Read Aukan 1 Kol 12 Bible Online

1 Kol 12 - Aukan bible

1 Kol 12

¹Biibiwan! U be sende akisi mi, fa fu den apaiti taanga fu a Jeje. We, mi wani u fusutan a sani ya bun.

²U seefi sabi fa u be tan fosi u be teke biibi. U be gwenti lasi pasi go dini falisi gadu di ná abi libi.

³Ma kon sabi taki, noiti sama di a Jeje fu Masaa Gadu e tii sa poi kosi ofu fuuku Jesesi. Noiti sama sa poi taki, na Jesesi na a Masaa tu, sondee fu a Apaiti Jeje ya meke a poi.

⁴Da Masaa Gadu gi u sowtu a sowtu apaiti taanga fu wooko. Ma a Jeje di poti den gi u, na awan seefi Jeje ete.

⁵A gi somen apaiti sowtu wooko fu du. Ma na a seefi Masaa e gi den.

⁶A gi somen apaiti taanga fu wooko. Ma na a seefi Masaa Gadu e du sani sowtu a sowtu fasi a ini wi so.

⁷Da a Jeje ya e puu kon a kiin sowtu apaiti taanga a gi ibiiwan, fu wooko. Da ibii yuu dati e de fu yeepi taawan.

⁸Bika ai gi son wan apaiti taanga fu koni fu taki sani wan leti fasi. Ai gi taawan fu sabi taki Masaa Gadu bosikopu.

⁹Ai gi taawan fu biibi taanga. Taawan ai gi fu deesi sowtu a sowtu siki. Ma na a seefi jeje e gi den.

¹⁰Taawan ai gi fu du foondoo sani. Taawan ai gi fu de apaiti takiman. Taawan fu poi tesi sowtu jeje e wooko. Taawan fu taki sowtu a sowtu tongo taki. Taawan fu fusutan tongo taki.

¹¹Ma na awan kodo seefi Jeje e gi somen apaiti makiti fu wooko so. Da ai paati gi ibiiwan san a wani dati mu du apaiti fasi. Libisama sikin abi sowtu a sowtu pisi

¹²Bika luku fa sama sikin abi sowtu a sowtu pisi. Ma a hii sikin de wan kodo sikin namo. Na so sama fu Masaa Gadu de somen, ma na awan kodo sikin fu Kelestesi namo dati.

¹³Bika u de somen sama, da u de somen sowtu fasi. Taawan na Dyu, taawan á de Dyu. Taawan na saafu a katibo, taawan á de saafu a katibo. Ma a seefi Jeje teke peesi a ini ibiiwan fu wi, ne a mokisa wi ala toon wan sikin, di u teke dopu.

¹⁴Bika wan sama sikin á meke anga wan kodo pisi namo. Ma a de pisi fu pisi.

¹⁵Ma futu á poi taki, fa a á de ana, da a á poi teli enke a sikin.

¹⁶Yesi á poi taki, fa a á de ain, da a á poi teli enke a sikin.

¹⁷Bika efu ala a sikin na be ain, da fa a be o poi yee sani? Efu ala a sikin na be yesi, da fa a be o poi sumee sani?

¹⁸We, na Masaa Gadu meke a sikin anga sowtu a sowtu pisi so. Ne a poti ibiiwan a pe fu a sikin a wani.

¹⁹Bika efu ala a sikin be meke anga wan kodo pisi namo, da fa a be sa de fu kai wan hii sikin?

²⁰Ma fa a de, da na somen pisi a sikin abi. Ma na wan kodo sikin namo de ape.

²¹Da ain á poi taki, a ná abi ana fanowdu. Ede seefi á poi taki, a ná abi futu fanowdu.

²²Ma pisi fu a sikin di soi swaki seefi moo de fanowdu gi a sikin.

²³Wi e moo wei koosi gi pisi fu a sikin di u e buuse taki, den á lesipeki fu si. Pisi fu a sikin di e takuu na ain, da wi e moo wei moi sani gi dati.

²⁴Ma moi pisi fu a sikin ná abi fanowdu fu wei sani gi so. Bika Masaa Gadu sete a sikin na a fasi taki, den di e soi lagi a sama ain mu moo gi lesipeki.

²⁵Na so ala pisi fu a sikin sa fii taki, taawan nái teli bigi moo taawan. Da ibiiwan sa booko ede yeepi a taawan enke fa ai yeepi enseefi.

²⁶Efu wan pisi e fii pen, da ala taa pisi e fii pen anga en. Efu wan pisi e fende gafa, da ala taa pisi e fii piisii anga en.

²⁷Da wi na a sikin fu Kelestesi. Ibiiwan na wan pisi fu a sikin ya.

²⁸Masaa Gadu gi wi somen sowtu apaiti taanga fu wooko.A fosi peesi, fu de apaiti bosikopuman.Bakadati, apaiti takiman.Bakadati, apaiti leliman.Taawan fu du foondoo sani.Taawan fu deesi sowtu a sowtu siki.Taawan fu poi yeepi taawan.Taawan fu tii sani.Taawan fu taki sowtu a sowtu tongo.

²⁹Maibiiwan wooko á de fu de apaiti bosikopuman.Ibiiwan wooko á de fu de apaiti takiman.Ibiiwan wooko á de fu de apaiti leliman.Ibiiwan wooko á de fu poi du foondoo sani.

³⁰Ibiiwan wooko á de fu poi deesi sowtu a sowtu siki.Ibiiwan wooko á de fu poi taki tongo.Ibiiwan wooko á de fu poi fusutan tongo, fu taigi taawan.

³¹Ma meke ibiiwan feti fu Masaa Gadu gi en apaiti taanga, fu du wooko di moo de fanowdu. Fa fu lobi tuutuu Ma anga ala dati, da luku seefi san na a leti fasi fu wooko anga taawan.