Read Aukan Luk 3 Bible Online

Luk 3 - Aukan bible

Luk 3

¹Da na di fu tin na feifi yali, fu a tii fu Tibeliyasi, di be de a moo gaan kownu a Loma Foto, ne Johanisi bigin wooko. Kownu Tibeliyasi be abi somen taa edeman ne en ondoo, di be e wooko gi en, fu tii taa pisiwataa enke edeman. Gaaman Pontiyesi Pilatesi be e tii a pisiwataa den be e kai Judeja. Kownu Helowdesi be e tii a pisiwataa den be e kai Galileya. Filipi, a baala fu Kownu Helowdesi, be e tii den tu pisiwataa den e kai Ituleya anga Takownisi. Da Gaaman Lisaniyasi be e tii a pisiwataa den e kai Abileina.

²We, a yuu de, da Anasi anga Kayafasi na be den tu moo hei apaiti begiman. Ne Masaa Gadu kai a pikin fu Sakalia di den e kai Johanisi puu a ini a sabana fu bigin wooko.

³Ne Johanisi opo e bali bosikopu gi den sama fu den kondee kondee, na a pisiwataa fu a Joodani Liba taki, fu den kon teke dopu, fu daai libi. Meke Masaa Gadu sa gi den paadon, fu takuudu anga ogii.

⁴A sani ya waka leti enke fa Masaa Gadu be piki Jesaja, enke wan apaiti takiman fi en, fu sikiifi a fositen taki:“A tongo fu wan bosikopuman o bali a ini a gaan sabana taki:‘U seeka pasi gi a Masaa, meke a pasi sa kon taampu letiopu tollo.

⁵Meke ala dipi saka peesi kon hei. Meke ala mongo kon booko saka miti doti.Meke ala bendi bendi fu a pasi kon taampu letiopu. Ala den olo olo seefi mu kon seeka silli miti doti.

⁶Da ala sama o si a yeepi fu Masaa Gadu.’ ”

⁷Da, di Johanisi bali a bosikopu ya, ne onmen tenti sama kon ne en fu a dopu den. Ne a taigi den taki: “U takuu ati sineki sani! Fa u du sabi taki, u mu lon gi a gaan atiboon fu Masaa Gadu di de a pasi fu kon?

⁸We, u mu soi tuutuu taki u daai libi. Ma u á mu luku taki, fu di u avo gaansama Abalaham anga Masaa Gadu be de mati, da Masaa Gadu ná o sitaafu u moo. Kweti! Bika efu Masaa Gadu wani, a sa meke den siton di u e si ya, daai kon toon bakaten pikin fu Abalaham, a u peesi.

⁹Da soseefi a akisi fu Masaa Gadu de na a bon kaba fu faa en. Da ibii bon di de ape, di nái meke bun nyanyan, da den o faa en towe a ini faya boon.”

¹⁰Namo den sama akisi Johanisi taki: “Da san u mu du moo?”

¹¹Ne a piki den taki: “Efi i abi tu impi, gi a sama di ná abi wan. Da efi i abi nyanyan, da gi a sama di ná abi fu nyan.”

¹²Da baka fu den, ne den sama di e piki lantimoni kon ne en fu a dopu den tu. Ne den akisi en taki: “We, Mesiti oo! San u mu du moo?”

¹³Ne a piki den taki: “Te u e piki lantimoni, u á mu teke moo ipi moo enke san lanti poti.”

¹⁴Ne den suudati seefi kon, ne den akisi en taki: “We, san u dati mu du?” Ne a piki den taki: “U á mu suku toobi anga sama e dwengi den fu gi u moni. Soseefi, u á mu lei gi sama tyai den go a kuutu fu moni ede. U meke a moni di lanti e pai u sai u.”

¹⁵Da di den sama yee fa Johanisi taki, ne den pakisei taki: “A ná a Kelestesi, a di Masaa Gadu be taki a o sende kon gi u de ya, no?” Bika den be e luku on ten a Kownu di Masaa Gadu be paamisi den, be o kon.

¹⁶Ma Johanisi piki den taki: “Nono! Mi e dopu u anga wataa. Ma u luku Awan di makiti bigi moo mi, a o kon a mi baka! Ma mi á dyendee sai fu losi susu puu a futu gi en seefi. En dati o dopu sama anga a Apaiti Jeje anga faya.

¹⁷A de kaba kaba fu seeka a nyanyan fi en. Den bun nyanyan a o kibii ne en baakoto. Ma den poli wan a o iti a ini faya di noiti e tapu, fu den boon poli.”

¹⁸Na so Johanisi e bali den sama naamo e gi den a Bun Nyunsu fu Masaa Gadu.

¹⁹Ma namo, da Johanisi be bali Kownu Helowdesi, fu di kownu be teke en baala uman e libi anga fu den somen taa ogii sani di a be e du.

²⁰Ne kownu komoto, ne a du wan moo gaan ogii. Bika a kisi Johanisi poti a ini dunguu osu. Masaa Jesesi teke dopu

²¹Ma bifo den be poti Johanisi a dunguu osu, da somen sama be e kon ne en fu a dopu den. Na so Masaa Jesesi seefi kon fu kon teke dopu tu. Da a yuu di Masaa Jesesi e dopu, ne ai begi. Da di a begi te wan pisi, ne tapu a den woluku piiti opo palan.

²²Ne a Apaiti Jeje fu Masaa Gadu saka kon ne en tapu enke wan doifi. Ne wan Tongo taki a tapu anda taki: “Yu na mi Manpikin di mi lobi. Mi hii ati e piisii anga yu.” Den sama fu a lo fu Masaa Jesesi

²³Da Jesesi be abi diitenti yali di a bigin fu wooko leli sama. Da den sama be teke taki, na Jowsef, a pikin fu Eli ne en dda.

²⁴Eli na be a pikin fu Matati.Da Matati na be a pikin fu Leifi.Da Leifi na be a pikin fu Milki.Da Milki na be a pikin fu Yanai.Yanai na be a pikin fu Jowsef.

²⁵Da Jowsef na be a pikin fu Matatiyasi.Da Matatiyasi na be a pikin fu Amosi.Da Amosi na be a pikin fu Naahem.Da Naahem na be a pikin fu Hesili.Da Hesili na be a pikin fu Nagai.

²⁶Nagai na be a pikin fu Maata.Da Maata na be a pikin fu Matatiyasi.Da Matatiyasi na be a pikin fu Semeyen.Da Semeyen na be a pikin fu Yowseki.Da Yowseki na be a pikin fu Yowda.

²⁷Yowda na be a pikin fu Yowanan.Da Yowanan na be a pikin fu Lesa.Da Lesa na be a pikin fu Selubabeli.Da Selubabeli na be a pikin fu Seyaltiyeli.Da Seyaltiyeli na be a pikin fu Neli.

²⁸Neli na be a pikin fu Milki.Da Milki na be a pikin fu Adi.Da Adi na be a pikin fu Kowsan.Da Kowsan na be a pikin fu Emadan.Da Emadan na be a pikin fu Eli.

²⁹Eli na be a pikin fu Josuwa.Da Josuwa na be a pikin fu Eliyesolu.Da Eliyesolu na be a pikin fu Yolemu.Da Yolemu na be a pikin fu Matati.Da Matati na be a pikin fu Leifi.

³⁰Leifi na be a pikin fu Simiyon.Da Simiyon na be a pikin fu Juda.Da Juda na be a pikin fu Jowsef.Da Jowsef na be a pikin fu Yownan.Da Yownan na be a pikin fu Eliyaken.

³¹Eliyaken na be a pikin fu Meleya.Da Meleya na be a pikin fu Mena.Da Mena na be a pikin fu Matata.Da Matata na be a pikin fu Naatan.Da Naatan na be a pikin fu Dafeti.

³²Dafeti na be a pikin fu Isai.Da Isai na be a pikin fu Obeti.Da Obeti na be a pikin fu Bowasi.Da Bowasi na be a pikin fu Saala.Da Saala*f6* na be a pikin fu Nakson.

³³Nakson na be a pikin fu Amenadabu.Da Amenadabu na be a pikin fu Admen.Da Admen na be a pikin fu Alini.Da Alini na be a pikin fu Sesilon.Da Sesilon na be a pikin fu Pelesi.Da Pelesi na be a pikin fu Juda.

³⁴Juda na be a pikin fu Jakopu.Da Jakopu na be a pikin fu Isaki.Da Isaki na be a pikin fu Abalaham.Da Abalaham na be a pikin fu Telaki.Da Telaki na be a pikin fu Naakolu.

³⁵Naakolu na be a pikin fu Seluku.Da Seluku na be a pikin fu Lewu.Da Lewu na be a pikin fu Pelegi.Da Pelegi na be a pikin fu Ebeli.Da Ebeli na be a pikin fu Seila.

³⁶Seila na be a pikin fu Kaina.Da Kaina na be a pikin fu Alipakisa.Da Alipakisa na be a pikin fu Sem.Da Sem na be a pikin fu Nowa.Da Nowa na be a pikin fu Lameki.

³⁷Lameki na be a pikin fu Metusala.Da Metusala na be a pikin fu Heinoki.Da Heinoki na be a pikin fu Yeleti.Da Yeleti na be a pikin fu Mahalaleli.Da Mahalaleli na be a pikin fu Keinan.

³⁸Keinan na be a pikin fu Enosi.Da Enosi na be a pikin fu Seti.Da Seti na be a pikin fu Adan.Ma Adan na be a pikin fu Masaa Gadu.