan ketau loka Daudi, kominakin Yonatan ŋes bala etauke elopet.

² Koyaŋa Saul ŋes apaaran ŋin, komam bobo isiikini ŋes alosit ore togo loka papake.

³Kosodete Yonatan ka Daudi aitutuk, naarai abu kominakin ŋes bala etauke elopet.

⁴Kolac Yonatan ekaso loanapit, koinak Daudi, ka ikenapen, ka ekekileŋ, ka akekabwa, ka arokobake.

⁵Kolosenenei Daudi neejukanari Saul ŋes kere, kikemerenenei: kodakak Saul ŋes ayait ituŋa lukajiok, kitojokata ituŋa kere, kitojokata ibulesin da luka Saul.

⁶ Kosodi kanen epote kesi, keboŋu Daudi kajar Epilisitiat, kolomut aŋor koreria kere luka Isirael, eyeete kikosiete, aisiriam ekabaka Saul, ejaas kisiman, ka ekare, ka lueruos.

⁷ Koyeete aŋor komeanakinos kaboliakec, kobalas ebe, “Aar Saul ekelukumit Ka Daudi da ikelukumin itomon.”

⁸ Konyunyurikin Saul noi, kitakadik akirot ŋin; kinera ebe, “Ainakis Daudi ilukumin itomon, eoŋ da kainakis ilukumit bon; inyo bo do esalit dimarai ajakanut?”

⁹ Kosesen Saul Daudi kakoŋu naerono amear kapaaran kaŋin ka aiyatanakin.

¹⁰ Kosodi kanen, tupuruc kobunok Saul kagogoŋ emoyo lokaronon loabuni kama ejai Edeke, kodwar ŋesi kokidiŋ togo: koram Daudi kakekan, kwape eswamaenena ŋinipaaran: ido kitiŋite Saul akwara kakanike.

¹¹ Koremo Saul akwara; naarai abala ebe, “Aremi Daudi aiminaikin arwatat.” Kigaikin Daudi irwan aarei kakonyeneke.

¹² Kokurianari Saul Daudi naarai ajai EJAKAIT kaŋes, anyou da kama ejai Saul.

¹³ Kanuka ŋun kisukunya Saul ŋes kamake, kodakak ŋes apolokin elukumit; kolomanari kolomununei da kakonyen nuka ituŋa.

¹⁴ Kikemerenenei Daudi koponesioke kere; kojaenena EJAKAIT kaŋes.

¹⁵Kosodi keanyu Saul ebe ikemerenen noi, koyoŋ ŋes.

¹⁶Konye Isirael kere ka Yuda kominas Daudi; naarai alomanari kolomununei da kakonyenekec.

¹⁷ Kobala Saul Daudi ebe, “Koany, kakorakini jo akokuka nakapolon Merab aimany: konye kotitiŋior ijo koji ijiisio luka EJAKAIT.” Naarai abala Saul ebe, “Kinyek akakan atiror ŋes, konye kotiro akan naka Ipilisitian ŋes.”

¹⁸ Kotema Daudi Saul atiar, “Iŋai eoŋ, lukaŋai da ikainacan, ka ekek loka papaka koIsirael, tape araun ekamuran loka ekabaka?”

¹⁹ Konye kedol apak natikekorakinere Daudi Merab akoku naka Saul, aponi kokorakinai Adiriel Emekolatit aimany.

²⁰Kominakin Mikal akoku naka Saul Daudi: kolimokinai Saul, kitojok ŋes akirot ŋin.

²¹ Kobala Saul ebe, “Akorakini ŋes, tetere eraun eic kamakeŋ, tetere da esurokini akan naka Ipilisitian ŋes.” Ŋes do atemaria Saul Daudi atiar, “Iraun lolo ekamuranika irwan nakiareit.”

²²Kicorak Saul ikebulesin kere ebe, “Kinerata kaDaudi kaiyeiyea, ebe, ‘Koany, kisiyalamikinit ekabaka jo, kiminas da ikekejaanakinak kere: aso do koraun ekamuran loka ekabaka.’ ”

²³Kinerata ikejaanakinak luka Saul akiro ŋun kaki nuka Daudi, Kobala Daudi ebe, “Erai akirot naedit kamakus araun ekamuran loka ekabaka, naarai ecana eoŋ, mam arai loka aibuses naepol.”

²⁴Kolimokis ibulesin luka Saul ŋes ebe, “Ener Daudi ŋun.”

²⁵ Kotema Saul atiar, “Itemarete Daudi kwanata ebe, Mam ekabaka ekoto akiitakinio idiobore, dimarai amunyin akwatat nuka ekiliokane loka Ipilisitian, ainyaŋia lukasurupo luka ekabaka.” Koomite Saul Daudi aario kakan naka Ipilisitian.

²⁶Kosodi kelimokis ikekejaanakinak Daudi akiro ŋun, kitojok noi Daudi araun ekamuran loka ekabaka, Eroko apaarasia ketuboro.

²⁷ Konyou Daudi kolot, ŋes ka iketuŋa, koarata ituŋa akwat aarei luka Ipilisitian; koyau Daudi amunyinikec, koinakis ekabaka etiai kere, tetere eraun ekamuran loka ekabaka, Kokorak Saul ŋes Mikal akokuke aimany.

²⁸Koany Saul, kojenu da ebe ejai EJAKAIT kaDaudi; kominakin Mikal akoku naka Saul ŋes.

²⁹ Kiyatak Saul ayoŋit Daudi; koraenena Saul lokasurup loka Daudi tiritir.

³⁰ Kosodete ikapolok luka Ipilisitian alomar aireb; kosodi kanen kwape alomanariata kesi aireb, kikemerenenei Daudi adepar ikejaanakinak luka Saul kere; kanuka ŋun koyoŋitete do noi ekekiror.