Read Awing Matyo 11 Bible Online

Matyo 11 - Awing bible

Matyo 11

¹Ndzaŋə ándó Yeso a nə məgtə̂ nə́ á mə́ tə́gtə nə́ ngaŋə́zoŋə́ndzəm əjí zə̂ ntsɔb pɛ̌ lə́, ə́fɛ́lə aliʼ yi wɨ́ ńgɛnə̂ mə́ zéʼkə nə́ kə́ sóŋə anǔəsê á mə́m pətɔ̂ŋ pɔ́b pə́ páatə nə́ aliʼ yə́ wə́.

²Əghâ ándó Jɔn əfɛ̂nkǐə a nə ńchî nə á nkáʼə atsáŋ ńdzóʼ mənu Yeso a ghɛd nə́ lə́ ńtíʼ ńtú ngaŋə́zoŋə́ndzəm əjíə á mbô yə́.

³Ńgə́ pó ghɛn ḿbítə yí ńgə́, “gho lə́ ŋwu páʼ a nə chî nə́ mə́ yǐ nə́ lə́, kɨ pəg tə́ ḿbyáabə ŋwu ndaʼə?”

⁴Yeso a kwěe ághɔ́b ńgə́, “ghɛn nə́ ə́fiʼtə̂ a Jɔn nə́ anu nə́ zóʼ nə́ ńkə́ ńdzə́ənə.

⁵Pəfəg pə́ zɨ́ əliʼə́, pəkɔ́ŋə́sê pə́ nyinə̂, pə́ tsóʼ ngaŋ nkaʼ, əkə̌tû ə́ zóʼ əliʼə́, pə́ júmkə pəkwûə á nəwûə, pə́ kə́ ə́sóŋə anǔəsê á mbô pəpóŋə.

⁶Mbwɔ́dnə ə́ chîə á mbô ŋwu páʼ atûə ajíə á kě nə̈ koʼlə̂ ńté mə pô!”

⁷Ndzaŋə ándó ngaŋə́zoŋə́ndzəm Jɔn nə ńtə́ nə́ ńgɛnə̂ lə́, Yeso a chúʼə mə́ tsáb nə́ ńté Jɔnə á mbô pɨ pə́ nə ńchî nə́ aliʼ yi ə́wɨ́, ə́sóŋə ńgə́, “Á nə ḿbə́ əghâ pɨ nə ńgɛn nə́ á kɔŋ məŋkwâʼlə̌ lə́, pɨ nə ńkwaŋ ńgə́ pɨ yǐ zɨ lə́ akə̂? Akəkaʼ páʼ kəfəələ á chiʼ nə́?

⁸Ńchî ə́lɨ́d pó tə ḿbə́ pɨ nə ńgɛn lə́ mə́ zɨ́ nə́ akə̂? A ŋwu páʼ a wê nə́ ətsəʼ pi əshîʼnə? Ngá, pɨ pö wê nə́ ətsəʼ pipə əshîʼnə pö chîə lə́ á mə́m məntɔ́ʼ mə́ pəfo.

⁹Fiʼtə̂ nə́ mə, pɨ nə ńgɛnə̂ apeŋ lə́ á mə́ zɨ́ nə́ akə̂? Á ntûsê? Lə́ ndə̌ŋdəŋə́. Mäŋ fiʼtə̂ áwɨ́ ńgə́ nə zə́ənə a ŋwu páʼ a tsɛ nə́ ntûsê.”

¹⁰Lə́ ŋwu páʼ pə́ nə ŋ́ŋwaʼlə̂ nə́ ńté yí ńgə́, “Mäŋ yǒ tú ntúmə mə ə́ kwá mbi əzo ńgɛn ńtsoŋkə̂ ndúmə á mbô gho.”

¹¹Ndə̌ŋdəŋ, maŋ fiʼtə̂ áwɨ́ ńgə́ pə́ kě ŋwu tsə̌ kə́ pîə páʼ a tsɛ nə́ Jɔn pô. Chigə mɔ́ kə́nyaŋ ŋwunə á mə́mə anuə nəfoonə nəpóolə a tsɛɛlə̂ yə́.

¹²Ə́fɛ́d nə́ ndɛd Jɔn əfɛ̂ nkǐ tə ńkoʼ nə́ əghâ nə́, anuə nəfoonə á nəpóolə á chîə á mə́m tə́kɔʼ ngə́ʼə, ngaŋə́fɛ̂ngə́ʼ ə́ kwáalə á zɨ́d nə́ mətəənə.

¹³Məntúmə́sê tsɔʼə mətsəmə, pópə pənoŋkə pə́ Mosisə kə sóŋə anu ńté anuə nəfoonə nəpóolə, tə ńkoʼ nə́ ndɛd Jɔnə a nə ńgyǐ nə́.

¹⁴Lə́ mbɔʼ nə kɔŋə̂ mə́ pí nə́, Jɔn lə́ Elayija wə̂ páʼ pə́ nə sóŋ nə́ ńgə́ a yǒ yǐ lə́.

¹⁵Ŋwu páʼ a túg nə́ mətôglə a zóʼə.

¹⁶Mbɔʼ maŋ fiʼkə̂ pɨ pə́ ngoʼ pɨ lə́ nə́ akə̂? Pó chî lə́ ándó kə́yé ŋwu páʼ pó náanə nə́ aliʼə́ məta ńtíʼə ə́fóŋnə ngaŋmə́ko əzóobə́.

¹⁷Pəg kə póʼ ndəg mɔ̂ məngyě pɨ pə̂ ńkě pɛ́n pô, pəg kə́ ńdzɔb mənkǐ mə́ nəwûə, nə́ pə̂ ńkě kyéŋ pô.

¹⁸Jɔnə a nə ńgyǐ ńkě ajú tə́ ńjîə pô ńkě kə́ ńtə́ ńnô pô, pə́ sóŋ ńgə́ “a túgə pɛ̌sê.”

¹⁹Mɔ́ Ŋwunə a pɛn ńgyǐ ńtə́ ńjîə ńkə́ ńtə́ ńnô, pə́ sóŋ ńgə́, “lə́ ngaŋ lwaʼə, ḿbə́ apɛ̌ləmə́loʼə, ńkə́ ḿbə́ ngaŋəko ngaŋə́kwáalə́ nchubə aláʼ pópə ngaŋə́ghɛlə təpɔŋ.” Pə́ jîə ayáŋə Əsê lə́ ńdaŋ lə́ nə́ mənu páʼ a ghɛd nə́.

²⁰Yeso a tíʼ ńchúʼə á mə́ kwantə̂ nə́ əláʼ ətsəm páʼə á nə ḿbɛ́d nə́ tə ńgɛd əkɨʼnəmə́nu ə́wɨ́ ńté ńgə́ pó nə ńkě məntɨ́ mɔ́b kwúblə ə́fɛ́lə á mə́m təpɔŋ əghɔb pô.

²¹“Kolazin, ngə́ʼ yi ngweŋ ə́ chîə á atû pəənə́, Bɛdsada, ngə́ʼ yi ngweŋ ə́ chîə á atû pəənə́. Əkɨʼnə mənu páʼ pə́ nə ńgɛd nə́ á mbô pɨ lə́, mbɔʼ pə́ nə ńgɛd lə́ á mbô pɨ pə́ Tayile pó Sidɔn, tə ḿbə́ pó nə ńkɔ́g ńkwúblə məntɨ́ mɔ́b ə́fɛ́lə á mə́m təpɔŋ əghɔb tə ńgwê ətsəʼ ngə́ʼ ńkə́ ə́fuʼə̂ apûə.

²²Lə́ mäŋ fiʼtə̂ áwɨ́ ńgə́, Əsê a yǒ túgə akóolə́mə́lə́ŋə á mbô Tayile pó Sidɔnə á alě asáʼə́məsáʼ tsɛɛlə̂ áwə́ənə́.

²³Lə́ pɨ ngaŋ Kapanawum, pɨ nə ńtə́ ńdoonə̂ á mə́ kɔ́ʼkə nə́ mbɨ əzəənə́ á nəpó? ngá, pə́ yǐ maʼə̂ áwə́ənə́ á mə́mə aláʼə pəkwû pə́ əsê. Təmbɔʼ pə́ nə ńgɛd əkɨʼnəmə́nu pə́ nə ńgɛd nə́ á mbô pɨ lə̂ á Sodom, tə ḿbə́ wə́ələ́ á pěʼ ḿbɛ́d tə ńkoʼ ə́sɛ̂nə̌.

²⁴Lə́ mäŋ fiʼtə̂ áwɨ́ ńgə́ Əsê a yǒ kó mələ́ŋ mə́ pɨ pə́ Sodomə alě asáʼə́məsáʼ tsɛɛlə̂ áwə́ənə́!”

²⁵Əghâ yi wɨ́, Yeso a sóŋ ńgə́, “Tǎ, mäŋ fɛ̂ ndǎ əzo, gho páʼ gho túg nə́ nəpó pó ndəsê ńté ńgə́ gho lyáŋ mənu məənə́ á mbô pɨ pə́ yáŋ nə́ ńkə́ ńjî ənuə, ńtíʼ ńkyaʼə̂ mə́ələ́ á mbô kə́yé pɔ̂nkə̂.

²⁶Ndə̌ŋdəŋə́ ḿbə́ Tǎ, lə́ ndzaŋə á nə ḿbɔŋ nə́ gho ńgə́ gho ghɛd ə́lə́ələ́.

²⁷Tǎ mə a fɛ̂ ajúmə atsəmə á mbô maŋə; ŋwu tsə̌ a kě mɔ́ jî pô tə ńdéʼtə Tǎ, ŋwu tsə̌ a kě Tǎ kə́ ńjî pô tə ńdéʼtə móonə, ḿbɨ ḿbá pɨ páʼ móonə a tsɔ́ʼ nə́ ńgə́ mbɔʼ a nəələ̂ yə́ á mbô pó.

²⁸Yǐ nə́ á mbô maŋə pɨ pətsəm páʼ pɨ̈ faʼ nə́ tə́shúnə́, apeʼə a kə́ ńtə́ ńdɛlə̂ áwə́ənə́, maŋ yǐ ghɛd nə́ jwitə̂.

²⁹Wê nə́ akəʼlə́ mə á ndě pəənə́, ńdzéʼə á mbô maŋə; ńté ńgə́ maŋ pwɔ́dnə ńkə́ ńtsóokə mbəəmə mə. Pɨ yǐ laŋ ə́lɨ́d ntɨ́ əwɨ́ ə́ tíʼ ńjwitə̂.

³⁰Ńté ńgə́ akəʼlə́ mə á pwɔ́dnə, apeʼə mə á kə́ ńdzaŋkə̂.”