Read Auyana Rómu 10 Bible Online

Rómu 10 - Auyana bible

Rómu 10

¹Maanááímó simátíménda ísáaro. Kesí waási Yúndaa-waasi sáwíꞌo úmaimo méraampinkemba Maníkó faútinkaindasafena áfááraumai sirááíma wétaisaꞌa Maníkómpáꞌá inaí símaeꞌa iyúne.

²Yúndaa-waasi Maníkóní kísau maénae sésa fasiꞌaambánifo Maníkón-aaigoni áwáuma ímba ísaraamba tuwánaraumne.

³Maníkómó wenaúrankaꞌo arupísemo uwátínkáín-amba ímba awánésa karoꞌ-ántáfésa éraiꞌ-amban-iye sésa pósa Maníkóní éraiꞌ-amba ímba wéaraaiwaewe.

⁴Ámáámba arááíwaundasafena Maníkó wenaúrankaꞌa arupíse uwásinkainiye sésa Yúndaa-waasi arááíwáén-amba Ísu Káráísiti séna minámbá taíꞌáífo kesááisafesa timankúnkúmba owísáféna Maníkó wenaúrankaꞌa arupíse uwátínkáímbanifo Yúndaa-waasi minámbá ímba wéaraaiwaewe.

⁵Maníkó Mósesembo simámakain-amaamba arááíwáénanasa Maníkó arupísesa uwásinkainiye sen-ááísáféna naaófáꞌá Mósese agaimaréna sénaminámáámbó seyaafáꞌó arááíwaiyawikaweꞌ-úmai ménaawe siyáiye.

⁶Maníkón-aaisafesa timankúnkúmbo owímó arupíse uwátínkáín-aaisafena agaimaréna sénamaarán-ááí ímba seró. Nááwa wíyómpaꞌa iyénawa Káráísitimba áíꞌmaenawa kumíníyo.

⁷Nááwa pukáan-kwaasimo méraapaꞌa kuréwa Káráísitimba áíꞌmaenawa tíníyo. Miyán-ááíímba seró.

⁸Maníkón-aai kentirumpimbáewaaꞌá wéraisaꞌa wésewe agaimaréna siyáiye. Ísu Káráísitin-aaisafeꞌa timankúnkúmba oró-ááí simátimunda

⁹minááí maarán-iye. Ísu kentáásí Fasiꞌaénkón-iye aforaꞌó simátimeꞌo kentirumpinkémbó séꞌo Ísu pukáimpinkemba Maníkó íyáfasinankaraiyemo síyanamo éna sáwíꞌo úmaimo méraampinkemba Maníkó faútinkainiye.

¹⁰Maníkón-aaisafeta kesirumpintá simankúnkúnta úndasa wenaúrankaꞌa arupísesa uwásínkáísata aforaꞌó minááímó simátimundasa sáwíꞌo úmaisaamo méraundafinkenta wéfausinkaiye.

¹¹Maníkón-aai aúfáífimba agaimaréna sénasiyáintembo índawimpaꞌo timankúnkúmboíyawi ímba tigaesáfésa ónááwe siyáiye.

¹²Minááí seyaafáꞌ-wáásí Yúndaa-waasiye fíꞌonkaa-waasiye Maníkón-aúrankaꞌa mimbóráíꞌa ontáféna siyáiye. Maníkó seyaafáꞌnánkáꞌó káráwiyaiwai éna súwaꞌnai ínkwae sésamo simámén-kwaasi óraa-kaweꞌa wéuwatinkaiye.

¹³Maníkón-aai aúfáífimba agaimaréna sénaFasiꞌaénkóntáfésa sésa sáwíꞌo úmaimoméraundafinkemba siyáínonemo sewí seyaafáꞌnánká miyá íníye agaimaréna siyáiye.

¹⁴Maníkó ímba méraiye-aaimo sewímó ombá súwaꞌnai uwo ímba kanaaꞌá wésewe. Maníkón-aaimo ímbo ísááwimo ombá minááísáfésa timankúnkúmba ímba kanaaꞌá wéowe. Maníkón-aaimo ímbo kosimátíméwasamo ombá minááí ímba kanaaꞌá ísááwe.

¹⁵Ímbo tiꞌmárááwasamo ombá ímba kanaaꞌá kowásimatimewe. Maníkón-aai aúfáífimba agaimaréna sénaásé-aaimo kosimátíméwiaamoí wéuwatinkaawe agaimaréna siyáiye.

¹⁶Minásé-ááí isésamanifo tuwímbai taráíyaawe. Mindásafena naaófáꞌá Maníkón-aai simátímakowin-awiꞌa Áísáya agaimaréna sénaFasiꞌaénkóo kaweꞌ-ááí kosimátimunasasaminááísáfésa ímba timankúnkúmba owe agaimaréna siyáiye.

¹⁷Ísu Káráísitin-aaimo simátíméwasamo isésamo ombá kanaaꞌá timankúnkúmba wéowe.

¹⁸Yúndaa-waasi Ísu Káráísitin-aai éraiꞌa éꞌa ísaraawe súne. Mindásafena naaófáꞌá Maníkón-aai aúfáífimba agaimaréna sénaseyaafáꞌ-máráfáꞌá wénesa simátímúwanaminááígó wété uráiye agaimaréna siyáiye.

¹⁹Yúndaa-waasi mindá Ísareri-waasi minááígóní áwáuma éꞌa ísaraamba mindá éraiꞌ-aain-iye. Naaófáꞌá Mósese Maníkómó siyáin-aai agaimaréna sénaYúndaa-waasi fíꞌonkaa-waasisafeꞌa séꞌaúwoi-waasin-owe siyáamba miwísáféꞌa kesíwaásin-owe sendasáféꞌa aaisambá tiyéꞌatirunkó sáwíꞌa uwátinkainiye Maníkó siyáiye Mósese agaimaréna siyówana

²⁰ánaaemba Áísáya ímba ááꞌa úwana agaimaréna séna Maníkó sénanóra símaisaawa Maníkómpáꞌá ténaumno-aai ímba sewífáꞌá paápé uráumne. Maníkómbá aráásíméro-aai ímba sewífáꞌá paápé uráumne séna

²¹Ísareri-waasisafena séna túwaꞌnai ónaumne séꞌa kempáꞌá teró símaeꞌa iyúnasa kesáái taraisésa kembá tínaaeniꞌa wéowe Maníkó siyáiye Áísáya agaimaréna siyáiye.