Read Awing Matyo 12 Bible Online

Matyo 12 - Awing bible

Matyo 12

¹Nə́ akəmə ndɛd jɨ́d zə̂, Yeso a tə́ ńdaŋə̂ á mə́m əfɔ ngəsáŋə́ Alěláʼsê. Nji nə ńdzáŋ ngaŋə́zoŋə́ndzəm əjí pó chúʼə á mə́ lagtə̂ nə́ məmbəm mə́ ngəsáŋ ńkɔ́lə ághóobə́.

²Pəfalasi pə́ nə ńdzə́ənə anu jɨ ńtíʼ ə́sóŋə á mbô yí ńgə́, “Náŋə! Ngaŋə́zoŋə́ndzəm əzô ə́ tə́ faʼə̂ anu páʼ noŋkə á kě nə́ pí pô alěláʼsê.”

³Yeso a kwěe ághɔ́b ńgə́, “Nə́ kě kə̈ fóŋə anu páʼ nji ə́ nə ńtə́ nə́ ńdzáŋə Debid pópə pɨ pó po nə ńchî nə́ a ghɛd?

⁴A nə ńkwúnə á ndɛ̂sê ńtwáamə apéenə məkálə́ páʼ pə́ nə ńtə́g nə́ ə́wɨ́ á mbô Əsê pópə pɨ pó po nə ńchî nə́ jî páʼ noŋkə á nə ńkě nə́ ə́lɨ́d nɨd pô, noŋkə á nə ńnɨd ńgə́ mbɔʼ lə́ kɔ́d tsɔʼə ngaŋə́pêsê.

⁵Kɨ nə kě kə̈ fóŋə á mə́m pənoŋkə pə́ Mosisə ńgə́ á pə́ alěláʼsê lə́ ngaŋə́pêsê pó chî nə́ á mə́m tə́kɔʼndɛ̂sê pó wǔ pənoŋkə pə́ alěláʼə́sê ḿbə́ ńdɔg ńgə́ pó kě anu wǔəə?

⁶Mäŋ fiʼtə̂ áwɨ́ ńgə́ ŋwunə a chîə aliʼə́ nə́ páʼə a tsɛ nə́ tə́kɔʼndɛ̂sê.”

⁷Aŋwaʼlə Əsê á sóŋ ńgə́, “Maŋ kɔŋə̂ akóolə́mə́lə́ŋ ńtsɛɛlə̂ afyaʼə́nuə. Mbɔʼ nə́ pěʼ ńjîə anu páʼə atsáb zəənə́ á sóŋ nə́, tə ḿbə́ mbɔʼ nə́ pěʼ ńkě anuə atû mbóʼngaŋ néŋ pô.

⁸Ńté ńgə́ Mɔ́ Ŋwu lə́ mmaʼmbî pə alěláʼə́sê.”

⁹Yeso a fɛ́lə aliʼ wɨ́d wə̂ ńgɛnə̂ á ndɛ̂sê Pəjusə,

¹⁰ŋwu tsə̌ páʼ táʼə apô yə á nə ńkwû nə́ a nə ńchî ə́wə́. Ndzaŋə ándó pó nə ńtə́ nə́ ńnáŋ ndúmə á mə́ wam nə́ Yeso lə́ ńtíʼ ḿbítə yí ńgə́, “Noŋkə á pí ńgə́ mbɔʼ pə́ tsóʼə ŋwunə alěláʼsê?”

¹¹A sóŋə á mbô pó ńgə́, “Mbɔʼ ŋwu wɨ yitsə̌ a túg mbéŋ ndzɛd əjǐ ə́ yǒ ńgwǔəə á mə́mə apɛ́lə alěláʼə́sê, a kě zə́ələ́ á mə́mə apɛ́d yə wɨ́ fóg?

¹²Ńgɛd ə́lɛ́ nə́ ŋwu páʼ a lánə nə́ ńchígə́ səglə̂ ńtsɛ mbéŋ ndzɛlə? Lə́ələ́ pə́ ńgə́ noŋkə əwɛ́nə á nɨd ńgə́ á koʼnə̂ á mə́ ghɛd nə́ əshîʼnə Alěláʼsê.”

¹³A tíʼ ə́sóŋə á mbô ŋwu wə̂ ńgə́, “Shǐəə apô azô.” A shǐəə á zə́ələ́, á féŋtə ńtíʼ ńchîə ándó yətsə́ apô.

¹⁴Lə́ Pəfalasi pó fɛ́lə á apeŋ ńtíʼə ńtyáŋə mənaŋ ndzaŋ mbɔʼ pó jwítə yə́.

¹⁵Ndzaŋ Yeso a nə ńdzóʼ nə́ anu zɨ́d zɨ lə́, ńtíʼ ńdǒ yə́ aliʼ yi wə́. Mboŋ pɨ zoŋə̂ yə́, a tíʼ ńtsóʼ məghɔ mɔ́b tsɔʼə mətsəmə.

¹⁶Ńkwantə̂ ághɔ́b ńgə́ kɔ pó fiʼtə̂ ŋwu páʼ yə́ a pə́ nə́ wə́ələ́.

¹⁷Zəənə́ á nə ńdwɛ́nkə lə́ anu páʼ Əsê a nə́ ńtsáb nə́ ńdaŋə̂ á mbô ntûsê Izaya ńgə́,

¹⁸“Lɛ̌ ngaŋə afaʼə mə páʼ maŋ tsɔ́ʼ nə́, yi páʼ maŋ kɔŋ nə́, ntə́əmə mə kə́ ńkɔŋtə̂ ńté yə́; Maŋ yǒ néŋə ajwiə mə á mbɨ yə́, A yǒ ghɛd Pətəjǐsê pó jî nchwádkə Əsê.

¹⁹A yǒ kë fyaʼnə̂ pó ŋwu kɨ̈ ətsáb ngye əjǐ ə́ kɔ́ʼə atǐ pô; ŋwu tsə̌ ä láʼ kě ngye əjǐ alaŋə́ zóʼ pô.

²⁰A yǒ kě akəkaʼ páʼ a zəŋnə̂ nə́ pə́ʼ pô, kɨ nkyaʼ páʼ ə́ tə́ nə́ ḿbə́gnə, a yǒ kě pə́gtə pô, tə a láʼ ńgɛd mənu mə́ koʼnə̂ nə́ mə́ kwá mbî ntsəmə.

²¹Ŋwu ntsəmə a yǒ néŋə akwaŋə ají nə́ yí tə́ pyáabə.”

²²Pó tíʼ ńtə́ ńgyǐəə nə́ ŋwu tsə̌ páʼ pɛ̌sê pə́ nə ńchî nə́ á mbɨ yí tə a kě əliʼ pɛ́lə ńdzə́ənə pô ńkě kə́ ḿbɛ́lə ńtséebə pô, Yeso a tsóʼə yə́, a tíʼ ńtsáb ńkə́ ńjɨ́ əliʼə́.

²³Anu jɨ́d zəənə́ á nə ńkɨʼnə̂ á ŋwu ntsəm páʼ a nə ńchî nə́ aliʼ yi wə́, pó tíʼə ḿbítə ńgə́, “Təmbɔʼ lɛ̌ pə́ mɔ́ Debid wə̂?”

²⁴Ndzaŋ pəfalasi pə́ nə ńdzóʼ nə́ anu zɨ́d zɨ lə́, ńtíʼ ə́sóŋ ńgə́, “A lɔgə̂ lə́ mətɨ mə́ Bɛlzebɔb páʼ a pə́ nə́ əfo pɛ̌sê lə́ ńkəmə̂ pɛ̌sê ə́wə́.”

²⁵Yeso a jîə akwaŋə azɔ́b tsɔʼə atsəm ńtíʼ ə́sóŋə á mbô pô ńgə́, “Aláʼə atsəm páʼ á ghabtə̂ nə́ mbɨ əjǐ akwɛlə akwɛlə ḿbóʼnə tətɨ pó, á kě yǐ chî nga pɛ̌ tə ghə́ á měe pô, aláʼə atsəm kɨ ndɛ̂ ntsəm páʼ ə́ ghabnə̂ nə́ mbɨ əjǐ ə́ kě yǐ kə́ tɨ́ pô.

²⁶Mbɔʼ satanə a kəmə̂ yitsə̌ Satan, lə́ələ́ pə́ ńgə́ a ghabnə̂ mbɨ əjǐə á ngǎ yə́. Təmbɔʼ nəfɔ jí nə́ pə̂ ńtɨ́ lə́ ə́lɛ́?

²⁷Mbɔʼ maŋ kəmə̂ pɛ̌sê lə́ nə́ mətɨ mə́ Bɛlzebɔb tə ḿbə́ əzɨ́ ngaŋə́zoŋə́ndzəm pó kəmə̂ lə́ nə́ mətɨ mə́ ə́wə́? Á pə́ ńgə́ pó yǒ tíʼ pə́ lə́ ngaŋə́sáʼə́məsáʼ əzə́ənə́.

²⁸Lə́, mbɔʼ maŋ kəmə̂ pɛ̌sê lə́ nə́ Ajwǐəsê, tə ḿbə́ anuə nəfoonə Əsê á pɛ́dtə ńgyǐəə á mbô pəənə́.”

²⁹“Kɨ mbɔʼ ŋwunə a kwúnə á ndɛ̂ atyǎntə ŋwu ńtwám əpú ndɛ̂ pí lə́ ə́lɛ́, tə ńdéʼtə a peg ńgwaamə̂ ŋwu yi ńtyantə̂ nə́ wə̂ ńkwúlə yí záʼ ḿbɔŋə̂ twá əpú ndɛ̂ píə.”

³⁰Ŋwu páʼ a kě nə́ pəg yí chî pô, lə́ ngaŋ kəpeenə́ mə, ŋwu páʼ pəg yí kě nə́ ńnɔd ńkyeetə̂ pô, a shamkə̂ lə́ shamkə̂ nə́.

³¹Lə́ maŋ sóŋə áwɨ́ ńgə́, mə zɔ nə́ Əsê pópə təpɔŋ pɨ pə́ ghɛd nə́, pə́ yǒ ləgnə̂, lə́ mə zɔ nə́ Ajwǐəsê, pə́ yǒ kě á wɨ́d wə̂ təpɔŋ ləgnə̂ pô.

³²Ŋwu ntsəm páʼ ä tsáb nə́ təpɔŋ ńté Mɔ́ Ŋwu, pə́ yǒ ləgnə̂ təpɔŋ əyǐə, lə́ ŋwu ntsəm páʼ ä tsáb nə́ təpɔŋ ńté Ajwǐəsê pə́ yǒ kě təpɔŋ əyǐ ləgnə̂ pô, nə́ ndɛd zɨ kɨ nə́ ndɛd ə́ yǒ nə́ pɔŋə̂ yǐəə.

³³Tsoŋkə̂ atǐə á pɔŋə̂, mənta mí mə́ yǐ kə́ pɔŋə̂, kɨ gho tsoŋkə̂ atǐə á pə́gə, mənta mí mə́ yǐ kə́ pə́gə, ńté ńgə́ pə́ jîə atǐə atsəm lə́ nə́ mənta míə.

³⁴Ngwud mənó mə́ təpɔŋ! mbɔʼ pɨ ngaŋə́ghɛlə təpɔŋ nə́ sóŋ lə́ akə̂ anu tə á pɔŋə̂? Ńté ńgə́ atséebə ntsoolə á fɛ́lə lə́ á mə́m mənu páʼ mə́ lwɛ́nkə nə́ á ntə́əmə.

³⁵Ŋwu yi əshîʼnə ä yǐəə nə́ mənu mimə əshîʼnə páʼ á pěʼ nə́ ńdɔʼkə̂ á mə́m ntɨ́ əyí yi əshîʼnə, ŋwu təpɔŋ á kə̈ ńgyǐəə nə́ mənu mimə́ təpɔŋ páʼ a pěʼ nə́ ńdɔʼkə̂ á mə́m ntɨ́ əyí yi təpɔŋ.

³⁶Lə́ maŋ pə̂ ə́fiʼtə̂ áwɨ́ ńgə́, á yǒ pə́ alě asáʼə́məsáʼ lə́, ŋwu ntsəmə a sóŋə anu páʼ á nə ńgɛd nə́ yə́ a tsáb ətsáb kətaŋ ətsəm páʼ a nə ḿbɛ́d nə́ tə ńtséebə.

³⁷Lə́ələ́ á pə́ ńgə́, pə́ yǒ lɔg ətsáb əpô ə́sáʼ əsáʼ əghô wə́, á mə́ jɨ́ nə́ ńgə́ kɨ gho lɛ ńdaŋ əsáʼ kɨ ńgwǔəə.

³⁸Pəfalasi pətsə́ pópə ngaŋə́zéʼkə pənoŋkə ə́sóŋ nə́ yí ńgə́, “Ndzéʼkə, pəg loonə̂ á mə́ jɨ́ nə́ akyeʼə́nuə á mbô gho.”

³⁹Yeso a kwěe ńgə́, “Pɨ pə́ ngoʼ pɨ páʼ pó myaʼ nə́ Əsê ńkə́ ńgɛlə̂ təpɔŋ pó pítə akyeʼə́nuə á mbô maŋ!” Lə́ pə́ kě yətsə̌ yǐ fɛ̂ pô tə ńdéʼtə akyeʼə́nuə ntûsê Jona.

⁴⁰Tsɔʼə ándó Jona a nə ńchî nə́ á nəpəm mɛ́ əshû əlěmbî teelə́ nə́ mətúʼ mɛ́n teelə́ lə́, lə́ ndzaŋə ándó Mɔ́ Ŋwunə a yǒ nə́ kə́ chî əlě mbî teelə́ nə́ mətúʼ mɛ́n teelə́ á ntɛ́n əsê.

⁴¹Pɨ pə́ Ninibe pó yǒ lǒo á əsê alěsáʼə́məsáʼə ghɛd pɨ pə́ ngoʼ pɨ pó wǔ əsáʼə, ńté ńgə́ pó nə ńkwúblə məntɨ́ mɔ́b ə́fɛ́lə á mə́m təpɔŋ əghɔb ńdzoŋə̂ anǔəsê páʼ Jona a nə̈ ə́sóŋ nə́, əghâ nə́ ŋwunə a chîə aliʼə́ nə́ páʼ a tsɛ nə́ Jona.

⁴²Mɛ̂fo Shɛba a lǒo júmnə alěsáʼə́məsáʼ ə́ ghɛd pɨ pə́ ngoʼ pɨ pó wǔ əsáʼ, ńté ńgə́ a nə ə́fɛ́lə á ndwegtə mbî ńgyǐəə á mə́ jwə́ʼtə nə́ ajíənuə Solomunə, nə́ əghâ nə́, ŋwunə a tsɛ nə́ Solomunə a chîə aliʼə́ nə́.

⁴³“Təmbɔʼ ajwiə təpɔŋə a fɛ́lə á mbɨ ŋwu, á ghɛnə̂ á mə́m kɔŋ yi njǔbtə̈ ńnáŋə aliʼə́ á mə́ chî nə́ ə́wə́, ḿbə́ ńchîə zɨ́d zɨ́ pô,”

⁴⁴á tíʼ ə́sóŋ nə́ mbɨ əjǐ ńgə́, “Maŋ yǐ pɨ pəənə̂ á ndɛ̂ maŋ nə fɛ́d nə́ ə́wə́.” Mbɔʼ a yǐ ńtég ndɛ̂ yi wɨ́ ŋwunə a chî wɨ́ chî, pə́ zəgə̂ ájɨ́d ə́ ŋwaʼə̂, ńkə́ ńtyáŋtə əliʼ əshîʼnə.

⁴⁵A tíʼ ḿbɨ ńgɛn ńdɔg pətsə́ əjwi təpɔŋ pɛ́n asaambɛ̂ páʼ pó túg nə́ təpɔŋ ńtsɛɛlə̂ yí, pó po yǐ ńkwúnə á ndɛ̂ yi wɨ́ ńtíʼ ńchî ə́wə́. Nchîmbî ŋwu wə̂ ə́ yǐ ńtə́ ńdwegtə̂ ḿbə́g tə ńtsɛ ndzaŋ ə́ nə ḿbeg nə́ ńchîə. Lə́ ndzaŋ á yǒ nə́ chîə á mbô pɨ pə́ təpɔŋ pə́ ngoʼ pəənə́.

⁴⁶Ndzaŋə ándó Yeso a nə ńtə́ nə ḿbɛ́lə ńtséebə nə́ ŋwuməsɔŋ lə́, Mǎ əyǐ pópə pɔ́pə́mɛ́ pí pi pə́ mbyâŋnə pə́ tə́əmə apeŋ ńtə́ ńdoonə̂ á mə́ tsáb nə́ nə́ yə́.

⁴⁷Ŋwu tsə̌ a sóŋ nə́ yí ńgə́, “Mǎ əgho pópə pɔ́pə́mɛ́ po pi pə́ mbyâŋnə pó tə́əmə apeŋ ńtə́ ńdoonə̂ á mə́ tsáb nə́ á mbô gho.”

⁴⁸Yeso á kwěe yí ńgə́, “Mǎ mə lə́ əwə, pɔ́pə́mɛ́ mə pi pə́ mbyâŋnə pə́ kə́ ḿbə́ mbə̂kə̂?”

⁴⁹Yeso a tíʼ ə́shiʼ ngaŋə́zoŋə́ndzəm əjí ə́sóŋ ńgə́, “Lɛ̌ Mǎ mə pópə pɔ́pə́mɛ́ mə pi pə́ mbyâŋnə.

⁵⁰Ńté ńgə́ ŋwu ntsəm páʼ a faʼ nə́ anu Tǎ mə a nəpóolə a lɔ nə́, lə́ ndimə́ mə yi mbyâŋnə, ńkə́ ḿbə́ yi məngyě, ńkə́ ḿbə́ mǎ mə.”