Read Awing Matyo 10 Bible Online

Matyo 10 - Awing bible

Matyo 10

¹Yeso a fóŋ ngaŋə́zoŋə́ndzəm əjí ntsɔb pɛ̌ ə́fɛ̂ mətɨ nə́ pó á mə́ kəm nə́ əjwi təpɔŋ kə́ tsóʼ pɨ páʼ pó túg nə́ əlɔʼ pópə ntê məghɔ ntsəmə.

²Lɛ̌ məlɛ́n mə́ məntú mí mə́ ntsɔb pɛ̌; ntsɛɛmbi ŋwu lə́ Saamun (páʼ pə̈ fóŋ nə́ nə́ Pita lə́) pó ndim əyǐ Andəlu, Jɛmsə mɔ́ Zebedi pó ndim əyǐ Jɔnə;

³Filib pó Batolomiə, Tɔməsə pó Matyo, nkwânchubə aláʼə, Jɛmsə mɔ́ Alfɔsə pó Tadiosə,

⁴Saamun ŋwu zilɔd[1] pó Juda Iskaliɔt páʼ a nə fi nə́ Yeso.

⁵Yeso a nə ńtú pɨ pɨ ntsɔb pɛ̌ lə́ ńtə́gtə ághɔ́b ńgə́, “Kɔ nə́ kwúnə á mə́mə aláʼə pətəjǐsê kəənə á mə́m tɔ̂ŋ Pəsamalitan yitsə̌.

⁶Ghɛn nə́ pə́ á mbô məmbéŋ mə́ ndzɛd mə́ Islɛl páʼ mə́ péŋ nə́.”

⁷Nə́ ghɛn, nə́ tíʼə ə́sóŋə ńgə́, “Anuə nəfoonə nəpóolə á páatə!”

⁸Tsóʼ nə́ pəghoonə́, ńjúmkə pəkwûə, ńtsóʼ ngǎŋnkaʼ ńkə́ ńkəm pɛ̌sê. Nə́ kwá lə́ tə fɛ̂ nkéebə, kə́ nə́ ə́fɛ̂ kətaŋə.

⁹Kɔ nə́ túg nkáb yitsə̌ á apa pəənə́, kəənə á pə́ pə́ pəpɔ́ŋə́, pəshílə kɨ pəkə̂pa.

¹⁰Kɔ nə́ lɔgə̂ apeemə nənyinə kɨ ətsəʼ pɛ́n pɛ̌, kɨ ngwubə kɨ mbaŋ ńté ńgə́ pə́ chîə á mə́ zə́g nə́ ngaŋəfaʼ ntsəmə.

¹¹Mbɔʼ nə́ kwúnə á tɔ̂ŋ ntsəm kəənə aláʼə atsəm, nə́ chwaalə̂ ŋwu páʼ mənu mí mə́ koʼnə̂ nə́ ńchîə á ndɛ̂ yí tə ńdáʼ ə́fɛ́lə.

¹²Ndɛ̂ ntsəm nə́ kwú nə́ ə́wɨ́ nə́ chaʼtə̂ ngǎŋndɛ̂, ə́sóŋ ńgə́, “Mbwɔ́dnə ə́ chîə á mbɨ pəənə́.”

¹³Mbɔʼ ndɛ̂ yi wɨ́ ə́ koʼnə̂, mbwɔ́dnə əjɨ ə́ chî wə́. Mbɔʼ jɨ́d ə́ chî koʼnə̂ pô, mbwɔ́dnə əjɨ ə́ pəənə̂ á mbô pəənə́.

¹⁴Mbɔʼ ŋwu ntsəm páʼ a kě nə́ áwə́ənə́ á ndɛ̂ yí pí pô ńkə́ ńchîə atséebə ajɨ́ jwə́ʼtə pô, nə́ tə́ ə́fɛ́lə á ndɛ̂ yi wɨ́ kəənə á aláʼ yə wɨ́, nə́ kɔdtə̂ akəpóglə́ á məko pəənə́.

¹⁵Mäŋ fiʼtə̂ áwɨ́ nə́ ndə̌ŋdəŋ ńgə́ á yǒ pə́ alě asáʼə́məsáʼ lə́ Əsê a túgə akóolə́mə́lə́ŋə á mbô pɨ pə́ Sodom pó Gomolya ńtsɛ pɨ pə́ tɔ̂ŋ yi wə́.

¹⁶Mäŋ túmə áwə́ənə́ apeŋ lə́ ándó məmbéŋ mə́ ndzɛlə á mə́m əfunə́. Nə́ shib ńgyáŋə ándó mənóolə ńkə́ ńchî nə́ əpoʼ wə́ənə́ ándó alúʼə.

¹⁷Lɔg nə́ ndɛd nə́ pɨ pə́ təpɔŋə; pó yǒ lɔgə̂ áwɨ́ ghɛn ə́fɛ̂ á mbô ngaŋə́sáʼə́məsáʼə kə́ ə́shúmə áwə́ənə́ á mə́m məláʼ mə́ Əsê mə́ Pəjusə.

¹⁸Pə́ yǒ soŋə̂ áwɨ́ ghɛn nə́ pəənə́ á mbi ngaŋə́sáʼə́láʼ pópə pəfo ńté mə. Zəənə́ á yǒ fɛ̂ əseenə á mbô pɨ ńgə́ nə́ náŋkə nkɨ yi əshîʼnə á mbô pó ḿbɨ ḿbá pətəjǐsê.

¹⁹Əghâ ándó pə́ yǐ nə́ ńgwaamə̂ áwɨ́, kɔ nə tə́ ńjwaʼ mbɨ əjɨ ńgə́ pəg yǐ sóŋə pə́ ńgə́ akə̂ kɨ ńgə́ pəg yǐ chwáakə pə ńgə́ akə̂. Ndɛd yi wɨ́ ə́ yǒ koʼ, pə fiʼtə̂ áwɨ́ nə́ anu mbɔʼ nə́ sóŋə.

²⁰Ńté ńgə́ lə́ lǒo kě pɨ tséebə pô. Lə́ lǒo pə́ Ajwiə Tǎ páʼ a yǒ nə́ tséebə laŋə̂ á mə́m pəənə́.

²¹Pɨ pó yǒ fi pəlim pɔ́b pə jwítə, pətǎ pə kə́ fi pɔ́ póobə́. Pɔ́ pə́ yǒ tsɔ́ʼ pɔ́ pə́ ŋwíŋ tə́əmə a ndzəm pətǎ pɔ́b pópə pəmǎ pɔ́b tə ghɛd pə jwítə ághóobə́.

²²Ŋwu ntsəmə a yǒ peenə̂ áwɨ́ té mə, lə́ ŋwu ntsəm páʼ a yǒ nə́ ńtɨ́ ńtyantə̂ tə ńkoʼə̂ a ndwegtə a yǒ chwáalə.

²³Mbɔʼ pə́ yǒ ńtsaŋkə̂ áwə́ənə́ aliʼə́ atsəm, nə́ kə ńgɛnə̂ aliʼə́ ndaʼə. Mäŋ fiʼtə̂ áwɨ́ nə́ ndə̌ŋdəŋ ńgə́ Mɔ́ Ŋwunə a yǒ jitə̂ yǐəə lə́, nə́ kě ndɛd túgə á mə́ kwú nə́ á mə́m əláʼ ətsəmə á mə́m Islɛl nə́ nkɨ yi əshîʼnə ghɛn pô.

²⁴Ndzoŋdzəmə a kě jî ńtsɛɛlə̂ ndzéʼkə əyǐ pô, móonə afaʼə a kě kə́ ńjî ńtsɛɛlə̂ tǎ afaʼ əyǐ pô.

²⁵Á koʼnə̂ á mbô ngaŋə aŋwaʼlə á mə́ chî nə́ ándó ndzéʼkə əyǐə, ńkə́ ńkoʼnə̂ á mbô móonə afaʼə á mə́ chî nə́ ándó tǎ afaʼ əyǐə. Mbɔʼ pə́ fóŋ nətû nə́ ndɛ̂ nə́ əfo pɛ̌sê, lə́ələ́ pə́ ńgə́ pə́ yǐ fóŋ ngǎŋndɛ̂ nə́ əlɛ́n páʼ wɨ́d ə́ pə́g nə́ ńdaŋə̂ wɨ́d wə̂.

²⁶Á pə́ ńgə́ kɔ nə́ pɔ́gə ághóobə́. Anu yətsə́ a kě ə́wɨ́ chî páʼ pə kə́bkə nə́ páʼ pə́ yǒ nə́ kě ŋáʼ pô. Anuə atsəm páʼ pə́ lyáŋ nə́, pə́ yǒ ghɛd pə́ jîə.

²⁷Anu maŋ sóŋ nə́ nə́ pəənə́ á mə́m ndzəmə́, fiʼtə̂ nə́ zə́ələ́ á mə́m əliʼ pə ŋwaʼ nə́. Anu pə́ kə́ nə́ ńchámtə á nətôglə pəənə́, kɔ́ʼ nə́ ńtə́əmə á ndu məláʼ ə́fiʼtə̂.

²⁸Kɔ nə́ pɔ́gə ŋwu páʼ təmbɔʼ a jwítə tsɔʼə na mbɨ ḿbə́ ńkě chî təmbɔʼ a jwítə mə́lə́glə pô. Lə́ pɔ́g nə́ pə́ Əsê páʼ təmbɔʼ a tsəŋkə̂ na mbɨ pó mə́lə́glə á mə́m móg tə měe.

²⁹Pə́ kě mənchwînə mɛ́n mbɛ̌ nə́ táʼ ndɔ́la finə̂? Lə́ təmbɔʼ táʼə á pə́ ńkě á əsê wǔ tsɔʼə tə ghə́ Tǎ əwəənə́ a pí pô.

³⁰Tsɔʼə mənoŋ mə́ chî nə́ atû pɨ pətsəm, Tǎ əwəənə́ a kə́ ə́sháŋə mə́ələ́.

³¹Lə́ələ́ pə́ ńgə́, kɔ nə́ pɔ́gə, nə́ səglə̂ ńtsɛɛlə̂ apoŋə mənchwînə.

³²Ŋwu ntsəm páʼə a pí nə́ mə á əshîsaŋə, maŋ yǐ kə́ pímə yə́ á mbi Tǎ mə páʼə a chî nə́ á nəpóolə.

³³Lə́ ŋwu ntsəm páʼə a kǐ nə́ mə á əshîsaŋə maŋ yǐ kə kǐə yə́ á mbi Tǎ mə páʼə a chî nə́ á nəpóolə.

³⁴Kɔ nə́ kwaŋ ńgə́ maŋ yǐ lə́ á mə́ fɛ̂ nə́ mbwɔ́dnə á ndu ndəsê. Maŋ nə ńkě yǐ lə́ á mə́ fɛ̂ nə́ mbwɔ́dnə pô, maŋ kə yǐ lə́ á mə́ ghɛd nə́ ńgə́ pɨ pə́ tə́ ḿbóʼnə nə́ ŋwíŋ ntsoolə.

³⁵Ńté ńgə́ maŋ kə yǐ lə́ á mə́ kɔn nə́ atûə mɔ́ mbyâŋnə pó tǎ əyǐə, ə́ kɔnə̂ yə mɔ̂ məngyě pó mǎ əyǐə, ə́ kɔnə̂ yə́ ngwě mɔ́ pó mə́pɨ́ əyǐə.

³⁶Ngaŋkəpa ŋwunə a yǒ tíʼ pə́ lə́ ndim əyǐə.

³⁷Ŋwu ntsəm páʼ a kɔŋ nə́ tǎ əyǐ kəənə mǎ əyǐ ńtsɛɛlə̂ mə, a kě koʼnə̂ á mə́ pə́ nə́ ndzoŋdzəmə mə pô. Ŋwu ntsəm páʼ a kɔŋ nə́ mɔ́ əyǐ yi mbyâŋnə kɨ yi məngyě ńtsɛɛlə̂ mə, a kě koʼnə̂ á mə́ pə́ nə́ ndzoŋdzəmə mə pô.

³⁸Ŋwu ntsəm páʼ a kě nə́ atǐə apagləpaglə ají twá ńdzoŋə̂ mə pô, a kě koʼnə̂ á mə́ pə́ nə́ ndzoŋdzəmə mə pô.

³⁹Ŋwu ntsəm páʼ ä chwa nə́ nchîmbî əjǐə a yǐ péŋkə zə́ələ́, ŋwu ntsəm páʼ a péŋkə nə́ nchîmbî əjǐ ńté mə a yǐ zə́ənə zə́ələ́.

⁴⁰Ŋwu ntsəm páʼ a pí nə áwə́ənə́ á ndɛ̂ yí, a pí lə́ mə, ŋwu ntsəm páʼ a kə́ nə́ ḿbímə mə á ndɛ̂ yí, a pí lə́ ŋwu páʼ a tú nə́ mə.

⁴¹Ŋwu ntsəm páʼ a pí nə́ ntûsê á ndɛ̂ yí ńté ńgə́ lə́ ntûsê, ä kwá ntsɔ́ʼəfaʼ ntûsê. Ŋwu ntsəm páʼ a kə́ nə́ ḿbímə ŋwu páʼ a tɨ́ nə́ ndə̌ŋdəŋ, ńté ńgə́ lə ŋwunə a tɨ́ nə ndə̌ŋdəŋ a yǐ kwá ntsɔ́ʼəfaʼ ŋwu páʼ a tɨ́ nə́ ndə̌ŋdəŋə́.

⁴²Mbɔʼ ŋwu tsə̌ a kə fɛ̂ tsɔʼə táʼ ndɔ́ŋ nkǐ yi féŋtə nə́ á mbô táʼ mɔ́ ghɛn yitsə̌ ńté ńgə́ lə́ ndzoŋdzəm mə, mäŋ fiʼtə̂ áwɨ́ nə́ ndə̌ŋdəŋ ńgə́ a kě ntsɔ́ʼəfaʼ əjǐ yǐ péŋkə pô.