Read Awing Matyo 13 Bible Online

Matyo 13 - Awing bible

Matyo 13

¹Tsɔʼə alě yə wɨ́, Yeso a fɛ́lə á ndɛ̂ yi wɨ́ ńgɛn ńnáanə nkaŋ əfooghəəmə́.

²Ŋwu məsɔŋ á nə ńdíblə nə́ yə́ a nə nɨ́ tə́shú tə a tíʼ ńkwú ńnáanə pə́ á mə́mə aŋkənúʼə́, pɨ pətsəm pə́ tíʼ ńtə́əmə á nkǎŋkǐə.

³Yeso a tíʼ sóŋ mənu mimə nɨ́ nə́ pó nə́ atséebə́nə́múʼ ńgə́, “Ndíʼə alíʼ yitsə̌ a nə ńdáʼ fɛ́d ńgɛnə̂ a mə́ pǐ nə əpú píə.

⁴Ndzaŋə a nə ńchî nə́ afɔ ńtə́ ḿbǐ əpú pə wɨ́ lə́, pitsə́ ə́ wukə̂ a alaŋə́ ndúmə, pəsə́ŋ pə́ yǐ ńdagtə̂ ńkɔ́lə ághóobə́.

⁵Yitsə́ ə́ wukə̂ a ndu ngwúb páʼ ndəsê nə ńkě nə́ ə́wɨ́ nɨ́ pô, ə́sáʼ nə́ mətɨ ńté ńgə́ ndəsê nə ńkě shǐ pô.

⁶Lə́ mə́numə á yǐ ḿbə́ ńtɛ̂ ńtɔ əpú pi wɨ́ ńté ńgə́ məŋaŋ mí mə́ nə ńkě a ndəsê kwú pô; pɨ́d tíʼ ńjúmə.

⁷Yitsə́ ə́ wukə̂ á mə́m məsɔbsoobə, məsɔbsɔb mə́ kɔ́ʼ ńkwúlə zə́ələ́.

⁸Lə́ yitsə́ ə́ pɛ́d ńgwǔəə a ndu ndəsê yi əshîʼnə ńkɔ́ʼ ńdzə́mə. Pətsə́ ə́ zə́m mbəm nkɛlə́, yitsə́ ə́ zə́m mbəm məghə́m ntogə́, yitsə́ ə́ zə́m mbəm məghə́m mɛ́n teelə́.

⁹Ŋwu páʼ a túg nə́ mətôglə a zóʼə.”

¹⁰Ngaŋə́zoŋə́ndzəm Yeso yǐəə á mbô yí ḿbítə ńgə́, “Lə́ ghɛlə̂ akə̂ gho tséebə á mbô pəənə pə́ nə́ atséebə́nə́múʼə́?”

¹¹Yeso a kwěe ńgə́, “Pə́ fɛ̂ ajíə anu á mbô pɨ mbɔʼ nə jî mənu mə́ nəlyaŋnə́ mətsəm ńté anuə nəfoonə nəpóolə, lə́ ḿbə́ ńkě á mbô pó fɛ̂ pô.

¹²Ŋwu ntsəm páʼ a túg nə́ ajúmə, pə́ yǐ pegə̂ á mbô yí ńjî ńgə́ a túg tə a chaanə̂. Lə́ ŋwu ntsəm páʼ a kě nə́ ajú túg pô, mɔ́ aliʼ páʼ a túg nə́, pə́ yǐ kwáalə á mbô yə́.

¹³Anu páʼ á ghɛd nə́ maŋ tséebə á mbô pó pə́ nə́ atséebə́nə́múʼ lə́ ńté ńgə́, pó pǎtə ńnáŋ əliʼ lə́ ḿbə́ ńkě tə́ ńdzə́ənə pô, ńjwə́ʼtə əliʼ lə́ ḿbə́ ńkě tə́ ńdzóʼə pô, atûə azóobə́ á pə́ ńkě ə́wɨ́ kə́ ńdá pô.

¹⁴Atséebə Izaya a lɔgə̂ aliʼə́ á mə́m pó;” Ndzaŋə a nə sóŋ nə́ ńgə́ nə láʼ kə̈ zóʼə tsɔʼə zóʼ nə́, atûə azə́ənə́ á pə́ ńkě ə́wɨ́ kə̈ ńdéenə pô. Nə yǐ náŋ əliʼə́, ə́ pə́ kě ajûtsə́ jɨ́ pô,

¹⁵ńté ńgə́ məntɨ́ mə́ pɨ pɨ mə́ lwɛ́nkə nə́ akəkógə́, a tyantə̂ pó pɔŋə̂ zóʼ əliʼ nə́ mətôglə móobə́, pó kə́ ńkə́bkə əmə́g móobə́. Ńchî ə́lɨ́d pô, tə ḿbə́ mbɔʼ pó jɨ́ əliʼ nə́ əmə́g móobə́, ńdzóʼ əliʼ nə́ mətôglə móobə́, atûə azóobə́ a kə́ ńdá, pó yǐəə á mbô maŋ ńgə́ mbɔʼ maŋ tsóʼə ághóobə́.

¹⁶Mbɔŋə lə́ azɨ́ ńté ńgə́ əmə́g mɨ́ mə́ jɨ́ əliʼə́, mətôglə mɨ́ mə́ kə́ ńdzóʼ əliʼə́.

¹⁷Lə́ maŋ fiʼtə̂ áwɨ́ nə́ ndə̌ŋdəŋ ńgə́ məntúmə́sê mimə nɨ́ nə́ pópə pɨ pə́ tɨ́ nə́ ndə̌ŋdəŋ pə́ táŋnə mə jɨ́ nə́ mənu páʼ nə̈ jɨ́ nə́ ḿbə́ ńkě mɨ́d jɨ́ pô ńkə́ ńtáŋnə á mə́ zóʼ nə́ mənu páʼ nə̈ zóʼ nə́, ḿbə́ ńkě zóʼ pô.

¹⁸Tíʼ nə́ ńdzóʼə anu páʼ atséebə́nə́múʼ ńté mbipú wə̂ á sóŋ nə́.

¹⁹Ŋwu ntsəm páʼ a zóʼ nə́ atsáb ńté anuə nəfoonə Əsê, atûə ajíə a chî ə́wɨ́ lá pô, a chî lə ándó mbǐpú nə ńgwukə̂ nə́ a alaŋə́ ndú lə̂. Satanə á pə́ nə́ Ŋwu Təpɔŋ lə́ a yǐ ə́fógə anuə atsəm pə́ nə ḿbǐ nə́ a ntɨ́ yə́.

²⁰Mbǐpú nə ńgwukə̂ nə́ a ndu ngwúb lə́, ə́ chî lə́ ándó ŋwu páʼ a zóʼ nə́ atsáb yə wɨ́, ńkə́ ńtɔ́g ḿbí nə́ akɔŋtə.

²¹Ndzaŋə a kě nə́ məŋaŋ túg pô lə́, zə́ələ́ a chîə ntɨ́ yí tsɔʼə nə́ mɔ́ akəmə ndɛlə́. Əghâ ándó a yǒ nə́ ńchîə á mə́m ngə́ʼ, kɨ pə́ tsaŋkə̂ yí ńté atsáb yə wɨ́, a zaŋkə̂ ńtsɔ́ʼ mbô mí ə́wə́.

²²Yi ə́ nə ńgwukə̂ nə́ á mə́m məsɔbsɔb lə́, lə́ ŋwu páʼ a zóʼ nə́ atsáb yə wɨ́ nətáŋ mbî pópə əpú ndu mbî ə́ fumkə̂ yí a kě pɨ ńchî təmbɔʼ a zə́m mənta mətsə́ pô.

²³Lə́ mbǐpú ə́ nə ńgwukə̂ nə́ á ndu ndəsê yi əshîʼnə lə́, lə́ ŋwu páʼ a zóʼ nə́ atsáb yə wɨ́ atûə ajíə á kə́ ńdá ə́wə́. A tíʼ ńdzə́m mənteemə́; mətsə́ táʼ nkɛlə́, mətsə́ məghə́m mɛ́n ntogə́, nə́ mətsə́ məghə́m mɛ́n teelə́.

²⁴Yeso a kə́ ḿbɨ fiʼtə̂ ághɔ́b nə́ atséebə́nə́múʼ yətsə̌ ńgə́, “Anuə nəfoonə nəpóolə á chî lə́ ándó ŋwunə a ghɛn ḿbǐ mbǐpú yi əshîʼnə á alíʼ yə.

²⁵Əghâ ŋwu ntsəmə a nə ńtə́ nə́ ńdê lə́, ngaŋkəpa əyǐə a yǐ ḿbǐ ngɔ́nə á mə́m ngəsáŋ wə̂ ńtíʼ ńgɛnə̂ yə́.

²⁶Ndzaŋə ándó ngəsáŋə́ a kə kɔ́ʼ nə́ tə ńtə́ ḿbadtə̂ lə́, ngɔ́n ə́ tíʼ ńnɨd mbɨ əjǐə.”

²⁷Ngaŋə́faʼ ŋwu yi wɨ́ pó yǐəə ə́sóŋə á mbô yí ńgə́, “Tǎ, gho nə ńkě lə́ ngəsáŋə́ aliʼ gho wə̂ pǐ? Ngɔ́n ə́ pɛn ńtíʼ ńdǒ ají lə́ ə́fó ə́wə́?”

²⁸A kwěe ághɔ́b ńgə́, “Lə́ ghɛd ngaŋkəpeenə́.” Ngaŋə́faʼ əjí pó pítə yí ńgə́, gho kɔŋ ńgə́ pəg ghɛn ńtsɔ́ʼtə ájɨ́d?

²⁹A kwěe ághɔ́b ńgə́, “Ngá,” Ndzaŋ pɨ yǐ nə́ ghɛn tə́ tsɔ́ʼtə ngɔ́n lə́, əghâ tsə́ tsɔ́ʼtə ághɔ́b ngəsáŋə́.

³⁰Mɛdtə̂ nə́ ajúmə atsəmə á nɔd ńkɔ́ʼ tə ńkoʼə̂ alě pə́ʼə ngəsáŋə́. Əghâ yi wɨ́ maŋ tíʼ ə́sóŋə á mbô ngaŋə́pə́ʼə́ ngəsáŋ ńgə́, “Peg nə́ ńtsɔ́ʼtə ngɔ́n zə̂ ńkwúlə á mboʼə́ mboʼə́ pə́ yǐ ńtoonə̂, ńtíʼ ḿbə́ʼə ngəsáŋ wə̂ ńgyǐ ńnéŋə á nkye maŋə.”

³¹Yeso a kə ḿbɨ ńtséebə atséebə́nə́múʼ yətsə́ á mbô pó ńgə́, “Anuə nəfoonə nəpóolə a chî lə́ ándó páʼ mbaŋ fɔ́lə́sə ŋwunə a lɔg nə́ ńgɛn ḿbǐə a nkáʼ yə́.

³²Ə́ pǎtə ńkə́g ńtsɛ mbǐpú ətsəm lə́, ńgyǐ ḿbə́ ńkwíŋ ə́ tíʼ sɛd chigə mɛ́ tə́kɔʼə atǐə, á fáŋ nə́ ńtsɛ mətǐ mətsəmə á mə́m nkáʼə. Pəsə́ŋ pə́ tíʼə ńkwúlə mənka mɔ́b nə́ məfag míə.”

³³Yeso a kə́ ḿbɨ́ fiʼtə̂ ághɔ́b nə́ atséebə́nə́múʼ yətsə́ ńgə́, “Anuə nəfoonə nəpóolə a chî lə́ ándó mbê apá páʼ məngyě yitsə̌ a nə ńdɔg nə́ ńnéŋə á mə́mə apá páʼ á kə́ʼ nə́ nə́ əkáŋ teelə́ á tíʼ ńkɔ́ʼ tə ńdwɛ́nkə nəkəŋə́.”

³⁴Yeso a nə̈ ńtséebə anuə atsəmə á mbô ənɔ pɨ lə́ nə́ ətsábnə́múʼə́; mbɔʼ a nə ńkě anu yətsə́ á mbô pó sóŋ tsɔʼə tə ghə́ a tsáb nə atséebə́nə́múʼ pô

³⁵A nə̈ ńgɛlə̂ ə́lɨ́d lə́ ńjî ńgə́ anu páʼ ntûsê a nə ə́sóŋ nə́ á lɔgə̂ aliʼə́, páʼ á nə sóŋ nə́ ńgə́, “Maŋ yö tséebə á mbô pó lə́ nə́ ətsábnə́múʼə́; Maŋ yǐ fiʼtə̂ ághɔ́b nə́ mənu pə́ nə ńkě nə́ mɨ́d jî pô ə́fɛ́lə ándó pə́ nə ńtsoŋkə̂ nə́ mbîə.”

³⁶Yeso a tíʼ ḿmɛdtə̂ apoŋə pɨ zə̂ ńkwúnə á mə́m ndɛ̂. Ngaŋə́zoŋə́ndzəm əjí yǐəə á mbô yí ə́sóŋ ńgə́, “Fiʼtə̂ áwə́g nə́ anu páʼ atséebə́nə́múʼ zə̂ ńté ngɔ́nə ä sóŋ nə́.”

³⁷Yeso a kwěe ńgə́, “Ŋwu páʼ a nə ḿbǐ nə́ mbǐpú yi əshîʼnə zə̂, lə́ Mɔ́ Ŋwunə;

³⁸Alíʼ zə̂ a pə́ mbîə; mbǐpú yi əshîʼnə zə̂ pə́ pɨ pó chî nə́ á mə́mə anuə nəfoonə Əsê; ngɔ́n zə̂ pə́ pɔ́ pə́ ŋwu təpɔŋə;

³⁹Ngaŋkəpa wə̂ páʼ a nə ḿbǐ nə ngɔ́n zə̂ lə́ a pə́ Dɛbəələ. Mə pə́ʼ nə́ ngəsáŋ wə̂ mə́ pə́ lə́ ndwegtə mbîə, ngaŋə́pə́ʼə́ ngəsáŋ zə̂ pə́ lə́ pətseŋpə́ndɛ́pə́sê.

⁴⁰Ndzaŋə ándó pə́ kyeetə̂ nə́ ngɔ́n zə̂ ńtoonə̂ á mə́m móg lə́, lə́ ndzaŋə ándó á yǒ nə́ chîə a ndwigtə mbîə;

⁴¹Mɔ́ Ŋwunə a yǒ tú pətseŋpə́ndɛ̂ pí pó ghɛn ńkyeetə̂ ŋwu ntsəm páʼ a nə̈ ńgɛd nə́ pɨ pə́ ghɛlə̂ təpɔŋ, pópə apuʼə ngaŋə́ghɛlə təpɔŋ ə́fógə á mə́mə anuə nəfoonə ají,

⁴²ḿmaʼə̂ ághóobə́ á mə́mə atyǎntə móg páʼ pó yǒ nə́ kyéŋ tə kɔ́d məsɔŋ móobə́.

⁴³Lə́ pɨ pó tɨ́ nə́ ndə̌ŋdəŋ pó yǐ tɛ̂ ándó mə́numə á mə́mə Anuə Nəfoonə Tǎ əghoobə́. Ŋwu páʼ a túg nə́ mətôglə, a zóʼə.”

⁴⁴Anuə nəfoonə nəpóolə a chî lə́ ándó afoʼ páʼ pə́ lyáŋ nə́ á mə́m nkáʼ, ŋwu tsə́ a yǐ ńjɨ́ ḿbɨ́ ńkə́bkə zə́ələ́. Mbɨ əjǐ pɔŋ lɛ tətə, a ghɛn ə́finə̂ ajúmə atsəm páʼə a túg nə́ ńgyǐ ńjú nkáʼ yi wɨ́ ə́wə́.

⁴⁵Anuə nəfoonə nəpóolə a kə́ ńchî lə́ ándó ńtáŋ məteenə́ a tə́ ńnáŋ əpú pə əshîʼnə páʼ pɨ́d tsə́g nə́,

⁴⁶əghâ ándó páʼ a kə jɨ́ nə́ yətsə́ páʼ a chígə́ nə́ ńdyâ lə́, ńgɛn finə̂ ajúmə atsəm páʼ a túg nə ńgyǐ ńjú ə́wə́.

⁴⁷Ngǎ yitsə̌, anuə nəfoonə nəpóolə a kə́ ńchî lə́ ándó nkɛd pə́ tá nə́ á mə́m nkï ńkó ndzaŋ əshû ntsəm ə́wə́.

⁴⁸Ndzaŋə ándó əshû nə ńkwú nə́ ə́wú tə ńdwɛ́nkə lə́, ngaŋə́kóolə́shû ə́ soŋ fógə asəgə́, ńtíʼ ńnáanə əsê ńtídtə yi əshîʼnə ńnéŋə á mə́m mənka ńtíʼ ńkwɛlə̂ yi təpɔŋ.

⁴⁹Lɛ̌ ndzaŋ á yǒ nə chîə á ndwigtə mbîə. Pətseŋpə́ndɛ́pə́sê pə́ yǒ yǐ tídtə pɨ pə́ təpɔŋə á mə́m pɨ pó tɨ́ nə́ ndə̌ŋdəŋ

⁵⁰ə́tíʼ ḿmaʼ pɨ pə́ təpɔŋ pə̂ á mə́m atyǎntə mógə́. Pó tíʼ ńchî ə́wɨ́ ńkyéŋə ńkɔ́lə məsɔŋ móobə́.

⁵¹Yeso a pítə ngaŋə́zoŋə́ndzəm əjí ńgə́, “Nə́ zóʼ ndɛn mənu ghɛn lə̂ atûə azə́ənə́ a lá ə́wɨ́?” Pó kwěe ńgə́ “a léenə.”

⁵²A tíʼ sóŋə á mbô pó ńgə́, “lə́ələ́ pə́ ńgə́ ndzéʼkə pənoŋkə ntsəm páʼ a jî nə anu ńté anuə nəfoonə nəpó a chî lə́ ándó ngaŋnchîndɛ̂ páʼ a ghɛn nə́ a ntaŋ əpú yí ə́fógə apeʼ yə fî ə́wɨ́ pópə yə lɛnə̂.”

⁵³Əghâ ándó Yeso a nə məgtə̂ nə́ mə́ tsáb nə́ ətsábnə́múʼ pɨ lə́, ə́fɛ́lə aliʼ yi wə́

⁵⁴ńkwə̂ aláʼ pó. Ńchúʼə mə́ zéʼkə nə́ pəənə á mə́m ndɛ̂sê Pəjusə, a kɨʼnə̂ ághɔ́b. Pó tíʼə ḿbítə ńgə́, “Ghɛn ŋwunə a lɔgə̂ a zəənə́ ayáŋ pópə mətəənə a mə́ ghɛd nə́ əkɨʼnəmə́nu lə́ ə́fó?

⁵⁵Lɛ̌ kě mɔ́ nkɔ̂pú wə́ pô? Mɛɛlə a kě lə́ mǎ əyǐ pô? Pɔ́ pə mɛ́ pí pi pə́ mbyâŋnə lə́ kě Jɛmsə pó Jɔsɛf nə́ Saamun ḿbéenə Juda pô?

⁵⁶Lə́ kě pɛ̌npə pəlim pí pipə́ pəngyě chîə? Ŋwu nə́ a tíʼ ńdɔg ndɛn mənu ghɛn lə́ ə́fó?”

⁵⁷Ńdaŋ ə́lɨ́d məndě mɔ́b mə́ záŋnə ńté yə́. Lə́ Yeso a pə́ sóŋə á mbô pó ńgə́, “Pə̈ ghóʼkə ntûsê aliʼə́ atsəmə tə ńdéʼtə aláʼ pó, pó ngyaʼə́ əzoobə́.”

⁵⁸A nə ńkě əkɨʼnəmə́nu pi nɨ́ nə́ ə́wɨ́ ghɛd pô ńté ńgə́ pó nə ńkě mbimə́ túg pô.