Read Ateso 1 Samuel 30 Bible Online

1 Samuel 30 - Ateso bible

1 Samuel 30

¹ Kosodi kanen, kepotu Daudi ka iketuŋa Sikilag kapaaran nakiwuniet, apotu Imalekain kosurokinito ari naka Eŋalakimak, ka Sikilag, koŋatasi luka Sikilag, kicweikisi ere kakim;

² Kijoreosi aŋor ka luajaas toma kere ludidik ka lukapolok da: mam apotu koarata idioda, konye koyaŋaasi kes, koloto.

³Kepotu Daudi ka iketuŋa ore, koany, ecweitai kakim; ejoreoritai aŋorokec, ka ikecedwe lusap ka lupesur.

⁴ Kosodi Daudi ka ituŋa luajaas kaŋes adelor, komonyata, aitodol naekarakiniata aimony.

⁵ Ejoreoritai aŋor aarei nuka Daudi, Akinoam Ayesereelit, ka Abigail aberu kolo naka Nabal Akaramelit.

⁶ Kojaikini Daudi ocan luipu noi: naarai alimitos ituŋa aibiribir ŋes kamor, naarai akadakinito itauon luka ituŋa kere, ŋolituŋanan kanuka ikedwe lusap ka lupesur: konye kogogoŋior Daudi kotoma EJAKAIT Ekedeke.

⁷ Kotema Daudi Abiatar esasedoti, okoku loka Akimelek, atiar, “Keŋaiŋait, koinunai epod.” Koinu Abiatar Daudi epod.

⁸ Kiŋit Daudi EJAKAIT ebe, “Arai kebwap eoŋ erioŋet lo, adolokini kereka eoŋ kes?” Koboŋok ebe, “Kibwap: naarai abeit idolokini ijo kes, mam kikurwokini ainyakun kere.”

⁹Kolot Daudi, ŋes ka iketuŋa akwat akanykape luajaas kaŋes, kodoloto aleles Besor, neasalakinete ŋul luelanyakinio.

¹⁰Konye kibwap Daudi, ŋes ka ituŋa akwat aoŋon: naarai apotu akwat aarei kosalakis, luelolonyito komam epedorete aitub aleles Besor.

¹¹ Kodumut Emisiriat kokitui, koyaut ŋes neejai Daudi, koinakis ŋes inyamat, konyam; koinakis ŋes akipi aimat:

¹² Koinakis ŋes atutubet naka aluŋuret naka itinin, ka aibuŋeta aarei nueokito nuka imusabibun. Kedau ŋesi ainyam, kikwar: naarai mam anyamit atap, karaida aimat akipi apaarasia auni ka akuaresia auni.

¹³Kotema Daudi ŋes atiar, “Lokaŋai ijo? Ido lali bo kibunio?” Kotema atiar, “Arai eoŋ esapat Emisiriat, ebulesit loka Emalekait; kajal ejakaitika eoŋ, naarai apenata apaarasia auni adeka.

¹⁴ Apotu kasurokisi ari naka eŋalakimak naka Iceretitin, ka ari naka Yuda, ka Eŋalakimak naka Kaleb; kecweata Sikilag kakim.”

¹⁵Kotema Daudi ŋes atiar, “Kiyaŋaari ijo eoŋ orioŋet ŋol?” Kotema ŋes atiar, “Kiyapoikinoi kolimite Edeke, ebe mam jo kiari eoŋ karaida aijaikin eoŋ akanin nuka ekajakait, kayaŋaari jo orioŋet ŋol.”

¹⁶ Kedau ŋesi ayaŋaar ŋes, koany, esiarakina akwap kere, enyamete, emasete, ekosiete, kanuka luŋatan kere luipu luapotu koyaut kakwap naka Ipilisitian ka akwap naka Yuda.

¹⁷ Kodany Daudi kes ageun napimukokini akwap aitodol atiboŋ naka apaaran naatupakini: mam idiotuŋanan abu koku kakesi, dimarai ikatumunak akwat aoŋon luapotu kibwanenoto akaalai kokerata.

¹⁸ Kinyak Daudi kere luaŋatarito Imalekain: koyuu Daudi akeŋor aarei.

¹⁹Komamei koborokec yenaoliorit, yenepol karaida yenedit; karaida ikecedwe lusap ka lupesur, karaida luŋatan, karaida iboro kere luaŋatarito: kinyak Daudi kere.

²⁰Koyaŋa Daudi isipanin kere luka amerekekin ka luka aituk, luameeto koiŋaren kibaren ice, kobala ebe, “Lu kes iŋatan luka Daudi.”

²¹ Kobu Daudi mama ejaas ituŋa kwi akwat aarei, luapotu kilolonyata tape mam epedorete atupar Daudi, luaponi kitasalikinai aleles Besor: koloto airiamun ka Daudi, airiamun da kituŋa luaupas kaŋes: kosodi kedoloki Daudi ituŋa, kiyoga kes.

²² Kosodete ituŋa kere lukaronok ka ituŋa luka Belial, kotoma kaŋul kalualosito ka Daudi aboŋokin ebe, “Kanu naarai mam apotu koloto kaoni, mam kiinakini kes idiobore kotoma luŋatan lukinyaku, dimarai koyaŋa ŋinituŋanan akeberu ka ikedwe, koloto.”

²³Kosodi Daudi atemar atiar, “Ikainacan, mam iswamakinete kwaŋin iboro lukiinak EJAKAIT oni, lokidar oni, loabu kijaik erioŋet lokisurokinit oni akaniwok.

²⁴ Iŋai kipupokini yes kakirot kaŋin? Naarai kwape ejaar akorakinet naka ŋol kaloelosi ojie, kwape kwaŋin da ejaar akorakinet naka ŋol kaloidari iboro: ekorokoroete koriakas.”

²⁵Kojaun kwaŋin amear kapaaran kaŋin ka aiyatanakin, kisilak araun ekisil ka aicorakinet mama ejaas idwe luka Isirael, kiton lolo.

²⁶Kedol Daudi Sikilag, kijukak imakio luka Yuda, ikepapero, ice kotoma luŋatan, ebe, “Koany, ainakinetekus kotoma luŋatan kaneejaas lukasurupo luka EJAKAIT.”

²⁷ Ainakinet mama ejaas luka Bet-el, ka luajaas Ramot loka Eŋalakimak, ka luajaas Yatir;

²⁸ Ka luajaas Aroer, ka luajaas Sipimot, ka luajaas Esitemoa;

²⁹ Ka luajaas Raeal, ka luajaas oreria luka Iyerameelin, ka luajaas oreria luka Ikenin;

³⁰ Ka luajaas Koruma, ka luajaas Kor-asan, ka luajaas Atak;

³¹ Ka luajaas Keburon, ka mama ejaas aiboisio kere nuatapit Daudi alosenen ka iketuŋa.