Read Ateso 1 Samuel 20 Bible Online

1 Samuel 20 - Ateso bible

1 Samuel 20

¹Koker Daudi anyoun koNaiot toma Rama, kobu neejai Yonatan kotema ŋes atiar, “Eswama eoŋ anyoika? Anyoika numam adoliteka? anyoin akaronis mama ejai papakon, tape ŋes ekoto akaijar?”

² Kotema ŋes atiar, “Madi akuj; mam itwani: koany, mam papaka iswamai idiobore yenepol arai yenedit, komam ketejenuni eoŋ: kanukinyo kemunonikina papaka eoŋ na? Mere kwaŋin.”

³Kiyapo Daudi bobo atiar, “Ejeni papakon cut ebe adumunit asianut kakonyenekon; ebala ebe, ‘Kinyek Yonatan ajenun akiro ŋun, kinyek akadakin.’ Konye abeit, kwape ejaria EJAKAIT, kwape ejaria ekonitau da, ejai kidiŋika ka atwanareka ailamet adiopet bon.”

⁴Kosodi Yonatan atemar Daudi ebe, “Anyoika ikoto ijo keswamak, tetere keswamakin?”

⁵ Kotema Daudi Yonatan atiar, “Koany, ilamuni elap moi, mam tikakurwoki aiboikin ainyam kekabaka: konye kisiikinai kalot, tetere aŋopi komanikor aitodol apaaran nakiwuniet eboŋ.

⁶ Arai keanyu papakon ebe amamei, itemari do atiar, ‘Abu Daudi keŋit eoŋ apedor alosit oreke Bet-lekem: naarai einakini ekekike kere asubanit naka ŋolikaru.’

⁷ Arai ketema ebe, ‘Ejok’; inapakin ekonikejaanakinan: konye arai kenyunyurikin, ijenuni ebe epeleikinit aswam aronis.

⁸ Kanuka ŋun kikonak ekonikejaanakinan kasianut; naarai itutukoto kekonikejaanakinan aitutuket naka EJAKAIT: konye arai kejaunos numam adolit mamaka, koar ijo eoŋ elopet; naarai kanukinyo tikiyaunia eoŋ mama ejai papakon?”

⁹Kotema Yonatan atiar, “Madi akuj; naarai arai kajen eoŋ ebe epeleikinit papaka aiswamakin jo aronis, mam eoŋ tikalimok jo?”

¹⁰Kosodi Daudi atemar Yonatan atiar, “Iŋai bo kalimokin eoŋ arai kiiboŋok papakon jo kadedeŋ?”

¹¹Kotema Yonatan Daudi atiar, “Kobia kaloto okitui.” Kouparos kesi iarei okitui.

¹² Kotema Yonatan Daudi atiar, “EJAKAIT, Edeke loka Isirael koraun ekajenan; naadaunia abokobok papaka kosawa kalo moi, arai apaaran nakiwuniet, koany, arai ejokuka kama ejai Daudi, mam kereka eoŋ ejukuni mamakon, ketejeni jo?

¹³ Kiswamak EJAKAIT Yonatan kwaŋin, ka adepar da, arai kitojok papaka aiswamakin jo aronis, komam eoŋ ketejenuni jo, katwar jo, tetere ilosi inapakina: kojai EJAKAIT kajo, kwape ajaar lem kapapaka.

¹⁴Mam jo kitodianakini eoŋ asianut naka EJAKAIT aroko ajari bon, tetere mam atwani:

¹⁵ Konye mam ilemari akonisianut kokaleka ikar kere: eebo, mam ilemari naemudiaria EJAKAIT lukasurup kere luka Daudi kakwap.”

¹⁶ Kitutuk Yonatan kekek loka Daudi ebe, “Itepeseni EJAKAIT ŋin kakan naka lukasurup luka Daudi.”

¹⁷ Kisiyapo Yonatan Daudi bobo, kanuka amina naamina ŋes: naarai amina ŋes bala eketau elopet.

¹⁸Kosodi Yonatan atemar ŋes atiar, “Ilamuni elap moi: eanyunio ebe imamci ijo, naarai emameun ituŋanan koicoloŋokon.

¹⁹ Kidau apaarasia auni, iwonyari alosit, kodol aibois naiŋopitor kapaaran kaya, isalakini osiep loka amoru Esel.

²⁰Agumuni eoŋ ikojoi iuni owaike, bala agumi ibore.

²¹ Ido koany, ejukuni etelepat, kabala ebe, ‘Kolot komou ikojoi.’ Arai katema eoŋ etelepat atiar, ‘Koany, ejaas ikojoi osiepikon lailo: kolem kes’; kobu, naarai ejai jo ainapakin, emamei aronis, kwape ejaria EJAKAIT.

²²Konye arai atemari eoŋ etelepat atiar, ‘Koany, elamaros ikojoi kiŋarenikon,’ kolot ijo; naarai kijuka EJAKAIT jo.

²³Konye akiro nukiner ijo keoŋ koany, ejai EJAKAIT kidiŋikon keoŋ ikar kere.”

²⁴ Koŋop do Daudi kokitui: nakilamu elap, kiboikin ekabaka ainyam inyamat.

²⁵ Kiboikin ekabaka oicoloŋoke, kwape atapitor, ŋes eicoloŋ loidunyas karwatat; kiteos Yonatan kaŋes, kiboikin Abiner osiep loka Saul: konye amamei etuŋanan kaibois naka Daudi.

²⁶ Konye mam Saul abu kolim adiokirot kapaaran kaŋin: naarai aomit ebe, “Adoiki ŋes akirot, mam ŋes elai; abeit mam ŋes elai.”

²⁷Kosodi kanen kapaaran naatupakini, kedau elap ailamun, ŋes apaaran nakiareit, amamei etuŋanan kaibois naka Daudi: kotema Saul Yonatan okokuke atiar, “Kanukinyo mam okoku loka Yese ebunitor ainyam, bian karaida lolo?”

²⁸Koboŋok Yonatan Saul ebe, “Abu Daudi keŋit eoŋ kaimaimait noi alosit Bet-lekem:

²⁹Kobala ebe, ‘Kisiikinai kalot, keŋaiŋait; naarai einakini ekekikosi asubanit kore; ecoraki da onaceka eoŋ ajaun ŋina: aso do arai adumunit asianut kakonyenekon, kisiikinai kalot, keŋaiŋait, aanyun ikainacan.’ Kanuka ŋun ŋes emam ebunitor omesa loka ekabaka.”

³⁰Kosodi anyunyura naka Saul ainepun aluikin Yonatan, kotema ŋes atiar, “Ikoku ijo yenika aberu naimaranana nakepali, mam eoŋ ajeni ebe iseunit ijo okoku loka Yese aisurum jo elopet ileic, aisurum da amujalal naka totokon ileic?

³¹Naarai mam jo icasi karaida akonijakanut eroko okoku loka Yese ejari kakwap. Aso do kijuka koomikinai, naarai abeit etwani.”

³² Koboŋok Yonatan Saul papake ebe, “Kanukinyo earere ŋes? Anyoika iswamat ŋesi?”

³³Koremo Saul akekwara acamun ŋes; ŋes do ajenunia Yonatan ebe epeleikinit papake aiar Daudi.

³⁴Konyou Yonatan komesa kanyunyura naededeŋ, mam abu konyam kapaaran nakiareit naka elap: naarai akadakinit kanuka Daudi, naarai abu papake kisurum ŋes ileic.

³⁵Kosodi kanen tupuruc kolot Yonatan okitui kapak naaseunito kaDaudi, ka etelepat loedit nepepe kaŋes.

³⁶Kotema ŋesi etelepat atiar, “Koker cabo, komou ikojoi luagumari.” Ekeri etelepat, koguma ekojo ailam ŋes.

³⁷Kosodi kedol etelepat aibois naadoi ekoj loagumari Yonatan, kiworo Yonatan etelepat ebe, “Mam ekojo kilamit jo?”

³⁸Kiworo Yonatan etelepat ebe, “Koker, kiwonya, sirikiyap.” Kotukok etelepat loka Yonatan ikojoi, kobu mama ejai ejakaitike.

³⁹Konye mam etelepat abu kojen idiobore: Yonatan ka Daudi bonik kes ajenete akirot.

⁴⁰Koinak Yonatan eketelepat lujiisike, kotema ŋes atiar, “Kolot, koyaŋa kes ore.”

⁴¹Atipet kelot etelepat, konyou Daudi kaibois naka ari naka Eŋalakimak, kibiror ebuburia, kokukum irwan auni: konuanaros, komonyata, aitodol neadeparia Daudi.

⁴²Kotema Yonatan Daudi atiar, “Kolot inapakina, naarai kiyapo oni kere kokiror loka EJAKAIT ebe, ‘Ejaenena EJAKAIT kidiŋikon keoŋ, kidiŋ da aurika ka aurikon, ikar kere.’ ” Konyou, kolot: koloma Yonatan ore.