Read Ateso 1 Samuel 7 Bible Online

1 Samuel 7 - Ateso bible

1 Samuel 7

¹ Kopotu ituŋa luka Kiriat-yearim, koomut asaduku naka EJAKAIT, koyaŋaasi oukot togo loka Abinadab, kitalaut Eleasar okokuke aidar asaduku naka EJAKAIT.

²Kosodi kanen ageun kapaaran kaŋin kiboi asaduku koKiriat-yearim apaarasia nuipu: naarai kes ikar akaisaarei: komony ekek kere loka Isirael mama ejai EJAKAIT.

³ Kotema Samuel ekek kere loka Isirael atiar, “Arai iboŋunito mama ejai EJAKAIT kikusitauon kere, kolemasi idekesio lumo ka Asitarot kamakus, kitemokis ikusitauon mama ejai EJAKAIT, kijaanakis ŋes bon: ŋes da kiyuuni yes kakan naka Ipilisitian.”

⁴Kosodete idwe luka Isirael alemar Ibaalin ka Asitarot, kijaanakis EJAKAIT bon.

⁵ Kotema Samuel atiar, “Kotukokin Isirael kere Misipa, elipakini eoŋ yes kama ejai EJAKAIT.”

⁶ Kotukokinos Misipa, kookut akipi, kobukosi kakonyen nuka EJAKAIT, koluŋata apaaran ŋin, kobalas kanen ebe, “Kidiaka kama ejai EJAKAIT.” Kirabak Samuel idwe luka Isirael koMisipa.

⁷Kepuput Ipilisitian ebe etukokina idwe luka Isirael Misipa, koloto ijaka luka Ipilisitian asurokin Isirael. Kepuput idwe luka Isirael, apotu kokuriakata Ipilisitian.

⁸ Kobalas idwe luka Isirael Samuel ebe, “Sirikitanaŋ aimony mama ejai EJAKAIT Ewokodeke kanukosi, tetere kitajari isio kakan naka Ipilisitian.”

⁹ Kolem Samuel imerekek yenenaki, koinak ŋes araun ainakinet naicweio mama ejai EJAKAIT: komony Samuel mama ejai EJAKAIT kanuka Isirael; Koboŋok EJAKAIT ŋes.

¹⁰ Napeinakini Samuel ainakinet naicweio, kikunyut Ipilisitian aitiji Isirael: konye kiretak EJAKAIT Ipilisitian kairetun naepol kapaaran kaŋin, kitican kes; kodanyai kes kakonyen nuka Isirael.

¹¹Kolomasi ituŋa luka Isirael koMisipa, kodapata Ipilisitian, kodanya kes, kiton naadolioto Bet-car.

¹² Kosodi Samuel alemun amoru, kosipok kidiŋ Misipa ka Sen, komaik ekekiror Eben-eser, kobala ebe, “Kiŋarak EJAKAIT oni aitodol lolo,”

¹³ Kwaŋin kitononokai Ipilisitian, mam bobo apotu kolomut oikorun luka Isirael: koluik akan naka EJAKAIT Ipilisitian apaarasia kere nuka Samuel.

¹⁴Kinyakakinai Isirael ireria luaŋatarito Ipilisitian kamakec, anyoun koEkuron kiton Gat; koyu Isirael eikoruke kakan naka Epilisitian. Kinapakina Isirael ka Imorain.

¹⁵ Kotubok Samuel Isirael apaarasia kere nuka aijarake.

¹⁶Kirimonori kaŋolikaru Bet-el, ka Giligal, ka Misipa; kotubok Isirael kaiboisio kaŋun kere.

¹⁷ Koboŋonori Rama, naarai ŋina ajai eketogo; kotubok Isirael kanen: kodukok nen etem loka EJAKAIT.