Read Auyana Rúku 3 Bible Online

Rúku 3 - Auyana bible

Rúku 3

¹Rómu-waasiti óraakon-awiꞌa Táípíríyasi ména kawáá-kísáú maiyéna sísamaifakemba séfataase-aatai maisuwónkaꞌa Yúndiyaa-marafaken-kawaagon-awiꞌa Póntiyasi-Páírati maúwana Káríri-marafaken-kawaagon-awiꞌa Éroti maúwana áfákon-awiꞌa Fírípi wemá Ítúríya-marafaꞌe Térékónaitisi-marafaꞌe káráwiyuwana Ráíseniyaasi Ápíríni-marafaꞌa káráwiyuwasa

²miyáumai-waasi káráwiyonkaꞌa Ánásiye Káyafaasiye aifaꞌ-ámáán-káwáágóráí méroyankaꞌa Sékáráíyaan-ááninkon-awiꞌa Yóni máásai-marafaꞌa mérowana Maníkó aaí simámuwana

³Yóni Yóndani-nonkoni arúfáꞌá wénena simátimena séna sáwí-imayaa tuwéꞌa Maníkómpáꞌá tíyaꞌa nombá maitínkáanana Maníkó kentí sáwí-imayaa maitiyuwáíníye Yóni siyáiye.

⁴Miyá súntafena naaófáꞌá Maníkón-aaimo simátímakowin-awiꞌa Áísáya agaimaréna sénamoóráwigo máásai-marafaꞌa ména aaemáíyakemba séna Fasiꞌaénkóní aambó wiꞌankáíyamba wení aambá arupíse íyana minámpáꞌá wíno.

⁵Omáꞌa kárámai ukwítuꞌmae koró. Kaentaén-ámbá arupíse oro. Kumpékaapeꞌo uráin-amba maimái kaweꞌán-oro.

⁶Maníkó sáwíꞌo úmaimo méraampinkembakaweꞌ-ámpáꞌó métinkaindawimba aiꞌmaráínana kumínda seyaafáꞌnánká awánánááwe Áísáya agaimaréna siyónkaꞌa póna Yónintafena minááí siyáiye.

⁷Súwasa Yóni nombá maisinkáínkwae sésa sáwífaꞌ-waasi wempáꞌá tóso uwaná Yóni simátimena séna iyánkó póígon-araaꞌan-owe. Maníkó kentí sáwí-meyamba timínífo nááwa sisará iséra inkaisé wéteo.

⁸Kentí sáwí-kisau tuwéꞌo Maníkómpáꞌó téꞌo éꞌa kawe-kísáú maíyaꞌa tuwánánaumne. Émbaramu kentáá síwáꞌná imbá póta Maníkóní kaweꞌ-wáásísá úne séꞌa miyán-ímáyáá ímba oro. Maníkó Émbaramun-aísaafitantamba ónááwemo sénaraa maanóntámpínkémbá kanaámpóꞌa waási úráaro sisaꞌá úráawisino. Émbaramun-aísaafitantambo uráundawi póta kaweꞌ-wáásísá úne séꞌa miyán-ímáyáá ímba oro.

⁹Ímbo kaweꞌ-árámbó íyáín-taimo áwáufimbo ayáímai iyafímbó agaisúwáántemba Maníkó miyáumai kentí sáwí-meyamba timíníye Yóni siyáiye.

¹⁰Súwasa isésa sésa simásimenda-aaisa nórasaawa ónaumno suwaná

¹¹Yóni séna kaeꞌ-únánkwátóimo makéwi ímbo makéwi moórá-mora tíméro. Tómbá makéwi ímbo makéwi moórá-mora tíméro Yóni súwasa

¹²taakisi-óntámbó máún-umen-kwaasi Yóni nombá maisinkáínkwae sésa wempáꞌá tésa sésa óraako ómpo nórasaawa ónaumno suwaná

¹³Yóni séna ímba karoꞌá símai óraaꞌ-ontambo maíyamba taakisi-óntán-aantemba máéro súwasa

¹⁴i-wáásí sésa kesáá nórasaawa ónaumno suwaná Yóni séna tínkantukeꞌa miwítí óntama maénae ímba seró. Karoꞌ-ááí simátimeꞌa miwítí óntama maénae ímba seró. Kentí kísaugoni méyántáféꞌa ímbo kaórémba tirunkó kaweꞌá ínaꞌa méraaro Yóni siyáiye.

¹⁵Yúndaa-waasi Maníkómó íyáfasinankaraiwaimba amuꞌmarésa mésa Yónin-aai isésa óraaꞌ-imayaa ésa sésa Maníkómó íyáfasinankaraiwai wemá Yóniyaꞌi fíꞌowawaꞌiyo suwaná

¹⁶Yóni séna kesínaaembo tíndawi wemá óraako kembá íyáákaraifo wemó aaí síndaraꞌo kemó sendá sáwíꞌan-iye. Kemá nombá maitinkánaumpo wemá Maníkóní Ufaen-ámútánkómbá aiꞌmaráínana kuména kempímbá óraaꞌa uwátinkena iyamó agáéntemba íníye.

¹⁷Aawinkwínaumo sipetifímbó mósá makésamo mentúwááwanamo anómba marapáꞌó kúmísanamo ásimo fiyúndágo aútúwáísasamo kámakamaꞌo in-íyáfímbó wiyúꞌmaimo agaisuwésamo anómbo naaúmpaꞌo mósá máráántemba waási miyáráámbá íníye Yóni séna

¹⁸Maníkóní ásé-aai ísámai kaweꞌá íwae séna miyán-ááí simátímaꞌmaena iyáiye. Ísumba nombó maiyánkarain-aai.

¹⁹Yóni simátímaꞌmae wéiyena sáwífaꞌ-waasi nombá maitinkéna ánaaemba Ísumba maiyankówana inaí súwana kampúaran-tawaai tuwínkaaꞌ-úwana Maníkóní Ufaen-ámútánkó mááufuꞌ-numaraamba úmaena aneꞌá kumbérowana aaigó aantemba wíyómpakemba séna emá kesááninko ónaꞌa en-ímáyáá wéeꞌa áfááraumai aamoí uwánkaumne siyáiye. Yóni Maníkóní ásé-aai simátimumbanifo Káríri-marafaken-kawaagon-awiꞌa Éroti áfákon-awaainínkón-áwíꞌa Érótíyasimba maiyówana mindásafena fíꞌo-fiꞌon-tantaaꞌo sáwíꞌo úntafena Yóni séna sáwíꞌa óne súwana Éroti Yónimba áíꞌmai ándáfaꞌa ankéna mindásafena sáwí-kisau maimaéna iyáiye. Ísun-aíwáꞌnáti túwíkon-aai.

²²

²³Ísu marapáꞌá kumbéna moórá-waai úmai siyáánkai-aatai maisuwéna wénena Maníkón-aaimo simátiminda ómbarena úwasa waási imáyáa ésa sésa Yósepin-ááninkon-iye siyáawe.Yósepi afowán-áwíꞌa Írai úwana

²⁴Írai afowán-áwíꞌa Mátáti úwanaMátáti afowán-áwíꞌa Rífái úwanaRífái afowán-áwíꞌa Méríkai úwanaMéríkai afowán-áwíꞌa Yánai úwanaYánai afowán-áwíꞌa Yósepi úwana

²⁵Yósepi afowán-áwíꞌa Mátátayasi úwanaMátátayasi afowán-áwíꞌa Émósi úwanaÉmósi afowán-áwíꞌa Néamu úwanaNéamu afowán-áwíꞌa Ésírai úwanaÉsírai afowán-áwíꞌa Nágai úwana

²⁶Nágai afowán-áwíꞌa Méati úwanaMéati afowán-áwíꞌa Mátátayasi úwanaMátátayasi afowán-áwíꞌa Sémeni úwanaSémeni afowán-áwíꞌa Yóséki úwanaYóséki afowán-áwíꞌa Yónda úwana

²⁷Yónda afowán-áwíꞌa Yóánani úwanaYóánani afowán-áwíꞌa Résa úwanaRésa afowán-áwíꞌa Sérápáperi úwanaSérápáperi afowán-áwíꞌa Síáritiyeri úwanaSíáritiyeri afowán-áwíꞌa Nérai úwana

²⁸Nérai afowán-áwíꞌa Méríkai úwanaMéríkai afowán-áwíꞌa Éndai úwanaÉndai afowán-áwíꞌa Kósamu úwanaKósamu afowán-áwíꞌa Érímendamu úwanaÉrímendamu afowán-áwíꞌa Éya úwana

²⁹Éya afowán-áwíꞌa Yósúwa úwanaYósúwa afowán-áwíꞌa Éríyesa úwanaÉríyesa afowán-áwíꞌa Yórimu úwanaYórimu afowán-áwíꞌa Mátáti úwanaMátáti afowán-áwíꞌa Rífái úwana

³⁰Rífái afowán-áwíꞌa Símiyoni úwanaSímiyoni afowán-áwíꞌa Yúndaa úwanaYúndaa afowán-áwíꞌa Yósepi úwanaYósepi afowán-áwíꞌa Yónamu úwanaYónamu afowán-áwíꞌa Éráyakimu úwana

³¹Éráyakimu afowán-áwíꞌa Méríya úwanaMéríya afowán-áwíꞌa Ména úwanaMéna afowán-áwíꞌa Mátáta úwanaMátáta afowán-áwíꞌa Nétáani úwanaNétáani afowán-áwíꞌa Téfíti úwana

³²Téfíti afowán-áwíꞌa Yési úwanaYési afowán-áwíꞌa Ópéti úwanaÓpéti afowán-áwíꞌa Póási úwanaPóási afowán-áwíꞌa Sárimoni úwanaSárimoni afowán-áwíꞌa Násoni úwana

³³Násoni afowán-áwíꞌa Ámínándapu úwanaÁmínándapu afowán-áwíꞌa Ándimini úwanaÁndimini afowán-áwíꞌa Ánái úwanaÁnái afowán-áwíꞌa Ésíroni úwanaÉsíroni afowán-áwíꞌa Pérési úwanaPérési afowán-áwíꞌa Yúndaa úwana

³⁴Yúndaa afowán-áwíꞌa Yékopu úwanaYékopu afowán-áwíꞌa Áísáaki úwanaÁísáaki afowán-áwíꞌa Émbaramu úwanaÉmbaramu afowán-áwíꞌa Téra úwanaTéra afowán-áwíꞌa Néꞌo úwana

³⁵Néꞌo afowán-áwíꞌa Séráki úwanaSéráki afowán-áwíꞌa Ríyu úwanaRíyu afowán-áwíꞌa Péréki úwanaPéréki afowán-áwíꞌa Ípa úwanaÍpa afowán-áwíꞌa Síra úwana

³⁶Síra afowán-áwíꞌa Kénaani úwanaKénaani afowán-áwíꞌa Áfákisati úwanaÁfákisati afowán-áwíꞌa Sému úwanaSému afowán-áwíꞌa Nówaa úwanaNówaa afowán-áwíꞌa Rémeki úwana

³⁷Rémeki afowán-áwíꞌa Métúsara úwanaMétúsara afowán-áwíꞌa Ínóki úwanaÍnóki afowán-áwíꞌa Yéréti úwanaYéréti afowán-áwíꞌa Máꞌárariri úwanaMáꞌárariri afowán-áwíꞌa Kénaani úwana

³⁸Kénaani afowán-áwíꞌa Ínosi úwanaÍnosi afowán-áwíꞌa Séti úwanaSéti afowán-áwíꞌa Ándámu wemáManíkón-áánimban-iye. Miwí Ísun-aíwáꞌná owé-ímáyáá uráawe.