Read Ateso 1 Samuel 29 Bible Online

1 Samuel 29 - Ateso bible

1 Samuel 29

¹ Kotukonokis Ipilisitian ajoresiokec kere Apek: kidukuroto Isiraelin ariri naka atan naejai Yesereel.

² Kotubonoros ijaka luka Ipilisitian kakwat ka ilukumin, kotuboros Daudi da ka iketuŋa kokau ka Akis.

³ Kosodete ikapolok luka Ipilisitian atemar atiar, “Inyo bo iswamaete Iburanian lu kane?” Kotema Akis ikapolok luka Ipilisitian atiar, “Mere lo Daudi, ekejaanakinan loka Saul ekabaka loka Isirael, loejai nepepe keoŋ apaarasia kanu, arai ikar lu, mam adumunit adioibucaret kamake ageun neasiunia mamakaŋ aitodol lolo?”

⁴ Konye konyunyurikinos ikapolok luka Ipilisitian, kotemasi ikapolok luka Ipilisitian ŋes atiar, “Kitoboŋo etuŋanan lo, tetere eboŋori aiboisike naiseikinit ijo ŋes, sirikelot kaoni ojie, kinyek araun lokasurupiwok kojie: naarai ikonakini ai etuŋanan loepucete kejakaitike? Mere ti kakwes nuka ituŋa kalu?

⁵ Mere lo Daudi, loayeononoto ikosiete ebe, ‘Aar Saul ikelukumin, Aar Daudi da ikelukumin itomon?’ ”

⁶ Kosodi Akis anyaraun Daudi, kotema ŋes atiar, “Kwape ejaria EJAKAIT, irai ijo loitenara, ido akonilomar ka akonilomun nepepe keoŋ kajore ejok kakonyeneka: naarai mam adumunit aronis kamakon ageun kapaaran naka abunorekon mamakaŋ kiton lolo: konye mam ijaka kikotos jo.

⁷Aso do koboŋo, kolot kainapakin, tetere mam itakadikini ijaka luka Ipilisitian.”

⁸Kotema Daudi Akis atiar, “Konye eswama anyoika? Ido inyo idum ijo kaneejai ekejaanakinanikon kapak nakijaar kajo kiton lolo, tape mam alosi aitiji lukasurup luka ejakaitika ekabaka?”

⁹ Koboŋok Akis kotema Daudi atiar, “Ajeni ebe ijok ijo kakonyeneka, kwape emalaika loka Edeke: konye alimut ijaka luka Ipilisitian ebe, ‘Mam elosi kaoni ojie.’

¹⁰Aso do kodilok anyoun tupuruc ka ikejaanakinak luka ejakaitikon luiupuna kajo: atipet kinyout tupuruc, keŋiu akoloŋ kolototo.”

¹¹ Kodilok Daudi anyoun, ŋes ka iketuŋa, alosit tupuruc, aboŋor akwap naka Ipilisitian. Koloto Ipilisitian Yesereel.