Read Ateso 1 Samuel 22 Bible Online

1 Samuel 22 - Ateso bible

1 Samuel 22

¹ Ŋes do anyounio Daudi kanen, koku alosit abua naka Adulam: ido nakepuput iinacanake, ka ekal kere loka papake, apotu koloto mamakeŋ.

² Kotukonokinos mamakeŋ ŋinituŋanan yenareitai, ka ŋinituŋanan yenajai apesen, ŋinituŋanan da yenakadakinit kotau; koraun ŋesi ekapolonikec: kojaas kaŋes ituŋa kwape akwat aoŋon.

³ Kolot Daudi Misipa naka Moab: kotema ekabaka loka Moab atiar, “Keŋaiŋait, kisiik papaka ka totoka kopotu ne aiboi kajo, aitodol naajenunia nukeswamakini Edeke.”

⁴Koyau kes akonyen nuka ekabaka loka Moab: kiboioto kaŋes apak kere naajaar Daudi abua.

⁵ Kotema enabi Gad Daudi atiar, “Sirikiboi kabua; konyou kolot akwap naka Yuda.” Kosodi Daudi anyoun kobu amagoro naka Keret.

⁶Kopup Saul ebe atakanu Daudi ka ituŋa luajaas kaŋes: iboie Saul koGibea kokwap kepeduru koRama, kitiŋite akekwara kakanike, kobwoete ikekejaanakinak kere airimor ŋes.

⁷ Kotema Saul ikekejaanakinak luebwoete airimor ŋes ebe, “Aso ca kopuputu yesi Ibenyamin; kiinakini kereka yes okoku loka Yese ŋinituŋanan imanikoria ka amanat nuka emusabibu, kidakakini ŋesi yes kere araun ikapolok luka ilukumin ka ikapolok luka akwat;

⁸ Tape yes kere inerunete aluikin eoŋ, emamei idioda yeniketejenuni eoŋ naetutukioto okokuka ka okoku loka Yese, emamei idioda kayesi yenitururwei kanukaŋ, karaida yeniketejenuni ebe eŋaraki okokuka ekakejaanakinan aluikin eoŋ, asurokin eoŋ, kwape lolo?”

⁹ Kosodi Doeg Edomait, loabwoi kikejaanakinak luka Saul atemar ebe, “Abu kaany okoku loka Yese ebunit Nob, mama ejai Akimelek okoku loka Akitub.

¹⁰ Kiŋit ŋesi EJAKAIT kanuka Daudi, koinak inyamat, koinak da ekileŋ loka Goliat Epilisitiat,”

¹¹Kosodi ekabaka aijukar anyaraun Akimelek esasedoti, okoku loka Akitub, ka ekal kere loka papake, isasedotin luajaas Nob: kopotu kere mama ejai ekabaka.

¹²Kotema Saul atiar, “Aso ca kopup, ijo okoku loka Akitub.” Koboŋok ebe, “Ekajakait, eoŋ lo,”

¹³Kotema Saul ŋes atiar, “Kanukinyo ineruniata aluikin eoŋ, ijo ka okoku loka Yese, naarai ibu koinak ŋes imugatin, ka ekileŋ, iŋit da Edeke kanukeŋ, tetere enyouni aluikin eoŋ, asurokin eoŋ, kwape lolo?”

¹⁴ Kosodi Akimelek aboŋokin ekabaka ebe, “Iŋai kobulesinikon kere erai lomunot bala Daudi, loerai ekamuran loka ekabaka, ido erai lokapolon kotoma ainerunikon, erai da loka aibuses kotogokon?

¹⁵Lolo kereka ageunia eoŋ aiŋit Edeke kanukeŋ? Madi akuj: kinyeik ekabaka aibwaikin adiokirot mama ejai ekebulesit, karaida mama ejai ekek kere loka papaka: naarai mam ekonibulesit ejeni adioda kakiro kaŋun kere, nuikidioko arai nuipu.”

¹⁶Kotema ekabaka atiar, “Abeit itwani ijo, Akimelek, ijo ka ekek kere loka papakon.”

¹⁷ Kotema ekabaka iserikaleneke, luabwoete airimor ŋes atiar, “Kibelokinos, koarata isasedotin luka EJAKAIT; naarai ejaas akecekanin kaDaudi, naarai apotu kojenut ebe aker, komam ketejenunete eoŋ.” Konye koŋeroto ikejaanakinak luka ekabaka aikeun akan aiar isasedotin luka EJAKAIT.

¹⁸ Kotema ekabaka Doeg atiar, “Kibelokin ijo, koar isasedotin.” Kibelokin Doeg Edomait, koar isasedotin, koar kapaaran kaŋin ituŋa akaisakanykauni ka lukany luanapitos epod loka ebaputa.

¹⁹ Kodany luka Nob da, ere loka isasedotin kakwanis naka ekileŋ, ikiliok ka aŋor da, idwe ka imukerun, imoŋin ka asigiria ka amerekekin, kakwanis naka ekileŋ.

²⁰ Koku ediopet kodwe luka Akimelek okoku loka Akitub, ekekiror Abiatar, koker atupar Daudi.

²¹Kolimok Abiatar Daudi kwape aaria Saul isasedotin luka EJAKAIT.

²²Kotema Daudi Abiatar atiar, “Abu kajen kapaaran kaya naajaar Doeg Edomait ŋina ebe, abeit elimokini ŋesi Saul: eoŋ edupoo aijar naka ituŋa kere luka ekal loka papakon.

²³ Kiboikin ijo keoŋ, sirikikurianar; naarai loemoot aijaraka emoot aijarakon da: arai ijai keoŋ, iiara.”