Read Aukan Kon 7 Bible Online

Kon 7 - Aukan bible

Kon 7

¹Bakadati, ne mi si fo Engel*f10* fu Masaa Gadu taampu a den fo uku ede fu goontapu. Den tapu a winta a den fo uku fu goontapu, meke a á poi wai kon a soo, a á poi wai go a ze. Da soseefi a á poi wai den udu bon tu.

²Ne, mi si wan taa Engel fu Masaa Gadu komoto na a se fu san opo. Da a Engel ya, abi a sitampu fu a libilibi Gadu ne en ana. Ne a bali taanga taki anga den fo Engel fu Masaa Gadu di be kisi makiti fu du ogii anga a dee doti anga a ze. A taki:

³“U á du ogii anga a dee doti, a ze anga den udu bon ete! U tan fosi, meke wi naki a sitampu fu Masaa Gadu a den sama di e dini Masaa Gadu fesi ede fosi!”

⁴Ne, mi yee onmen sama be de, di den be mu naki a sitampu gi. Wan ondoo anga fotenti a fo dunsu (144.000) sama. Den ala fiya be komoto a den lo fu Islayeli.

⁵A lo fu Juda abi 12.000A lo fu Luben abi 12.000A lo fu Gat abi 12.000

⁶A lo fu Aseli abi 12.000A lo fu Naftali abi 12.000A lo fu Manase abi 12.000

⁷A lo fu Simiyon abi 12.000A lo fu Leifi abi 12.000A lo fu Isakali abi 12.000

⁸A lo fu Sebulon abi 12.000A lo fu Jowsef abi 12.000A lo fu Benyameni abi 12.000. A gaan kulu sama

⁹Bakadati, ne mi si wan gaan kulu sama, di ipi tee, ná wan sama poi teli den. Den taampu a fesi fu a kownu sutuu anga fesi fu a Pikin Sikapu. Den sama ya, komoto na ala sowtu nasi, lo, foluku anga tongo fu goontapu. Den wei weti koosi, da den de anga palon taka a den ana.

¹⁰Den e bali anga gaan taanga tongo taki:“Na Masaa Gadu di sidon na a kownu sutuuanga a Pikin Sikapu wawanala yeepi e komoto kon a libisama ya.”

¹¹Ne, den Engel fu Masaa Gadu, den gaansama anga den fo libilibi sani taampu lontu a kownu sutuu. Den towe denseefi a fesi fu a kownu sutuu a doti, ne den e gi Masaa Gadu gaandi.

¹²Den taki:“Amen, na so a de!Na a Gadu fu wi abiala gafanen anga ala gaandianga a koni anga daa anga lesipekianga a makiti anga taanga fu tego.Amen, na so a de!”

¹³Ne, wan fu den gaansama akisi mi taki: “Sama a den sama di wei weti koosi fann de? Pe den komoto?”

¹⁴Ne, mi piki en taki: “Masaa, mi á sabi, ma yu sabi.” Ne, a taigi mi taki: “Den sama ya, na den sama di komoto a ini a gaan pina a goontapu. Den be wasi den koosi a ini a buulu fu a Pikin Sikapu weti fann.

¹⁵A dati meke,den de a fesi fu a kownu sutuu fu Masaa Gadu. Den e dini en dei anga neti a ini en osu.Awan di sidon na a kownu sutuu o de a den mindii. Da a o kibii den fu ná wan sani du den moo.

¹⁶Angii anga dee wataa ná o kii den noiti moo.A ati san seefi ná o boon den moo. Ná wan pikin sowtu waan seefi den o fii moo.

¹⁷Bika, a Pikin Sikapu, di de a mindii koosube fu a kownu sutuu, sa solugu den. A o tyai den go a pe a wataa di e gi libi e lon, fu den sa fende diingi.Da Masaa Gadu o dee ala den wataa ain.”