Read Ateso 1 Samuel 28 Bible Online

1 Samuel 28 - Ateso bible

1 Samuel 28

¹ Kosodi kanen kapaarasia kaŋun, kotukonokis Ipilisitian akecejoresio kanuka ejie, aitiji Isirael. Kotema Akis Daudi atiar, “Kojen ijo cut ebe kilosi ijo keoŋ ajore, ijo ka ikonituŋa.”

² Kotema Daudi Akis atiar, “Kanuka ŋun ijenuni nuiswamai ekonikejaanakinan.” Kotema Akis Daudi atiar, “Kanuka ŋun kadakakini araun ekedaran akouka apaarasia kere.”

³ Abu Samuel kotwanite, abu da Isirael kere kibworo ŋes, kidaikinai ŋes Rama, orekeŋ, Abu Saul kireŋearite luejaas ajokin, ka ikacudak kakwap.

⁴ Kotukonokinos Ipilisitian kopotu kidukuroto Sunem: kotukok Saul Isirael kere, kidukuroto Giliboa.

⁵ Keanyu Saul ajore naka Ipilisitian abu kokurianar, komaran eketau noi.

⁶ Kosodi nakiŋisia Saul EJAKAIT, mam EJAKAIT abu koboŋok ŋes, karaida kotoma airujasia, karaida koUrim, karaida konabin.

⁷Kosodi Saul atemar ikebulesin atiar, “Komoikinai aberu naejai ajokit, tetere alosi mamake aiŋitun.” Kotemasi ikekejaanakinak ŋes atiar, “Koany, ejai aberu En-dor naejai ajokit.”

⁸ Kitegelikin Saul, konap icenapen, kolot, ŋes ka ituŋa iarei, kopotu neejai aberu kuare: kotema atiar, “Keŋaiŋait, kodwarakinai kajokit, kitodokik eoŋ kere yenikalimokini.”

⁹Kotema aberu ŋes atiar, “Koany, ijeni nueswama Saul, kwape ereŋearia luejaas ajokin ka ikacudak kakwap: kanukinyo ilokia ijo akaijar, aiar eoŋ?”

¹⁰Kiyapoik Saul ŋes kolimit EJAKAIT ebe, “Kwape ejaria EJAKAIT, mam adiokiticanet kidoikin jo kanuka akirot kana,”

¹¹Kosodi aberu atemar atiar, “Iŋai bo etodokuni mamakon?” Kotema atiar, “Kitodokikinai Samuel.”

¹² Keanyu aberu Samuel, kodelo keporoto loepol: kotema aberu Saul atiar, “Kanukinyo kimodia ijo eoŋ? Kwabo irai ijo Saul.”

¹³ Kotema ekabaka ŋes atiar, “Sirikikurianar: naarai inyo iseseni ijo?” Kotema aberu Saul atiar, “Aseseni edeke edokuni kokwap.”

¹⁴ Kotema ŋes atiar, “Ejesi ŋesi ai?” Kotema atiar, “Edokuni emojoŋ; erapiara kekaso.” Kojen Saul ebe arai Samuel, kokukum, kisuded.

¹⁵ Kotema Samuel Saul atiar, “Kanukinyo kiloŋiloŋia aitodokun?” Koboŋok Saul ebe, “Ajai ocan luipu noi; naarai ketijiete Ipilisitian, anyou da Edeke kamakaŋ, mam bobo kaboŋonokini, karaida konabin, karaida kotoma airujasia: kanuka ŋun ŋes kanyaraunia jo, tetere kitejenuni nueswamai.”

¹⁶Kotema Samuel atiar, “Aso kanukinyo kiŋisia eoŋ, naarai anyou EJAKAIT kamakon, erai da lokasurupikon?

¹⁷ Eswama EJAKAIT kanuke, kwape abu kineria kamakaŋ: acila EJAKAIT ajakanut kakanikon, ainaki eidunyetekon Daudi.

¹⁸ Naarai mam ibu korima eporoto loka EJAKAIT, mam ibu kitodol anyunyurake naededeŋ kama ejai Amalek, kanuka ŋun ŋes kiswamakinia EJAKAIT jo akirot na lolo.

¹⁹Bobo da ijaikini EJAKAIT Isirael ka jo da akan naka Ipilisitian: moi ijaunos ijo ka odwekon nepepe keoŋ: ijaikini EJAKAIT ajore naka Isirael akan naka Ipilisitian.”

²⁰ Kosodi Saul alatakin kwap, kokurianar noi kanuka akiro nuka Samuel: komameun ŋes agogoŋ; naarai mam anyamit adiotap apaaran kere, ka akuare kere.

²¹ Kobu aberu neejai Saul, koany ebe eyaloŋoŋoi noi, kotema ŋes atiar, “Koany, apupoki akonibulesit eporotokon, adacarit akaijar, apupok akonikiro nuibu kolimok eoŋ.

²²Aso, keŋaiŋait, kopupok ijo da eporoto loka abulesitikon, kainu jo adiotap; konyam, tetere igogoŋior, nailosio korotokon.”

²³ Konye koŋer, kotema atiar, “Mam anyami.” Konye kitiŋaikis ŋes ikekejaanakinak ka aberu; kopupok ŋesi ekeceporoto, Konyou kokwap kiboikin oitada.

²⁴ Ajai aberu itaok yenatumit togo; kiwonya, koar ŋes; kolem akiria, koŋo kope imugatin lumam itubuunitoi:

²⁵Koinu ŋesi Saul ka ikekejaanakinak; konyamata. Kosodete anyoun, kolototo akuare ŋin.