Read Ateso 1 Samuel 6 Bible Online

1 Samuel 6 - Ateso bible

1 Samuel 6

¹Kojai asaduku naka EJAKAIT akwap naka Ipilisitian adaun ilapio ikanykaarei.

² Konyaraut Ipilisitian isasedotin ka ikaroak, kobalas ebe, “Kikwaikini ai asaduku naka EJAKAIT? Kitodikinai lukijukaria kaŋes aiboisike.”

³ Kotemasi atiar, “Arai ijukarete asaduku naka Edeke loka Isirael, sirikijukasi komamei ibore; konye kinyakasi ŋes kainakinet naka aibucaret: ŋes do iŋaleunioto, kitejenunio da yes numam ŋes elemaritor akekan kamakus.”

⁴ Kosodete kesi atemar ebe, “Inyoin eraun ainakinet naka aibucaret yenikinyakaria ŋes?” Kotemasi atiar, “Abusion akany nuka esabu, ka imirio ikany luka esabu, kwape ejaar etiai loka ijaka luka Ipilisitian: naarai adiopetular ajai mamakus kere ka ijakakus da.

⁵ Ŋes do iswamauniata aputosia nuka abusionokus ka aputosia nuka imiriokus luemunaunete akwap; iinakinete Edeke loka Isirael aibuses: diat itebebeni akekan kamakus, ka ikusidekesio, ka akusikwap da.

⁶ Kanukinyo itogogonioto ikusitauon kwape etogogoŋioto Imisirian ka Parao ikecetauon? Naeswamaa nukaumokin kamakec mam kereka kes apotu kisiikis Ituŋa alosit, kolototo da?

⁷ Aso do kolemut kitemokis agali nakitetet, ka aituk aarei nuicirio, numam iirito ajokot, koenikis aituk agali, kinyakut itakakec ore:

⁸Kolemut asaduku naka EJAKAIT, kibwaikis agali; kibwaikis da iboro luka esabu luinyakariata ŋes araun ainakinet naka aibucaret toma asaduku ace eiduny kaya: koremosi tetere elosi.

⁹ Koanyut, arai kitor orot loka eikoruke elopet kiton Bet-semes, ŋes atemar ebe ŋes kiswamak oni aronis na naepol: konye arai mam, kijenuni do ebe mere akekan kidany oni; kerai arereŋ naerono naabu kodoik oni.”

¹⁰Kiswamata ituŋa kwaŋin; kolemut aituk aarei nuicira, koenikis agali, kogolokis da itakakec ore:

¹¹Kibwaikis asaduku naka EJAKAIT agali, ka asaduku naajaas imirio luka esabu ka aputosia nuka abusionokec.

¹²Kodero aitukerot loitenara alosit Bet-semes; kodero orot lokapolon, komonyete elosete, mam apotu kopaasi teten arai kediany; kotupakis ijaka luka Ipilisitian kes aitodol oikor loka Bet-semes.

¹³Asakete luka Bet-semes akimakec kaditot; kiteluosi akecekonye, koanyut asaduku, kiyalamikinos da aanyun.

¹⁴Koloma agali omanikor loka Yosua Ebet-semit, kobwou kanen, kaneajai amoru naapol: kibeta akito nuka agali, koinakis aituk araun ainakinet naicweio mama ejai EJAKAIT.

¹⁵Kolemut Ilebin asaduku naka EJAKAIT, ka asaduku naajai kaŋes naajaas iboro luka esabu kibwaikis kes amoru ŋin naapol: kijaikis ituŋa luka Bet-semes ainakineta nuicweio, kosubata da asuban apaaran ŋipeŋin mama ejai EJAKAIT.

¹⁶ Kosodete kedaut ijaka ikany luka Ipilisitian aanyun, koboŋosi Ekuron kapaaran kaŋin.

¹⁷Nu kes abusion nuka esabu nuenyakarete Ipilisitian araun ainakinet naka aibucaret mama ejai EJAKAIT; naka Asudod adiopet, naka Gasa adiopet, naka Asukelon adiopet, naka Gat adiopet, ka naka Ekuron da adiopet;

¹⁸Ka imirio luka esabu, kwape ajaar etiai loka ireria kere luka ijaka ikany luka Ipilisitian, ireria luebwaitai ka ireria lukoronyia. Amoru naapol, naasipokinete kesi asaduku naka EJAKAIT, amoru ŋin ejai kiton lolo omanikor loka Yosua Ebet-semit.

¹⁹ Kodany ituŋa luka Bet-semes, naarai apotu kireikis asaduku naka EJAKAIT, abu kodany ituŋa ilukumin akaisakany ka akaisakanykaarei: kibworoto ituŋa naarai abu EJAKAIT kodany ituŋa kearit loepol.

²⁰ Kobalas ituŋa luka Bet-semes ebe, “Iŋai bo epedori aibwo kakonyen nuka EJAKAIT, Edeke lo lokalaunan? Ido ai ca kitebeari oni ŋes?”

²¹ Kijukasi ikiyakia mama ejaas lueboienenete koKiriat-yearim kobalas ebe, “Enyakut bobo Ipilisitian asaduku naka EJAKAIT: kijesunos yesi koomut.”