Read Ateso 1 Samuel 5 Bible Online

1 Samuel 5 - Ateso bible

1 Samuel 5

¹Apotu Ipilisitian koŋatarito asaduku naka Edeke, koyaŋaut anyoun koEbeneser kiton Asudod.

²Koyaŋaasi Ipilisitian asaduku naka Edeke, kibwaikis togo loka Dagon, kosipokis eiduny ka Dagon.

³ Kosodete kenyout luka Asudod tupuruc sek, koany, ebirokina Dagon kwap kakonyen nuka asaduku naka EJAKAIT. Kolemut Dagon kinyakakis aiboisike.

⁴ Kosodete kenyout tupuruc sek, koany, ebirokina Dagon kwap kakonyen nuka asaduku naka EJAKAIT: ajepara da akou naka Dagon ka akaninike kibelibelos kokek; akuan naka Dagon bon abu kosal.

⁵ Kanuka ŋun isasedotin luka Dagon, karaida ŋinidiopet yenelomari togo loka Dagon mam icakakinete akecekeje okek loka Dagon kotoma Asudod, aitodol lolo.

⁶ Konye kolaŋirior akan naka EJAKAIT kama ejaas luka Asudod, komudia kes, kodany kes kabusion, Asudod ka iikorunoke.

⁷Kosodete keanyut ituŋa luka Asudod ebe ikote nen, kotemasi atiar, “Mam asaduku naka Edeke loka Isirael iboikin mamawok: naarai ededeŋ akekan kamawok, kama kaDagon da ewokodeke.”

⁸Kijukasi kotukokis ijaka kere luka Ipilisitian kotemasi atiar, “Kikwaikini ai asaduku naka Edeke loka Isirael?” Koboŋokis atiar, “Kibwokoroi asaduku naka Edeke loka Isirael Gat.” Kibwokosi asaduku naka Edeke loka Isirael ŋina.

⁹ Kosodi do, kedaut kesi aibwokor asaduku koluik akan naka EJAKAIT ere aitican kes: kodany ituŋa lukore, ludidik ka luepolok da, kolomut abusion kamakec.

¹⁰Kwaŋin kijukasi asaduku naka Edeke Ekuron. Kosodi kanen, kedolu asaduku naka Edeke Ekuron, kodelosi Ikuronin ebe, “Ayaut asaduku naka Edeke loka Isirael mamawok aiar oni ka iwokotuŋa.”

¹¹Kanuka ŋun kijukasi kotukokis ijaka kere luka Ipilisitian, kotemasi atiar, “Kijukasi asaduku naka Edeke loka Isirael, kolot bobo aiboisike alopet, tetere mam kiari oni ka iwokotuŋa”: naarai ajai aiticanet naerono ore kere; alaŋir noi akan naka Edeke kanen.

¹² Ituŋa lumam apotu kotwaka aponi kiticanai kabusion: kodoka aimony nakore akuj.