Read Ateso 1 Samuel 27 Bible Online

1 Samuel 27 - Ateso bible

1 Samuel 27

¹Kobala Daudi kotauke ebe, “Atwanikini moikace eoŋ akan naka Saul: emamei ibore yenejok kamaka dimarai eoŋ alosit akwap naka Ipilisitian; kapaluni do Saul eoŋ, mam bobo kamoi eoŋ oikorun kere luka Isirael: kwaŋin akui do eoŋ kakanike.”

² Konyou Daudi, kotubor, ŋes ka ituŋa akwat akanykape luajaas kaŋes, mama ejai Akis okoku loka Maok, ekabaka loka Gat.

³Kiboienenei Daudi koGat nepepe ka Akis, ŋes ka iketuŋa, ŋolituŋanan kekekal, Daudi da kakeŋor aarei, Akinoam Ayesereelit, ka Abigail Akaramelit, aberu kolo naka Nabal.

⁴Kolimokinai Saul ebe aker Daudi Gat: mam bobo abu komo ŋes.

⁵Kotema Daudi Akis atiar, “Arai adumunit asianut kakonyenekon, kainakis kes eoŋ aibois kore ediopet korony, tetere eboikin ŋina: naarai kanukinyo iboioto ekonibulesit kajo kore loka ekabaka?”

⁶ Kosodi Akis ainakin ŋes Sikilag kapaaran kaŋin: ŋes do araunor Sikilag loka ikabakan luka Yuda aitodol lolo.

⁷Emwaasi apaarasia nuabu Daudi kiboio kakwap naka Ipilisitian ekaru ediopet ka ilapio iwoŋon.

⁸ Kolosenenete Daudi ka iketuŋa kosuronokis Igesurin, ka Igirisin, ka Imalekain: naarai atekerin ŋun eboienenete apeŋo kakwap kiton Sur, kiton akwap nako Misiri.

⁹Kodany Daudi ituŋa, mam abu kitajar etuŋanan arai aberu, koŋata amerekekin ka imoŋin, asigiria ka akaalai, ka igoen; koboŋo, kobu neejai Akis.

¹⁰ Kotema Akis atiar, “Ai bo lolo ipotu kosurokis?” Kotema Daudi atiar, “Eŋalakimak naka Yuda,” ka “Eŋalakimak naka Iyerameelin,” ka “Eŋalakimak naka Ikenin.”

¹¹Mam Daudi abu kitajar etuŋanan karaida aberu, ayaŋaun kes Gat, kobala ebe, “Kinyeis einer ebe, ‘Eswama Daudi kwanata.’ ” Ido eswamaenenei ŋesi kwaŋin apak kere naeboienonoo kakwap naka Ipilisitian.

¹²Kiyu Akis Daudi, kobala ebe, “Ainaki iketuŋa Isirael aila ŋes cut; kanuka ŋun eraun ekakejaanakinan ikar kere.”