Read Ateso 1 Samuel 3 Bible Online

1 Samuel 3 - Ateso bible

1 Samuel 3

¹ Kijaanakinenei ikoku Samuel EJAKAIT kakonyen nuka Eli. Ido kociciŋ akirot naka EJAKAIT kapaarasia kaŋun; amamei da ituŋanan yeneanyunit aitapoet.

²Kosodi kanen kapaarasia kaŋun, eperi Eli kaiboisike, (kowariwarete akekonye, komam epedori asesen.)

³ Koriŋa eduŋioro atala naka Edeke, koper Samuel kojotor, koyekalu loka EJAKAIT, neajai asaduku naka Edeke;

⁴Kiworo EJAKAIT Samuel: kobala ebe, “Eoŋ lo.”

⁵Koker neejai Eli, kotema atiar, “Eoŋ lo; naarai kiworot.” Kotema atiar, “Mam keworot; koper bobo.” Kolot koper.

⁶Kiworo ŋes bobo EJAKAIT nakiaret ebe, “Samuel.” Konyou Samuel kolot mama ejai Eli, kobala ebe, “Eoŋ lo, naarai kiworot.” Koboŋok ebe, “Mam keworot, ikakoku; koper bobo.”

⁷ Koriŋa Samuel kejenuna EJAKAIT, ido koriŋa epukokina ŋes akirot naka EJAKAIT.

⁸Kiworo bobo EJAKAIT Samuel nakiwuniet. Konyou kolot mama ejai Eli, kotema atiar, “Eoŋ lo, naarai kiworot.” Kojen Eli ebe EJAKAIT ŋes iworot ikoku.

⁹Kanuka ŋun kolimok Eli Samuel ebe, “Kolot, koper: kosodi arai kiiworo, kotema atiar, ‘Kiner, EJAKAIT; naarai epupi ekonibulesit.’ ” Kolot Samuel koper kaiboisike.

¹⁰ Kobu EJAKAIT, kobwo, kiworo kwape aatenak ace ebe, “Samuel, Samuel.” Kosodi Samuel atemar ebe, “Kiner; naarai epupi ekonibulesit.”

¹¹Kotema EJAKAIT Samuel atiar, “Koany, abuni aswam akirot koIsirael, naisidelori aki kere nuka ŋinituŋanan yeniirari.

¹² Kapaaran kaŋin etodolikini Eli kere nuabu kener nuka ekekike, ageun ka nasodit aitodol nakawasia.

¹³ Naarai abu kalimok ŋes ebe atubokini ekekike ikar kere, kanuka numam adolit nuabu kojen, naarai einyanakinete odweke Edeke, komam ŋes itikokini kes.

¹⁴ Kanuka ŋun eyapoikinit ekek loka Eli ebe, numam adolit nuka ekek loka Eli mam elucio kasubanit karaida kainakinet ikar kere.”

¹⁵Koper Samuel aitiwalar akwap, koŋaana ikekia luka etogo loka EJAKAIT. Kokurianar Samuel alimokin Eli etapo.

¹⁶Kosodi kiworo Eli Samuel, kobala ebe, “Samuel, okokuka.” Kotema atiar, “Eoŋ lo,”

¹⁷ Kotema atiar, “Anyoin akirot nakilimok jo EJAKAIT? Keŋaiŋait, sirikiimunonik eoŋ: kiswamak jo Edeke kwaŋin ka adepar da, arai kimunon adiokirot kakiro kere nukilimok ŋesi jo.”

¹⁸ Kolimok Samuel ŋes kere, mam abu kimunon adiokirot, Kotema atiar, “Ŋes EJAKAIT: kiswama ŋesi nuitojokit.”

¹⁹ Kopoloor Samuel, kojai EJAKAIT kaŋes, komam ecamuni adio kakiroke apalun.

²⁰ Kojen Isirael kere anyoun koDan kiton Beer-seba ebe etogogoŋi Samuel araun enabi loka EJAKAIT.

²¹ Kotakan EJAKAIT bobo koSilo: naarai abu EJAKAIT kopukokin Samuel koSilo kakirot naka EJAKAIT.