Read Ateso 1 Samuel 19 Bible Online

1 Samuel 19 - Ateso bible

1 Samuel 19

¹ Kiner Saul kaYonatan okokuke, ka ikekejaanakinak kere ebe tikearata kesi Daudi.

² Konye Yonatan okoku loka Saul amina noi Daudi. Kolimok Yonatan Daudi ebe, “Ekot Saul papaka aiar jo: aso do keŋaiŋait, kocoikin tupuruc, koŋop kaibois nakaiyeiyea:

³Alomari eoŋ abwoi da kapapaka komanikor loijai, eneruni nukon kapapaka; arai kajen akirot, kalimokini jo.”

⁴ Kiner Yonatan nuejok nuka Daudi mama ejai Saul papake, kotema ŋes atiar, “Kinyek ekabaka adiakar kama ejai ekejaanakinanike Daudi; naarai mam ŋes ediakarit kamakon, akeswamisio da kamakon araas nukajokak noi:

⁵ Naarai abu kijaik akeijar akanike, kocam Epilisitiat, kiswama EJAKAIT aipikor naepol kanuka Isirael kere; ibu ijo da koany, kiyalamikin: kanukinyo do idiakaria ijo kama ejaas aokot numam akirot, aiar Daudi komam akirot?”

⁶Kopup Saul eporoto logka Yonatan: kiyapo Saul ebe, “Kwape ejaria EJAKAIT, mam ŋes eario.”

⁷Konyarau Yonatan Daudi, kitejen ŋes akiro ŋun kere. Koyaŋau Yonatan Daudi mama ejai Saul, kojaenena do akonyeneke kwape lem sek.

⁸Kojaun bobo ejie: koloma Daudi kitiji Ipilisitian, koara kes noi; kokerata kakonyeneke.

⁹ Kobunok Saul emoyo loerono loabuni kama ejai EJAKAIT, iboie ŋesi kotogoke kakekwara kakanike; koram Daudi adeudeu kakekan.

¹⁰ Kokoto Saul airem Daudi aiminaikin arwatat kakekwara: konye kigaikin ŋesi konyou kakonyen nuka Saul, korem do akwarake arwatat: koker Daudi koku akuare ŋin.

¹¹ Kijuka Saul ikiyakia togo loka Daudi aidar ŋes, tetere earete tupuruc: kotema Mikal aberu naka Daudi ŋes atiar, “Arai mam jo itajari akoniijar akuare na kiario moi jo.”

¹² Kosodi Mikal aijululuun Daudi kadirisa: kolot, koker, koku.

¹³ Kolem Mikal aput naka edeke, kiperik oitada, kibwaik egoe loka ajul nuka akinei akwesike, kimuko kigoen.

¹⁴Nakijukaria Saul ikiyakia aikamun Daudi, kobala ebe, “Edek.”

¹⁵Kijuka Saul ikiyakia aanyun Daudi ebe, “Koinunai ŋes koitada, tetere aari ŋes.”

¹⁶Nakelomut ikiyakia, koany, ajai aput naka edeke oitada, ka egoe loka ajul nuka akinei akwesike.

¹⁷ Kotema Saul Mikal atiar, “Kanukinyo kimodia ijo eoŋ kwaŋin, aisiikin lokasurupika alosit, tape ekui?” Koboŋok Mikal Saul atiar, “Abu katema eoŋ atiar, ‘Koosikinai kalot; kanu kainyo tikaaria eoŋ ijo?’ ”

¹⁸ Koker Daudi, koku, kobu mama ejai Samuel Rama kolimok ŋes kere nuabu Saul kiswamak ŋes. Koloto ŋesi ka Samuel aiboi Naiot.

¹⁹Kolimokinai Saul ebe, “Koany, ejai Daudi Naiot toma Rama.”

²⁰ Kijuka Saul ikiyakia aikamun Daudi: nakeanyut kesi erioŋet loka inabin edwarete, ebwoi Samuel korai ekapolonikec, kodoik emoyo loka Edeke ikiyakia luka Saul, kodwarata kesi da.

²¹Kelimokin Saul ŋun, abu kijuka icekiyakia, kodwarata ŋul da, Kijuka Saul ikiyakia bobo irwan nakiwuniet, kodwarata kesi da.

²²Kosodi ŋesi da alosit Rama, kodol atan naepol naejai Seku: kiŋit ebe, “Ai bo ejaas Samuel ka Daudi?” Kotema ediopet atiar, “Koany, ajaas Naiot toma Rama.”

²³ Kobei Naiot toma Rama: kodoik ŋes da emoyo loka Edeke, kiyatak alosit, kodwar, kiton neadolio Naiot toma Rama.

²⁴ Kolaca ŋesi da ikegoen, kodwar ŋesi da kakonyen nuka Samuel, koper apaaran ŋin kere ka akuare ŋin kere imujalal. Ŋes atemariata ebe, “Ejai Saul da onabin?”